Read Biatah Bidayuh ISAIAH 30 Bible Online

ISAIAH 30 - Biatah Bidayuh bible

ISAIAH 30

¹TUHAN mbŭh minyu: “Mbŭh payah inŭh ngara adi mritah Judah sabab ngara rawan Aku. Ngara tunda atur adi Aku dŭh ndai, ka na tandā-tangan di pekat-damai adi rawan pinyiraan Ku, ngga bada dosa ngara bitimbun.

²Ngara di ka Egypt mite turung dŭh so ka pinyitayan Ku. Ngara raan Egypt grindung ngara, jadi ngara na pinyabah ngara di raja Egypt.

³Pak raja anŭ dŭh sukup bikuasa re turung ngara, ka pinŭbŭn pinyigrindung anŭ inŭh pinyirusag.

⁴Sunggu pingarun pingarun ngara mbŭh ndŭg kupo Zoan ngga kupo Hanes,

⁵daya Judah nyesar adŭp-i sabah bangsa adi dŭh bisa dog sabah anŭ, bangsa adi dŭh turung ngara kan ngara mite turung.”

⁶Ati inŭh agah so Tapa pasar dāng di parad siratan tarun tana-pajam: “Pingarun pingarun panu mutas rais adi yŭn pinyusah bisa timbur, di yŭn singah rŭŭ ka agi dudu jippŭh ngga naga adi bisa mikabur. Ngara na pinganggen adi brega di tunduh kaldi ngga onta an ngara taban ka bangsa adi dŭh dapŭd turung ngara.

⁷Pinurung adi Egypt nggen inŭh dŭh biguna. Jadi Aku mbŭh naret Egypt, ‘Naga Dŭh Bisā’. ”

⁸Tapa kidaan di aku bada nuris darŭm surat arap bara daya ati, isa agi dog nyikŭn pasar munki masam arap-i ngara.

⁹Ngara ari rawan Tapa, ari kadong, ari abah dingah ajar TUHAN.

¹⁰Ngara bada bara nabi pajam. Ngara nang, “Dŭhnyah minyu ngga kieh pasar kayuh adi batur. Kidaan di kieh kayuh adi raan kieh dingah, biar-i kayuh adi au-tarun.

¹¹Bu so aran ami ka dŭhnyah matŭn kieh. Kieh abah dingah pasar Tapa Israel, adi Tapa kudus mu.”

¹²Pak ati inŭh kayuh adi Tapa kudus Israel nang: “Angān nyibireu kayuh adi Aku kidaan di angān ka bisangan di pingandai ganas ngga tipu.

¹³Angān mbŭh sarah. Angān mbŭh keya ka sindung adi bigatung adi mbŭh murang so sambu ndŭg sagan-i; angān re gŭgŭh tumbang.

¹⁴Angān re papar mun priok tana, randŭk ndŭg ka mating adi sadang mati-i ngga tambit bam apui, puan kah ngga nyauk piin so darŭm tipayan.”

¹⁵TUHAN Raja, Tapa kudus Israel, nang di daya-I, “Pari ka Aku ka sabah di Aku ngga atin sanang. Angān re dog nyibake ka re siramat.” Pak angān abah!

¹⁶Gŭt angān bisatur an pirupas adŭp ngan pakai kuda adi raju bikaduh. Sawŭ bikaduh bu inŭh angān patut! Angān pikir kuda ngan sukup raju, pak ngara adi tadak angān re rabis raju!

¹⁷Siribu naan angān re bikaduh bu kan angān kiris ndi naan soldadu pinganyu, ka rimŭh naan soldadu sadang gŭh ngga bada sopŭrŭg ngan bikaduh bu. Mating so bara tibaran soldadu ngan re dŭm, adŭ-i ndi tan binira di tibung sandah!

¹⁸Pak TUHAN taŭn-i kajŭn tika-I masi di angān. Ayŭh mbŭh sidia an masi di angān sabab Ayŭh taŭn ari ndai kayuh adi batur. Sanang inŭh ngara adi na pinyabah ngara di TUHAN.

¹⁹Angān adi rŭŭ di Jerusalem re dŭh tia muās. TUHAN taŭn-I masi, ka kan angān mite turung so Ayŭh, Ayŭh re nam angān.

²⁰TUHAN re nggen di angān pisuba adi raru bat, pak adŭp-I re agi ngga angān ka ngajar angān. Angān re dŭh tia jiroh Ayŭh.

²¹Kambŭi angān miriseu so aran di ka tauh puan kah di ka bait, angān re dingah sirŭŭn-I di punok ngan nang, “Ta digiti aran. Kadŭg-i.”

²²Angān re tambit tibudo ngan adi dog marut ngga pirak ka adi dog marut ngga mas, ka taran-i mun taran kayuh adi kais. Angān nang, “Bu so aku!”

²³Kan angān nabur bine, TUHAN re nggen ujen isa-i timbu ka buān bagŭ buwa, ka yŭn dāng kudip ngan re bagŭ tarun tana kupai.

²⁴Sapi ngga kaldi adi majak tana ŭmŭh ngan re man pinguman adi siabo kana.

²⁵Di andu kuta kuta pinganyu ngan rubuh ka bara daya-i dog siŭ, anak anak sungi re aman so barang darŭd ngga sandah.

²⁶Buran re jawa mun batŭh andu, ka batŭh andu re pikuju kari jawa so adi mbŭh, mun jawa ju andu dog nyekar ndi sidah. Sopŭrŭg kayuh anŭ re jadi kan TUHAN marut ka pibua tawan adi-I mbŭh ndai di daya-I.

²⁷Kuasa ngga bragah TUHAN dapŭd dog kiris so jo. Apui ngga asuh kiren baji-I. Ayŭh minyu, ka buwa piminyu-I sakŭt mun apui.

²⁸Ayŭh pait sabak di jawin-I mun uba adi taban sopŭrŭg kayuh ngga bu. Sabak anŭ pirabur bangsa bangsa ka pirŭŭ atur kraja pingandai arap ngara.

²⁹Pak angān, adi daya Tapa, re gaŭn ka biragu nimun di ngarŭm gawai adat. Angān re pawŭn nimun ngara adi panu ngga jawŭn ragu dog mambak ngga tirari di aran nuju Ramin TUHAN, adi pingibān Israel.

³⁰TUHAN re bada sopŭrŭg daya dingah sirŭŭn-I adi bikuasa ka kinyam bisā baji-I. Re agi jireb jireb apui, dudū, ujen batuh, ka ujen adi bangat.

³¹Daya Assyria re taru kan ngara dingah sirŭŭn TUHAN ka kinyam ukum-I adi raru bat.

³²Darŭm TUHAN pari pari mukong ngara, daya-I re birajang tunda jawŭn gendang ngga kachapi. Adŭp Tapa re rawan daya Assyria.

³³Ndun jah agi ndi tarun yŭn muko dog sidia yŭn badang raja-empaya Assyria. Tarun yŭn anŭ tŭrŭp ka bayah ka puno ngga tugung uwang ungon. TUHAN re ngasŭng ka piruah jireb apui ngga badang tugung uwang ungon anŭ.