Read Biatah Bidayuh ISAIAH 22 Bible Online

ISAIAH 22 - Biatah Bidayuh bible

ISAIAH 22

¹Ati inŭh agah pasar Rubān Pinandŭng. Ani mbŭh jadi? Mani sopŭrŭg daya darŭm kupo bigawai di tibung ramin?

²Ndi kupo kupo mbŭh bago, rami ngga pawŭn. Daya ngan adi kabŭs darŭm perang ati dŭh kabŭs amai bisaad.

³Sopŭrŭg pinguru ngan bikaduh bu ka dog nakap diŭ so ngara dapŭd nimbak reja-panah.

⁴Madin tandah aku muās sopŭrŭg daya ku adi mbŭh kabŭs. Dŭhnyah suba nyaduh aku.

⁵Ati inŭh tika daya kandang-kandŭ taru, arah, ka riruk di Rubān Pinandŭng, ka TUHAN Raja Bisa-pŭrŭg inŭh adi bada pinyusah anŭ nyatŭk ata. Sindung kupo ta mbŭh rubuh, ka sandah sandah mbŭh puno bada sirais sien daya mite turung.

⁶Bara soldadu so tarun tana Elam mandŭg nunggang kuda, bisinyata bawŭh ngga reja-panah. Bara soldadu so tarun tana Kir mbŭh sidia pinangin ngara.

⁷Rubān rubān di Judah mbŭh puno ngga krita kuda; bara soldadu pinunggang kuda mijog di jawin tiban-bās Jerusalem.

⁸Kuta Judah mbŭh rubuh. Kan anŭ mbŭh jadi simŭnŭ, angān taban sinyata ruah so Birit-bās Tuān Lebanon.

⁹Angān dapŭd diki sindung Jerusalem an dog napung. Angān pirasa sopŭrŭg ramin di Jerusalem ka nyirubuh kada-i amai an pakai batuh batuh-i ngga napung sindung kupo. Isa piin bisa dog nyikŭn,

¹¹angān ndai pagong di darŭm kupo ngga nyikŭn piin adi aman so pagong adi amba. Pak angān dŭh piduri Tapa, adi muko diŭ ngatur kayuh anŭ jah ka pijadi-i.

¹²Di tika anŭ TUHAN Raja Bisa-pŭrŭg bagan angān bada sien ka muās, bada angān nundo ubak ngan ka nēn banang guni.

¹³ Pak gŭt-i angān tawŭh ka bigawai. Angān siŭ biri ngga sapi an ngan man, ka angān nok wain. Angān nang, “Ata bisa man nok, amai sipagi ata kabŭs.”

¹⁴TUHAN Raja Bisa-pŭrŭg minyu ngga aku ka nang, “Arap ngara dŭh dapŭd dog apun sitŭkŭd ngara udip. Aku, adi TUHAN Raja Bisa-pŭrŭg, mbŭh minyu.”

¹⁵TUHAN Raja Bisa-pŭrŭg kidaan di aku bada di ka Shebna, adi tukang ngatur kayuh darŭm ramin raja, ka nang di ayŭh,

¹⁶“Sŭn mu nang, asi kuu? Ani hak mu mŭŭt rubang kubur yŭn adŭp mu di sandah pibatuh?

¹⁷Sawŭ kuu daya adi bās pangkat, pak TUHAN re nakap ka singgung kuu.

¹⁸Ayŭh re kakuk kuu bada bŭrŭng ka taran kuu ka rais adi rabis bayah. Kuu re kabŭs diginŭ ngapid krita kuda adi kuu ngangŭn. Kuu re nggen mangŭh di rawang tuan mu.

¹⁹TUHAN re taran kuu so kraja mu ka bisor kuu so pangkat bās mu.”

²⁰TUHAN nang di Shebna, “Di tika anŭ, Aku re bagan urun Ku Eliakim anak Hilkiah.

²¹Aku re kasŭk jipo kuasa mu ngga abŭt kupong mu di ayŭh, ka nggen di ayŭh sopŭrŭg kuasa mu. Ayŭh re keya ka sama di daya Jerusalem ngga Judah.

²² Aku re nggen di ayŭh sukup kuasa di ribo raja, adi sesang David. Ayŭh re biyŭn kusi pritah; kayuh adi ayŭh kuka, mating daya bisa tŭŭp, ka kayuh adi ayŭh tŭŭp, mating daya bisa kuka.

²³Aku re pirakat ayŭh di ndi yŭn mun pasak sikait, ka ayŭh re jadi atak stabi yŭn sopŭrŭg darŭm rawang-i.

²⁴“Pak sopŭrŭg madis ngga bara adi bisangan di ayŭh re jadi keya ka pinyirabis adi raru bat di ayŭh.

²⁵Kan anŭ mbŭh jadi simŭnŭ, pasak sikait anŭ adi dog masak bada tagap re gayo ka rudos. Ka anŭ meh pinŭbŭn sopŭrŭg kayuh adi dog tangid dieh.” TUHAN mbŭh minyu.