Read Biatah Bidayuh ISAIAH 42 Bible Online

ISAIAH 42 - Biatah Bidayuh bible

ISAIAH 42

¹ TUHAN nang, “Ati inŭh urun ku, adi Aku nyibake -- adi Aku mbŭh mien; di ayŭh asŭng Ku munos. Aku mbŭh nggen di ayŭh kuasa Ku, ka ayŭh re taban pinyitŭnggŭn ka barang bangsa.

²Ayŭh dŭh re nyirais bait bada sirŭŭn-i bana bait dog dingah di aran raya.

³Ayŭh dŭh re mata tŭngŭn reed adi miringe bait mura prita adi bŭrŭp bŭrŭp. Ayŭh re taban pinyitŭnggŭn adi tan adu adu yŭn sopŭrŭg daya.

⁴Ayŭh dŭh re manyap pingarap bait jimŭ; ayŭh re pijog pinyitŭnggŭn di ong. Rais rais adi jo kajŭn ajar-i ngga atin graŭh.”

⁵ Tapa napa rangit ka mamad-i; Ayŭh napa ong samŭn sopŭrŭg adi udip dieh; Ayŭh kudip ka nggen asŭng di sopŭrŭg manusia. Ka madin TUHAN Tapa nang di urun-I,

⁶ “Aku, adi TUHAN, mbŭh bagan kuu ka nggen di kuu kuasa ngga pimanu pinyitŭnggŭn di ong. So kuu Aku re ndai simanya ngga sopŭrŭg daya; so kuu Aku re taban jawa ka bangsa bangsa.

⁷Kuu re kuka batŭh daya adi karak ka pirupas daya so jer adi karŭm.

⁸“Aku sadi adi TUHAN Tapa ngan. Mating tapa bŭkŭn re sua dapu bragah Ku; Aku re dŭh bada tibudo sua dapu puji Ku.

⁹Kayuh kayuh adi Aku ninjau mbŭh jadi bitŭtŭk. Madin Aku re kidaan di kuu kayuh bauh sibayuh sopŭrŭg-i jadi.”

¹⁰Nang ragu bauh ka TUHAN; muji meh Ayŭh, sopŭrŭg ong! Muji Ayŭh, angān adi birayar di rawŭt; muji Ayŭh, sopŭrŭg dāng di rawŭt! Biragu meh sopŭrŭg ngan adi rŭŭ di rais rais adi jo!

¹¹Isa tarun tana-sumat ngga kupo kupo-i muji Tapa; Isa daya Kedar muji Ayŭh! Isa ngara adi rŭŭ di kupo Sela nyirais ngga gaŭn so tibung tibung darŭd!

¹²Isa ngara adi rŭŭ di rais adi jo muji ka nyibragah TUHAN!

¹³TUHAN matak di biperang mun pimagan; Ayŭh mbŭh sidia ka graŭh yŭn biperang. Ayŭh ngāb sirais biperang; Ayŭh kiren kuasa-I rawan pinganyu-I.

¹⁴Tapa nang, “Mbŭh tui Aku pajam; Aku mating nam daya Ku. Pak madin tika Aku makat mbŭh mandŭg; Aku sien nyidaing mun dayung naman sarang andam re biranak.

¹⁵Aku re nyirubuh sandah ngga darŭd ka nyibadŭh kupai ngga tŭngŭn tŭngŭn kayuh. Aku re bada sungi di rubān marui jadi tarun tana-sumat[58] ka nyibadŭh pagong pagong piin.

¹⁶“Aku re nguru daya karak di aran adi bŭn ngara kadŭg. Aku re bada karŭm ngara jadi jawa ka pirata aran adi nyurok mugu yŭn ngara. Anŭ inŭh janji Ku, ka Aku re batur batur sita-i.

¹⁷Sopŭrŭg adi sabah di tibudo, adi kadŭn patong tapa ngara, re dog pirapat ka dog pimangŭh.”

¹⁸TUHAN nang, “Dingah, angān daya adi bangam! Nakit tingga, angān daya adi karak!

¹⁹Agi kah adi rabis karak so urun Ku, rabis bangam so pinyisung adi Aku pait?

²⁰Israel, mbŭh raru bagŭ kayuh muko angān kiris, pak ani meh rati-i di angān? Angān biyŭn kajit ngga dingah, pak angān dŭh dingah.”

²¹TUHAN inŭh Tapa adi raru raan nyiramat, jadi Ayŭh bada ukum-adat ngga ajar-I bās, ka bada daya-I stabi dieh.

²²Pak madin daya-I mbŭh dog pirinda; ngara dog kurung darŭm gerok ka dog sukan darŭm jer. Ngara dog mirupak ka dog pirinda, ka mating daya nyiramat ngara.

²³Raan kah angān dingah? So madin raan kah angān dingah ngga nakit?

²⁴Asi bada Israel dog mirupak? Adŭp TUHAN inŭh, amai ata mbŭh bidosa rawan Ayŭh! Ata abah udip nanyam ka pinyiraan-I bait tunda ajar adi Ayŭh nggen di ata.

²⁵Jadi Ayŭh baji ka ngukum ata ka bada ata sangsara bada perang. Mun apui baji-I badang Israel, pak ata bŭn puan kayuh adi mbŭh jadi; ata dŭh birajar ani ani so dieh.