Read Biatah Bidayuh ISAIAH 24 Bible Online

ISAIAH 24 - Biatah Bidayuh bible

ISAIAH 24

¹TUHAN re pirabur ong ka tandah-i matung. Ayŭh re mŭrŭs jawin ong ka mesak bara daya-i.

²Barang naan daya re dog pinyusah adi samah; bara imam ngga bara daya, urun urun ka tuan, bara adi miris ngga adi jua, adi nginjam duit ngga adi mite nginjam duit; adi kaya ngga adi sirata.

³Ong re riyŭk ka rusag; TUHAN mbŭh minyu ka-i re sawŭ jadi.

⁴Ong badŭh ka rayu; ndi ong ong re jadi ramah; ong ngga rangit re madam.

⁵Ong mbŭh sembar amai manusia miranggar ukum ukum-adat Tapa ka mbŭh miranggar simanya adi Ayŭh ngga manusia mbŭh ndai yŭn adu adu.

⁶Jadi Tapa mbŭh mangu ong. Daya-i trima baras kraja pingandai ngara. Dŭ dŭ nisŭ ngara adi gibabŭ udip.

⁷Tŭngŭn anggor rayu, ka wain mbŭh makin kurang. Barang naan adi ko pawŭn dawŭ-i mbŭh susah madin,

⁸ka jawŭn musik so kachapi ngga gendang mbŭh mating tia.

⁹Mating tia daya nok wain buang biragu; mating daya kinyam sidi-i tia.

¹⁰Ndi tarun yŭn darŭm kupo mbŭh guga, ka daya ngabŭt adŭp ngara darŭm ramin.

¹¹Daya nyirais di aran raya amai wain mbŭh mating. Pinyigaŭn mbŭh manyap adu adu so ong.

¹²Kupo mbŭh rusag, ka tiban tiban-bās kupo mbŭh rubuh.

¹³Anŭ inŭh kayuh adi re jadi di barang bangsa di ndi ong ong. Kayuh anŭ re keya ka ripas pingatŭm, kan buwa kanā mbŭh abo dog piruruh so tŭngŭn-i ka sikasŭn buwa anggor mbŭh abo dog ndu so tŭngŭn-i.

¹⁴Ngara adi siramat re biragu ngga gaŭn. Ngara adi tura ka barat re nyuse pasar bās TUHAN,

¹⁵ka ngara adi tura ka timor re muji Ayŭh. Daya adi rŭŭ di arong bŭngŭn rawŭt re muji TUHAN, adi Tapa Israel.

¹⁶So tarun yŭn adi siabo jo di ong re dog dingah ragu muji Israel, bangsa adi tŭnggŭn anŭ. Pak mating pingarap ku tia! Mŭmbŭh inŭh aku! Daya adi jua dingan babŭ jua dingan, ka pingandai arap ngara makin dŭ dŭ arap.

¹⁷Dingah aku, sopŭrŭg daya! Pinyitaru, rubang, ka jarat mbŭh kajŭn angān.

¹⁸Daya adi suba an bu mangān pinyitaru re rabu darŭm rubang, ka daya adi bu mangān rubang re dog jarat. Ujen bangat re rabu so rangit ka pimŭnŭs ong re bigugoh.

¹⁹Ong re murang, raak ka pape nyinuwŭh.

²⁰Ong re tibabeu mun daya mabuk ka tipawing mun bari dog poh sabak ribut. Ong dog nanuh dosa, ka re rubuh ka dŭh pari makat.

²¹Tika-i re mandŭg kan TUHAN re ngukum bara pinguasa di rangit samŭn bara pimritah di ong.

²²Tapa nguruk bara raja mun bara daya-takap dog nguruk darŭm rubang. Ayŭh re ngabŭt ngara darŭm jer ndŭg ka andu adi ngga ngara dog ukum mbŭh mandŭg.

²³Buran re karŭm, ka batŭh andu re dŭh tia nyekar, amai TUHAN Bisa-pŭrŭg re jadi raja. Ayŭh re mritah Jerusalem ngga Sandah Zion, ka bara pinguru daya re kiris bragah-I.