Read Biatah Bidayuh ISAIAH 21 Bible Online

ISAIAH 21 - Biatah Bidayuh bible

ISAIAH 21

¹Ati inŭh agah pasar Babylonia. Mun sabak biriyung mutas tarun tana-pajam, simŭnŭ gŭh pinyusah re mandŭg so tarun tana adi sipŭ.

²Aku mbŭh kiris keya ka darŭm pŭmŭh kayuh adi raru bisā, pasar tipu ka pasar pinyirusag. Bara tibaran soldadu Elam, nyerang! Bara tibaran Media, nyikapung kupo kupo anŭ! Tapa re bada mungan udip sangsara adi dog ndai Babylon.

³Kayuh anŭ adi aku kiris ka dingah keya ka darŭm pŭmŭh mbŭh bada aku taru buang kandam aku, andam adi brimun ngga sarang andam re biranak.

⁴Ubak ku bikaning, ka aku kimŭtŭr darŭm taru. Aku kajŭn singumi andu mandŭg, pak-i dŭh taban ani ani ka aku adŭ-i bada aku tikaran.

⁵Keya ka darŭm pŭmŭh aku kiris gawai man dog sidia; kasah mbŭh dog mamad yŭn pingabang guru. Ngara man nok. Ka gŭgŭh dog dingah daya nang: “Bara pingubak soldadu, sidia pinangin ngan!”

⁶Komŭnŭ TUHAN nang di aku, “Di tijuan daya adi tukang jaga, ka kidaan di ayŭh bada ripot kayuh adi-i kiris.

⁷Kambŭi ayŭh kiris daya mandŭg nunggang kuda, mandŭg duwŭh duwŭh naan, ka daya nunggang kaldi ngga onta, ayŭh an nakit nyibatŭh ngara.”

⁸Daya adi tukang jaga bagan, “Tuan, aku mbŭh bijaga di tarun yŭn ati sandu singarŭm.”

⁹ Gŭgŭh ngara mandŭg! Daya nunggang kuda, mandŭg duwŭh duwŭh naan. Daya adi tukang jaga anŭ rasu piagah, “Babylon mbŭh rubuh! Sopŭrŭg tibudo adi ngara nyambah mbŭh randŭk di tana.”

¹⁰Daya ku Israel, angān mbŭh dog ngiik mun gandom, pak madin aku mbŭh kidaan di angān agah kana adi aku dingah so TUHAN Bisa-pŭrŭg, adi Tapa Israel.

¹¹Ati inŭh agah pasar Edom. Ndi naan so Edom bagan aku, “Daya adi tukang jaga, gibabŭ dŭm tui kah ngarŭm ati? Kidaan di aku dŭm tian-ki ngga ngarŭm re ripuan?”

¹²Aku nam, “Andu mbŭh re jawa, pak ngarŭm re mandŭg dinge. Kambŭi kuu raan siken dinge, kuu bisa mandŭg ka siken dinge.”

¹³Ati inŭh agah pasar Arabia. Angān daya Dedan, angān adi bara pinunggang onta adi bibari di tarun tana-matung rais Arabia,

¹⁴nggen piin di daya adi badŭh asŭng adi mandŭg ka angān. Angān daya tarun tana Tema, nggen pinguman di daya adi bu mangān rais adŭp-i.

¹⁵Daya bu mangān pedang adi re an siŭ ngara, so bawŭh adi re an nimbak reja-panah, so sopŭrŭg pinyusah perang.

¹⁶Komŭnŭ TUHAN nang di aku, “Darŭm ndi sawa, bās tibaran tibaran-asar Kedar re mungan.

¹⁷Ngara adi tukang nimbak reja-panah inŭh daya Kedar adi siabo pagan, pak nisŭ so ngara re dŭm. Aku, adi TUHAN, mbŭh minyu.”