Read Biatah Bidayuh ISAIAH 28 Bible Online

ISAIAH 28 - Biatah Bidayuh bible

ISAIAH 28

¹Mŭmbŭh inŭh pritah Israel! Bragah-i asab keya ka makota rarak bunga di ubak pinguru pinguru adi mabuk. Anŭ inŭh adi ngara ngangŭn ka na wangi dieh, pak ngara guring mabuk ka dŭh rada ani ani.

²TUHAN biyŭn daya adi bake ka adi bikuasa mbŭh-I sidia bada nyerang ngara, daya anŭ re mandŭg mun ujen batuh, mun ujen adi raru bangat, mun uba adi nyarab ka muba ndi tarun tana.

³Udip mingangŭn bara pinguru adi pimabuk anŭ re dog digang ngga pura kaja.

⁴Bragah bara pinguru adi mingangŭn anŭ re miyap mun sibungas buwa ara adi masak diŭ so tipuh-i; dog kiris daya, ka rasu dog tambit ka dog man.

⁵Andu-i re mandŭg kan TUHAN Bisa-pŭrŭg re keya ka bragah makota rarak bunga yŭn bara daya-I adi siramat.

⁶Ayŭh re nggen urah adi tŭnggŭn yŭn bara akim, ka atin pagan di ngara adi ngibān tiban-bās kupo so dog nyerang.

⁷Bara nabi ngga bara imam mbŭh raru mabuk ndŭg ka mbŭh tibabeu. Ngara nok raru bagŭ wain ngga arak ka sikak sikakong amai pikir-i mbŭh manyap. Bara nabi mbŭh raru mabuk ka dŭh tungang mirati kayuh adi keya ka darŭm pŭmŭh adi Tapa nggen, ka bara imam mbŭh raru mabuk ka dŭh tungang ngatur har adi dog taban ka yŭn ngara.

⁸Mija ngara puno ngga uta, ka mating tapo adi bisig.

⁹Ngara mingungut pasar aku. Ngara nang, “Daya anŭ pikir adŭp-i ngajar asi? Asi biguna di ajar-i? Ajar-i anŭ kana yŭn anak-sŭ adi muran pasan sisuh!

¹⁰Ayŭh suba an ngajar batŭh turis ati batŭh turis anŭ, buwa pinganang ati buwa pinganang anŭ, tŭngŭn ajar ati tŭngŭn ajar anŭ.”

¹¹ Kambŭi angān abah dingah aku, Tapa re pait daya tami bada ngajar angān pakai piminyu saruh.

¹²Ayŭh nggen rŭŭ-paya ngga saduh di sopŭrŭg ngan, pak angān abah dingah Ayŭh.

¹³Anŭ inŭh sabab TUHAN re ngajar angān batŭh turis ati batŭh turis anŭ, buwa pinganang ati buwa pinganang anŭ, tŭngŭn ajar ati tŭngŭn ajar anŭ. Komŭnŭ darŭm angān panu angān re sikak ka rabu ndŭg ka tawan, dog jarat, ka dog nakap.

¹⁴Madin angān adi gambung adi mritah daya di Jerusalem, dingah kayuh adi TUHAN nang.

¹⁵Angān ngangŭn adŭp ngan mbŭh ndai simanya ngga pinyikabŭs ka ndai janji ngga ong daya adi mbŭh kabŭs. Angān nang adŭp ngan tatu re dŭh dog nyatŭk pinyusah kan-i mandŭg, sabab angān bisangan di pinganang kadong ngga tipu ngga nyiramat adŭp ngan.

¹⁶ Pak ati inŭh pinganang TUHAN Raja: “Aku na di Zion ndi pimŭnŭs adi tagap ka bake. Darŭm-i Aku na batuh pinagap adi agi dog nuris dieh pinganang, ‘Pinyabah adi tagap agi tŭtŭd gŭh.’

¹⁷Pinyitŭnggŭn re jadi taris pingŭkŭd yŭn pimŭnŭs, ka atin jujur re jadi prambap-i.” Ujen batuh re pisen sopŭrŭg pinganang kadong ngan adi yŭn angān bisangan, ka uba re nyirubuh tarun yŭn angān grindung adŭp ngan.

¹⁸Simanya adi angān mbŭh ndai ngga pinyikabŭs ka janji adi angān mbŭh ndai ngga ong daya adi mbŭh kabŭs re dog kinating. Kan pinyirusag nyarab, angān re dog ngapuh.

¹⁹Barang isan ayŭh re nyarab angān, ka sandu ngga singarŭm angān re nyijŭn-i. Angān re kimŭtŭr taru kan angān dingah agah so Tapa.

²⁰Angān re keya ka daya anŭ darŭm pinganang pitas, adi suba bŭŭs di tunduh pangō adi purok re-i yŭn nŭnggŭn adŭp-i, ka putong adi paŭh siit re-i ngga sitabun.

²¹ TUHAN re makat di Darŭd Perazim ka di rubān Gibeon nimun adi mbŭh, amai re ndai kayuh adi raan-I ndai, sunggu-i kayuh adi raru saruh. Ayŭh re ngamas-i, kraja pingandai-I adi tŭrŭp rusia-i.

²²Dŭhnyah tawŭh pinyibakan ku ati! Kambŭi angān dŭh mbit bat, re rabis mbar-i angān pirupas adŭp ngan. Aku mbŭh dingah TUHAN Bisa-pŭrŭg mbŭh natu adŭp-I re pirabur ndi tarun tarun tana rais.

²³Dingah kayuh adi aku nang; mbit bat kayuh adi aku kidaan di angān.

²⁴Mating daya adi birŭmŭh adu adu majak tana ka sidia-i yŭn nyipurun.

²⁵Kan ayŭh mbŭh sidia tana-i, ayŭh nabur ruwang rapah mun adar manis ka jintan. Ayŭh purun bada bijari gandom ngga jeri,[39] ka di bŭngŭn ŭmŭh-i ayŭh purun ruwang kayuh bŭkŭn.

²⁶Ayŭh puan munki ndai kraja, sabab Tapa mbŭh ngajar ayŭh.

²⁷Ayŭh bŭn pakai pukong adi bat ngga pŭh ruwang adar manis ngga ruwang jintan. Ayŭh pakai anak kayuh adi jangan ka adi sadang mati-i.

²⁸Ayŭh dŭh adu adu ngiik gandom ndŭg ka ga-i rusak, ka ayŭh puan munki ngiik pakai krita adi main tarik di tunduh ruwang pak dŭh pirusak ga-i.

²⁹Sopŭrŭg pinyibijak anŭ mandŭg so TUHAN Bisa-pŭrŭg. Atur adi Tapa ndai taŭn bijak buang ari mujur!