Read Biatah Bidayuh ISAIAH 32 Bible Online

ISAIAH 32 - Biatah Bidayuh bible

ISAIAH 32

¹Re agi raja adi mritah ngga pinŭnggŭn, ka pinguru pinguru bangsa adi mritah ngga pinyitŭnggŭn.

²Barang naan ngara re keya ka pinyigrindung so sabak, ka tarun yŭn bisukan so sabak ribut. Ngara re jadi keya ka anak anak sungi adi aman di tarun tana-pajam, mun singangi tibande batuh di tarun tana-matung.

³Batŭh ngga kajit ngara re ari tikuka ngga ngatin kayuh adi rayat raan biyŭn.

⁴Ngara re dŭh tia girungos ndai kayuh, pak ngara re ndai kayuh ngga pinyimirati ka re nang kayuh ngga timatŭk.

⁵Daya budo re dŭh dog kadŭn daya adi dog stabi, ka daya pinipu re dŭh dog kadŭn jujur.

⁶Daya budo piruah pinganang budo ka bisatur an ndai kayuh adi arap. Kayuh adi ngara ndai ka kayuh adi ngara nang inŭh kayuh adi nggen mangŭh di TUHAN, ka ngara bŭn nggen man di daya adi sibŭrŭk bait nggen nok di daya adi badŭh asŭng.

⁷Daya adi sipadin inŭh daya adi arap, ka-i ndai kayuh adi arap; ayŭh bipekat an nipu daya sirata ngga pinganang kadong ka matŭn ngara dapŭd hak ngara.

⁸Pak daya adi dog stabi ndai kayuh ngga atin batur ka bijijŭ yŭn kayuh adi batur.

⁹Angān bara dayung adi udip sanang, mating kayuh adi yŭn ngan gapang, dingah kayuh adi aku nang.

¹⁰Angān bisa puas asŭng madin, pak di tika ati sawa bauh angān re susah amai re mating buwa anggor re ngan ndu.

¹¹Angān mbŭh udip sanang, mating kayuh adi yŭn ngan gapang; pak madin, kimŭtŭr meh ngga taru! Pirukos piraka ngan ka mŭŭng banang guni di kupong ngan.

¹²Nupap sudo ngan darŭm susah sabab tana ŭmŭh ngan adi damŭn ngga teya anggor ngan mbŭh dog pirusak,

¹³ka bakah pireja ngga tŭngŭn reja mbŭh timbu di tana daya ku. Muās yŭn sopŭrŭg ramin adi yun daya gaŭn ka kupo adi yŭn pawŭn.

¹⁴Sirabi ka istana re dog tagan ka sindŭ kupo re mating daya dieh. Ramin ramin ngga dudu kuta adi grindung ngara re adu adu jadi tibawang. Kaldi tarun re bidandong diginŭ, ka biri re dapŭd tarun tana kupai diginŭ.

¹⁵Pak dŭm ndi sidah dinge Tapa re mandŭg ngga kuasa-I. Tana adi matung re damŭn, ka tana ŭmŭh re piruah bagŭ buwa pimuruh.

¹⁶Di barang yŭn pinŭnggŭn ngga pinyitŭnggŭn re dog pimanu.

¹⁷Sabab barang naan daya re ndai kayuh adi batur, re agi udip darŭm damai ka ngga siramat ndŭg situi tui.

¹⁸Daya Tapa re dŭh tia gapang, ka ramin arŭn ngara re bamai buang siramat,

¹⁹sunggu tuān re dog nyatŭk ujen batuh ka kupo re rubuh ka asur.

²⁰Sanang inŭh barang naan daya re, amai bagŭ piin yŭn pimuruh ka agi tarun tana kupai di barang yŭn adi siramat yŭn kaldi ngga sapi.