Read Biatah Bidayuh ISAIAH 36 Bible Online

ISAIAH 36 - Biatah Bidayuh bible

ISAIAH 36

¹Di sawa adi simŭng pat darŭm pinyipritah Hezekiah adi raja Judah, Sennacherib, adi raja-empaya Assyria, nyerang kupo kupo Judah adi bikuta ka sirabut-i.

²Komŭnŭ ayŭh nggen ukum bada pingubak soldadu-i adi siabo bās pangkat-i matak so Lachish di ka Jerusalem ngga ndi bara tibaran bās soldadu di takan Raja Hezekiah bada nyerah adŭp-i. Pingubak soldadu anŭ rŭŭ di aran di yŭn bara tukang banang nyiraja, sindŭk aran-piin adi so piin aman so pagong di sijo.

³Taruh naan daya Judah ruah di bidapŭd ngga ayŭh: daya adi tukang kingat kayuh di istana, Eliakim anak Hilkiah; daya adi tukang pinuris, Shebna; ka daya adi tukang jaga rekod, Joah anak Asaph.

⁴Pingubak soldadu daya Assyria anŭ kidaan di ngara nang raja-empaya raan puan ani anŭ adi bada Raja Hezekiah dŭh biyŭn atin taru.

⁵Raja Assyria an puan, “Agi kah angān pikir pinganang dapŭd gati pimandai ngga pinyibake bara soldadu? Asi di pikir ngan re an turung angān rawan Assyria?

⁶ Angān harap Egypt re an turung angān, pak anŭ re keya ka pakai tŭngŭn reed ndu sikud. Anŭ re pata ka tabŭk tangan ngan. Mun anŭ inŭh raja Egypt kan daya bisangan di ayŭh.”

⁷Pingubak soldadu daya Assyria nang dinge, “Puan kah angān re nang adŭp ngan bisangan di TUHAN adi Tapa ngan? Bari-sambah ngga mija mija-sambah TUHAN inŭh adi Hezekiah muko nyirubuh, kan ayŭh kidaan di bara daya Judah ngga Jerusalem bada bisambah di ndi mija-sambah di Jerusalem adŭ.

⁸Aku an bitawar ngga angān ngga dŭn raja-empaya Assyria. Aku re nggen di angān duwŭh ribu kuda kambŭi angān tungang dapŭd kiang anŭ pinunggang bada nunggang-i!

⁹Pingubak soldadu Assyria adi siabo sŭ pangkat-i dŭh gŭh angān re tungang rawan, makat ka angān harap daya Egypt pait ka angān krita krita kuda ngga dudu soldadu pinunggang kuda!

¹⁰Angān pikir aku nyerang ka pirabur rais ngan dŭh so dog turung TUHAN kah? Adŭp TUHAN inŭh adi bada aku nyerang ka pirabur-i.”

¹¹Komŭnŭ Eliakim, Shebna, ngga Joah nang di pingubak soldadu anŭ, “Minyu piminyu Aram ngga kieh. Kieh mirati piminyu anŭ. Dŭhnyah minyu pakai piminyu Hebrew amai sopŭrŭg daya adi di sambu sindung mirati-i.”

¹²Ayŭh nam, “Angān pikir raja-empaya Assyria pait aku bada minyu ngga angān ka ngga raja ngan adŭ kah? Dŭh, aku minyu ngga ngara adi guru di sambu sindung anŭ ani, adi re man tadang adŭp-i ka nok kasing adŭp-i, mun adŭp ngan gŭh re.”

¹³Komŭnŭ pingubak soldadu anŭ nyirais minyu darŭm piminyu Hebrew, “Dingah kayuh adi raja Assyria nang di angān.

¹⁴Ayŭh bakan angān bada dŭh tandah Hezekiah nipu angān. Hezekiah dŭh dapŭd nyiramat angān.

¹⁵Ka dŭhnyah tandah ayŭh mujuk angān bada bisangan di TUHAN. Dŭhnyah pikir TUHAN re nyiramat angān, ka pirŭŭ bara tibaran soldadu Assyria so sirabut kupo ngan.

¹⁶Dŭhnyah dingah Hezekiah! Raja Assyria mritah angān bada ruah so kupo ka nyerah adŭp ngan. Sopŭrŭg ngan re dog nyibandar man buwa anggor so tŭngŭn anggor adŭp ngan, ka man buwa ara so tŭngŭn ara adŭp ngan, ka nok piin so prigi adŭp ngan,

¹⁷ndŭg ka raja Assyria mbŭh bada angān rŭŭ di rais adi batur mun tung jangān, adi agi teya anggor so angān dapŭd wain ka agi gandom ngga ndai ruti.

¹⁸Dŭhnyah tandah Hezekiah nyibudo angān nang TUHAN re nyiramat angān. Agi kah tapa tapa bangsa bŭkŭn nyiramat rais ngara so raja Assyria?

¹⁹Diki meh ngara madin, tapa Hamath ngga tapa Arpad? Diki tapa Sepharvaim? Agi kah adi mbŭh nyiramat Samaria?

²⁰Mbŭh kah tapa tapa sopŭrŭg rais anŭ nyiramat rais ngara so raja Assyria? Jadi ani meh bada angān pikir TUHAN dapŭd nyiramat Jerusalem?”

²¹Bara daya bagŭ pajam, amai Raja Hezekiah mbŭh bada ngara pajam; ngara dŭh nang ani ani.

²²Komŭnŭ Eliakim, Shebna, ka Joah nyiratak piraka ngara darŭm susah. Ngara di ka yŭn raja di kidaan kayuh adi pingubak soldadu daya Assyria mbŭh nang.