Read Biatah Bidayuh ISAIAH 25 Bible Online

ISAIAH 25 - Biatah Bidayuh bible

ISAIAH 25

¹TUHAN Kaam Tapa ku; Aku re kibās Kaam ka muji adŭn Mai. Kaam mbŭh ndai pingandai bās; Kaam mbŭh ngatur kayuh so jah ka mbŭh pijadi-i ngga atin tŭtŭd.

²Kaam mbŭh nyirubuh kupo kupo ka pirabur kuta kuta. Istana adi pinganyu ami pijog mbŭh manyap adu adu.

³Daya so bangsa bangsa adi bikuasa re muji Kaam; Kaam re dog taru di kupo kupo bangsa adi gaok.

⁴Daya sirata ngga daya rumuh mbŭh bu tudu Kaam ka mbŭh siramat di tika pinyusah. Kaam grindung ngara so sabak ribut ka grindung ngara so paras sura. Pinganyu adi gaok nyerang mun sabak ribut di tipuh madud,[33]

⁵mun raga di tarun tana badŭh. Pak Kaam, TUHAN, mbŭh bada pinganyu ami pajam; Kaam bada sirais daya gaok pajam, keya ka abun kadud andu adi paras.

⁶Digiti di Sandah Zion TUHAN Bisa-pŭrŭg re sidia gawai yŭn sopŭrŭg bangsa di ong; gawai man pinguman adi grua ka nok wain adi siabo kana.

⁷Digiti Ayŭh re kadi kruman pinyusah adi tian-ti mbŭh nyayung sopŭrŭg bangsa.

⁸ TUHAN Raja re siŭ pinyikabŭs ndŭg situi tui! Ayŭh re ngutos randang batŭh so batŭh barang naan daya, ka kadi mangŭh adi daya-I kinyam di ndi ong ong. Adŭp TUHAN mbŭh minyu!

⁹Kan anŭ mbŭh jadi, barang naan re nang, “Ayŭh Tapa ta! Ata mbŭh na pinyabah ta di Ayŭh, ka Ayŭh mbŭh nyiramat ata. Ayŭh TUHAN! Ata mbŭh na pinyabah ta di Ayŭh, ka madin ata mbŭh gaŭn pawŭn sabab Ayŭh mbŭh nyiramat ata.”

¹⁰ TUHAN re grindung Sandah Zion, pak daya Moab re dog digang, keya ka siriyang dog digang di tarun yŭn adi kais.

¹¹Ngara re ton tangan mun adi re biranang, pak Tapa re pimangŭh ngara, ka tangan ngara re timŭtŭm ngga dŭh bigaya.

¹²Ayŭh re pirabur kuta Moab ngga sindung sindung-i adi bigatung ka pirubuh-i bada asur jadi dabu.