Read Biatah Bidayuh ISAIAH 38 Bible Online

ISAIAH 38 - Biatah Bidayuh bible

ISAIAH 38

¹Kira ka di tika anŭ Raja Hezekiah mandam ka mbŭh sindŭk re kabŭs. Nabi Isaiah anak Amoz di ka yŭn-i ka nang di ayŭh, “TUHAN nang di kuu bada kuu nakit ngatur kayuh sabab kuu dŭh re bua. Sidia adŭp mu re kabŭs.”

²Hezekiah bigiring nura sindung ka bidua:

³“Ingat, TUHAN, aku mbŭh bituan di Kaam ngga tŭtŭd ka ngga siabo atin ku, ka aku mbŭh ari ndai kayuh adi Kaam raan aku ndai.” Ka ayŭh nyisakuk sien.

⁴Komŭnŭ TUHAN bada Isaiah

⁵pari ka yŭn Hezekiah ka nang di ayŭh, “Aku, adi TUHAN, adi Tapa tayung-babuk mu, mbŭh dingah dua mu ka kiris randang batŭh mu; Aku re bada kuu udip ndŭg simŭng rimŭh sawa dinge.

⁶Aku re nyiramat kuu ngga kupo Jerusalem so raja-empaya Assyria, ka Aku re babŭ grindung kupo ati.”

⁷Isaiah nang, “TUHAN re nggen di kuu ndi tandā ngga kiren Ayŭh re ingat janji-I.

⁸Di tungoh adi dog ndai Raja Ahaz, TUHAN re bada singangi sikanang simŭng subang.” Ka singangi anŭ sikanang simŭng subang.[46]

⁹Ripas Hezekiah mbŭh bua so andam, ayŭh nuris ragu puji ati:

¹⁰Aku pikir darŭm umbur ku gi-piaŭn aku re matak ka ong daya adi mbŭh kabŭs, dŭh re udip ndŭg ka aku mbŭh minyamba.

¹¹Aku pikir di ong daya adi udip aku re dŭh tia kiris TUHAN bait tadŭ daya adi udip.

¹²Udip ku pango' ka mungan, keya ka bari adi dog natas, keya ka banang adi dog kapŭg so sinangan tanun. Aku pikir Tapa mbŭh kapŭg umbur ku.[47]

¹³Ndi ngarŭm ngarŭm aku sien amai mandam, keya ka sarang andam turang dog mata singah. Aku pikir Tapa mbŭh kapŭg umbur ku.[48]

¹⁴Sirŭŭn ku simiyab ka ramah, ka aku nyidaing sak manuk asang. Batŭh ku mbŭh makin kawŭk amai nyigura ka rangit. TUHAN, nyiramat aku so sopŭrŭg pinyusah ati.

¹⁵Ani re ku nang? TUHAN mbŭh ndai-i. Atin ku pide, ka aku dŭh dapŭd bŭŭs.

¹⁶TUHAN, aku re udip yŭn Kaam, yŭn Kaam sadi adŭ. Pibua aku ka bada aku udip.[49]

¹⁷Pide atin ku re marui jadi sanang. Kaam nyiramat[50] aku so sopŭrŭg pinyusah; Kaam apun sopŭrŭg dosa ku.

¹⁸Mating daya di ong daya adi mbŭh kabŭs dapŭd muji Kaam; Daya adi mbŭh kabŭs dŭh dapŭd sabah pinyitŭtŭd Mai.

¹⁹Daya adi udip inŭh adi muji Kaam, nimun aku muji Kaam madin. Pimas kidaan di bara anak ngara nang Kaam raru tŭtŭd.

²⁰TUHAN, Kaam mbŭh pibua aku. Kieh re mambak kachapi ka nang ragu muji Kaam, sitŭkŭd umbur ami kieh nang ragu puji di Ramin TUHAN.

²¹Isaiah kidaan di raja bada nape di pirakis-i buwa ara adi mbŭh dog pŭh, ka ayŭh re bua.

²²Komŭnŭ Raja Hezekiah mite tandā ngga kiren adŭp-i re babŭ tungang panu ka Ramin TUHAN.