Read Biatah Bidayuh ISAIAH 34 Bible Online

ISAIAH 34 - Biatah Bidayuh bible

ISAIAH 34

¹Mandŭg, daya so sopŭrŭg bangsa! Tikuruk meh ka dingah. Isa ndi ong ong ka barang naan daya adi udip dieh mandŭg kamati ka dingah.

²TUHAN inŭh baji di sopŭrŭg bangsa ka di bara tibaran soldadu-i. Ayŭh re ngukum ka pirusag ngara.

³Tadang ngara re dŭh dog kubur, pak re prigure diginŭ ka buuh madam; ka darŭd darŭd re bireh ngga deya.

⁴ Batŭh andu, buran, ka bitang bitang re asur jadi dabu. Rangit re miyap mun surat-barun dog marun, ka bitang bitang re rabu mun dawŭn ruruh so tŭngŭn anggor bait tŭngŭn ara.

⁵ TUHAN mbŭh sidia pedang-I di shorga, ka madin pedang anŭ re japa Edom, ngara adi-I re ngukum ka adi re dog pirusag.

⁶Pedang-I re bitameg da deya ngga ramak ngara, mun deya ngga ramak anak biri ngga kambing adi dog nyadis. TUHAN re jugan sadis anŭ di kupo Bozrah; Ayŭh re pijadi bisaad adi bisā di tarun tana Edom.

⁷Daya re kabŭs mun sapi tarun ka sapi adi mara, ka tana re bireh ngga deya ka puno ngga ramak.

⁸Anŭ inŭh tika adi ngga TUHAN re nyiramat Zion ka maras dendam di bara pinganyu-i.

⁹Yang Edom re marui jadi tar, tana re marui jadi mirirang. Ndi tarun tarun tana rais re sau mun tar.

¹⁰Sandu ngga singarŭm tar anŭ re sau, ka asuh re bijambung so dieh ndŭg situi tui. Tarun tana re dog tagan ndŭg ka matung so turap ndi ndŭg turap andi, ka mating daya re panu mutas-i tia.

¹¹Manuk bo ngga manuk kak re rŭŭ di tarun tana anŭ. TUHAN re bada-i pari mun tana au-tarun nimun anŭ adi sibayuh-i dog napa.

¹²Re mating raja mritah di rais anŭ, ka sopŭrŭg pinguru re miyap.[42]

¹³Tŭngŭn reja ngga uduh pedang re timbu di sopŭrŭg istana ngga kupo adi dog nyindung, ka kasong tarun ngga bo re rŭŭ diginŭ.

¹⁴Dāng tarun re bidandong diginŭ, ka umot re bagan dingan-i. Ka mindo singarŭm[43] re mandŭg kamanŭ jiroh tarun yŭn rŭŭ.

¹⁵Manuk bo re ndai sarin-i, minuroh, ka mupus turoh-i, ka sita anak-i diginŭ. Manuk volcha re bigati gati tikuruk diginŭ.

¹⁶Jiroh darŭm surat TUHAN pasar dāng adi udip ka basa kayuh adi nang-i. Ndi mating gŭh dāng anŭ re manyap, ka ndi mating gŭh re dŭh biyŭn apid-i. TUHAN mbŭh pesan ngara bada simŭnŭ; adŭp-I re nguruk sopŭrŭg ngara.

¹⁷TUHAN inŭh adi re kutung tarun tana yŭn ngara ka nggen di barang pŭrŭng ndi utung. Ngara re adu adu rŭŭ di tarun tana anŭ, so turap ndi ndŭg turap andi.