Read Biatah Bidayuh ISAIAH 40 Bible Online

ISAIAH 40 - Biatah Bidayuh bible

ISAIAH 40

¹“Nyaduh daya Ku,” Tapa ta nang. “Nyaduh ngara!

²Ngatat daya Jerusalem. Kidaan di ngara nang mbŭh tui ngara sukup sangsara ka dosa ngara mbŭh dog apun madin.[51] Aku mbŭh ngukum ngara ngga sipuno-i amai sopŭrŭg dosa ngara.”

³ Sirŭŭn dog dingah nang, “Sidia di tarun tana-pajam aran yŭn TUHAN! Bada tawas aran di tarun tana-sumat yŭn Tapa ta!

⁴Ngisi barang dau; pirapat barang darŭd. Sandah re jadi rabak, ka tarun adi nyurok mugu re dog pirata.

⁵Komŭnŭ bragah TUHAN re dog pinandŭng, ka sopŭrŭg manusia re kiris-i. Adŭp TUHAN mbŭh bijanji kayuh anŭ.”

⁶ Sirŭŭn dog dingah nang, “Piagah agah ati!” “Agah ani patut aku piagah?” Aku siken. “Piagah nang sopŭrŭg manusia mbŭh keya ka kupai; ngara mun bunga adi dŭh tan tui.

⁷Kupai rayu ka bunga asab, kan TUHAN bada sabak poh maka-i. Daya dŭh re tan dŭ so bunga.

⁸Sawŭ, kupai rayu ka bunga asab, pak pinganang Tapa ta tan tui.”

⁹Jerusalem, maad ka sambu darŭd adi bigatung ka piagah agah kana! Bagan ngga sirŭŭn bana, Zion; kidaan agah kana![52] Minyu ka dŭhnyah taru. Kidaan di kupo kupo Judah nang Tapa ngara re mandŭg!

¹⁰ TUHAN Raja re mandŭg di mritah ngga kuasa, taban ngga adŭp-I daya adi mbŭh-I nyiramat.[53]

¹¹ Ayŭh re kingat daya-I mun pingingat-biri; Ayŭh re nguruk bada tikuruk anak anak biri ka puko ngara ngga tangan; Ayŭh re nakit nguru sindŭ ngara.

¹²Dapŭd kah daya nakar piin rawŭt ngga pinyauk tangan-i bait kah ngŭkŭd rangit ngga tangan-i? Dapŭd kah daya ngisi sopŭrŭg tana ong darŭm ndi saker bait kah nimbang darŭd ngga sandah pakai dasin?

¹³ Dapŭd kah daya kidaan di TUHAN kayuh adi patut Ayŭh ndai? Asi dapŭd ngajar Ayŭh bait pitayan Ayŭh?

¹⁴Asi adi Tapa ngga bisiken siŭn dapŭd puan ka mirati ka birajar munki kayuh patut dog ndai?

¹⁵Di TUHAN bangsa bangsa inŭh au-tarun, dŭh rabis so ndi titeg piin; purau adi jo mbŭh jangan mun dabu.

¹⁶Sopŭrŭg dāng di tuān Lebanon dŭh sadang ndu sadis yŭn Tapa ta, ka tŭngŭn tŭngŭn-i dŭh sadang ngga pisakŭt apui.

¹⁷Bangsa bangsa mbŭh au-tarun di Ayŭh.

¹⁸ Asi dapŭd ata danding ngga Tapa? Dapŭd kah angān kidaan munki Ayŭh?

¹⁹Ayŭh dŭh mun tibudo adi tukang ndai, adi tukang basi marut ngga mas ka dog piguru di tunduh bangan pirak.

²⁰Daya adi dŭh tungang miris pirak bait mas[54] mien apŭg kayuh adi dŭh bisa madam. Ayŭh jiroh tukang adi pandai bada ndai patong adi dŭh bisa tumbang.

²¹Dŭh kah angān puan? Dŭh kah angān dog kidaan jah-i? Mating kah angān dingah munki ong piguru jadi?

²²Ong dog ndai sianŭ adi guru di takta-I di sambu ong ka bigatung so rangit; daya di sagān siit mun subi. Ayŭh mamad rangit mun tabir, mun bari adi yŭn ata rŭŭ.

²³Ayŭh pirabu pimritah adi bikuasa ka bada ngara jadi au-tarun.

²⁴Ngara keya ka anak anak kayuh-udip, adi muran re timbu uat-i. Kan TUHAN pait sabak, ngara pisŭk ka dog poh mun siriyang.

²⁵Asi dapŭd ata danding ngga Tapa kudus? Agi kah adi mun Ayŭh?

²⁶Nyigura ka rangit! Asi napa bitang bitang adi angān kiris? Sianŭ adi taban ngara ngga ruah mun bara tibaran soldadu, Ayŭh puan kiang ngara ka bagan barang bitang ngga dŭn-i! Kuasa-I raru bās -- ndi bitang bŭn gŭh manyap!

²⁷Israel, mani garang angān mingungut nang TUHAN dŭh puan pinyusah ngan bait kah dŭh piduri pasar hak ngan?

²⁸Dŭh kah angān puan? Bayuh kah angān dingah? TUHAN inŭh Tapa adi udip adu adu; Ayŭh napa ndi ong ong. Ayŭh bŭn kawŭk bait rarah. Mating daya mirati pikir kira-I.

²⁹Ayŭh nyibake ngara adi ramah ngga adi kawŭk.

³⁰Daya adi mara bisa gŭh jadi ramah; daya mara bisa gŭh tumbang sabab rarah.

³¹Pak ngara adi sabah di TUHAN yŭn pinurung re dapŭd pinyibake ngara dog pibauh. Ngara re mun beuh mikabur ngga pinyibake urad-i. Ngara re bikaduh ka dŭh re rarah; ngara re panu ka dŭh re kawŭk.