Read Biatah Bidayuh ISAIAH 37 Bible Online

ISAIAH 37 - Biatah Bidayuh bible

ISAIAH 37

¹Kan Raja Hezekiah dingah pinyiripot ngara, ayŭh nyiratak piraka-i darŭm susah, kasŭk banang guni, rasu di ka Ramin TUHAN.

²Ayŭh pait Eliakim, adi tukang kingat kayuh di istana, Shebna, adi tukang pinuris, ka imam imam adi tuuh, bada di ka yŭn nabi Isaiah anak Amoz. Ngara gŭh nēn banang guni.

³Ati inŭh pinganang adi-i bada ngara taban ka Isaiah: “Ati inŭh andu sangsara; ata mbŭh dog ukum ka dog pimangŭh. Ata mbŭh keya ka dayung adi mbŭh re biranak, pak dŭh dapŭd biranak amai mbŭh raru ramah.

⁴Raja-empaya Assyria mbŭh pait pingubak soldadu-i adi siabo bās pangkat-i bada ngamun Tapa adi udip. Isa-i TUHAN adi Tapa mai dingah pinganang ngamun anŭ ka ngukum ngara adi nang-i. Jadi bidua ka Tapa yŭn daya ta adi gibabŭ udip.”

⁵Kan Isaiah trima pinganang so Raja Hezekiah,

⁶ayŭh pait pinyinam-i sakati: “TUHAN kidaan di kuu bada dŭhnyah tandah daya Assyria pirawan kuu ngga pinganang ngara adi nang Ayŭh dŭh dapŭd nyiramat kuu.

⁷TUHAN re bada raja-empaya dingah agah-sabak adi re bada ayŭh bu pari ka rais adŭp-i, ka TUHAN re bada ayŭh dog siŭ diginŭ.”

⁸Pingubak soldadu Assyria dingah raja-empaya mbŭh bu so Lachish ka mbŭh biperang rawan kupo Libnah adi dŭh jo so nŭ; jadi ayŭh di kamanŭ ka bisiken ngga ayŭh.

⁹Agah mbŭh ndŭg daya Assyria nang bara tibaran soldadu Egypt, dog nguru Raja Tirhakah so Ethiopia, mbŭh mandŭg di nyerang ngara. Kan raja-empaya dingah, ayŭh pait surat ka Raja Hezekiah

¹⁰di Judah, nang di ayŭh, “Tapa adi kuu sabah mbŭh kidaan di kuu nang kuu dŭh re rabu ka darŭm tangan ku, pak dŭhnyah bada adŭp mu dog nipu pinganang anŭ.

¹¹Kuu mbŭh dingah kayuh adi raja-empaya Assyria mbŭh ndai di tadŭ rais adi an-i pirabur. Kuu pikir adŭp mu dapŭd pirupas adŭp mu kah?

¹²Tayung-babuk ku mbŭh pirabur kupo Gozan, kupo Haran, ngga kupo Rezeph, ka siŭ daya Betheden adi rŭŭ di Telassar, ka ndi mating gŭh tapa ngara dapŭd nyiramat ngara.

¹³Diki meh raja raja kupo Hamath, kupo Arpad, kupo Sepharvaim, kupo Hena, ka kupo Iwah?”

¹⁴Raja Hezekiah tambit surat anŭ so bara pinyisung anŭ ka basa-i. Komŭnŭ ayŭh di ka Ramin TUHAN, na surat anŭ diginŭ di sirung jawin TUHAN,

¹⁶ “TUHAN Bisa-pŭrŭg, adi Tapa Israel, Kaam adi guru bitakta di tunduh cherubim, Kaam sadi adŭ Tapa, mritah sopŭrŭg pritah di ong. Kaam napa ong ngga rangit.

¹⁷Madin TUHAN, dingah kieh ka tingga kayuh adi mbŭh jadi di kieh. Dingah sopŭrŭg kayuh adi Sennacherib nang ngga pimangŭh Kaam, Tapa adi udip.

¹⁸Sopŭrŭg kieh puan, TUHAN, nang raja raja-empaya Assyria mbŭh pirabur bagŭ bangsa, ka pirabur rais ngara,

¹⁹ka badang tapa tapa ngara -- adi tapa au-tarun, adi kaŭs-i gayŭn dog ndai ngga tangan manusia so kayuh ngga batuh.

²⁰Madin, TUHAN adi Tapa ami, nyiramat kieh so daya Assyria, isa sopŭrŭg bangsa di ong puan nang Kaam sadi adŭ adi Tapa.”

²¹Komŭnŭ Isaiah pait pinganang ka Raja Hezekiah, kidaan pinyinam yŭn dua-i,

²²TUHAN mbŭh nang, “Kupo Jerusalem tawŭh kuu, Sennacherib, ka ngamun kuu.

²³Asi sŭn mu nang adi kuu ngamun ka napat? Kuu mbŭh dŭh biradat di Aku, adi Tapa kudus Israel.

²⁴Kuu pait bara pinurung mu bada minyu gambung di Aku nang ngga krita krita kuda mu kuu mbŭh ngarah darŭd Lebanon adi siabo bigatung. Kuu ngangŭn adŭp mu diginŭ mbŭh tabŭng tŭngŭn sedar adi siabo bigatung ka tŭngŭn sipres adi siabo kana, ka kuu nang adŭp mu mbŭh tambus ruang tuān anŭ.

²⁵Kuu ngangŭn adŭp mu mbŭh kareh prigi ka nok piin di tarun tana tami, ka kaja bara soldadu mu mbŭh bidigang bada badŭh Yang Nile.

²⁶“Bŭn kah kuu dingah Aku adi mbŭh ngatur sopŭrŭg kayuh anŭ ndun jah? Ka madin Aku mbŭh ndai-i. Aku nggen di kuu kuasa ngga nyirubuh kupo kupo adi bikuta bada jadi tugung rapuh batuh.

²⁷Daya adi rŭŭ diginŭ dŭh dapŭd ndai ani ani; ngara mbŭh taru buang dŭh dapŭd nang ani ani. Ngara mbŭh keya ka kupai di pakan puan kah uduh adi timbu di tibung ramin kan sabak paras so timor poh maka-i.[45]

²⁸“Pak Aku puan sopŭrŭg kayuh pasar kuu, kayuh adi kuu ndai ka kamaki kuu panu. Aku puan munki kuu magā rawan Aku.

²⁹Aku mbŭh dingah pasar baji mu anŭ samŭn uap-sambuh mu, ka madin Aku re na sikait di undung mu ka basi-gŭngŭm di baba mu ka re tarik kuu pari kadŭg aran adi so kuu mandŭg.”

³⁰Komŭnŭ Isaiah nang di Raja Hezekiah, “Ati inŭh tandā kayuh adi re jadi. Sawa ati ngga sawa adi re kuu re man gandom adi timbu sadi-i, pak sawa adi re kuu re tungang purun gandom mu ka ngatŭm buwa-i, ka ndai teya anggor ka man buwa anggor.

³¹Ngara di Judah adi babŭ udip re keya ka anak kayuh-udip adi piruat tŭrŭp ka piruah buwa.

³²Re agi daya di Jerusalem ka di Sandah Zion adi babŭ udip, sabab TUHAN Bisa-pŭrŭg mbŭh natu-i bada jadi simŭnŭ.

³³“Ati inŭh kayuh adi TUHAN mbŭh nang pasar raja-empaya Assyria: ‘Ayŭh dŭh re mŭrŭt kupo Jerusalem bait nimbak ndi reja-panah ka darŭm-i. Soldadu adi pakai pinangin dŭh re dapŭd nyindŭk kupo ati. Mating tana re dog nugung ngga nyikapung-i.

³⁴Ayŭh re pari kadŭg aran adi so-i mandŭg, dŭh jadi mŭrŭt kupo ati. Aku, adi TUHAN, mbŭh minyu.

³⁵Aku re ngibān kupo ati ka grindung-i, yŭn kana bragah adŭp Ku ka sabab janji adi Aku mbŭh ndai ngga urun Ku David.’ ”

³⁶Malaikat TUHAN di ka tarun yŭn bara daya Assyria bibari ka siŭ 185,000 naan soldadu. Ngga isan isan andu jawa ndi ngara mbŭh abo kabŭs!

³⁷Komŭnŭ Sennacherib adi raja-empaya Assyria ngundur ka pari ka Nineveh.

³⁸Di ndi andu kan ayŭh bisambah di bari-sambah tapa-i Nisroch, duwŭh madis anak dari-i Adrammelech ngga Sharezer, siŭ ayŭh ngga pedang ka rasu bu ka tarun tana Ararat. Ndi naan anak dari-i adi bŭkŭn, Esarhaddon, gati ayŭh jadi raja-empaya.