Read Biatah Bidayuh ISAIAH 47 Bible Online

ISAIAH 47 - Biatah Bidayuh bible

ISAIAH 47

¹ TUHAN nang, “Babylon, mūn so takta mu, ka guru di dabu di tana. Kuu ko dawŭ-i mun dayung tibŭn, kupo adi dŭh dapŭd dog ngarah, pak kuu mbŭh dŭh tia ramus! Madin kuu mbŭh jadi urun!

²Musing kisar batuh! Ngisar gandom! Kadi taŭb mu! Kadi piraka mu adi ramus! Karang jamuh mu ka mutas sungi sungi![64]

³Daya re kiris kuu sitabet; ngara re kiris kuu dog ngamun ka dog pimangŭh. Aku re maras dendam, ka mating daya re bitan Aku.”

⁴Tapa kudus Israel pirupas ata -- adŭn-I inŭh TUHAN Bisa-pŭrŭg.

⁵TUHAN nang di Babylon, “Pajam! Guru darŭm karŭm; ngara re dŭh tia bagan kuu rani bangsa bangsa!

⁶Aku baji di daya Ku; Aku ndai di ngara keya ka ngara mbŭh dŭh tia daya Ku: Aku na ngara darŭm kuasa mu, ka kuu dŭh kiren masi di ngara; ndŭg ka adi minyamba kuu kasar ngga.

⁷Kuu pikir kuu re adu adu jadi rani, ka dŭh suba mirati, bait bipikir munki pinŭbŭn kayuh.

⁸ “Dingah ati, kuu adi rindu udip pawŭn, kuu adi pikir adŭp mu siramat ka bamai. Kuu nang adŭp mu bās mun Tapa, ka mating daya bŭkŭn re mun kuu. Kuu pikir adŭp mu dŭh re jadi dayung uban bait naman sarang anak anak mu mbŭh mating.

⁹Pak nyitiro adŭ, darŭm ndi andu, soduwŭh kayuh anŭ re jadi. pakai kuasa nanung bait kani kuu, banŭh ngga anak anak mu re mating.

¹⁰“Kuu ruai sabah di pingandai arap mu; kuu pikir daya mating kiris kuu. Pinyibijak ngga pinyipuan mu bada kuu manyap, ka kuu nang di adŭp, ‘Aku ati Tapa; mating daya bŭkŭn mun aku.’

¹¹Pinyirusag re nyatŭk kuu, ka mating kuasa nanung dapŭd bitan-i. Pinyirusag re gŭgŭh nyatŭk kuu, pinyirusag adi bŭn kuu pikir re mandŭg!

¹²Adu adu pakai masam masam kuasa nanung mu; kuu mbŭh pakai-i so kuu gi-mara; Kadŭ-i bisa turung kuu; kadŭ kuu bisa pirawan bara pinganyu mu.

¹³Kuu mbŭh dŭh bikuasa pŭn ka kuu muko trima pinyitayan. Bada bara daya mu adi birajar pasar bitang mandŭg ka nyiramat kuu; ngara anŭ adi birajar pasar bitang, adi tingga pirati barang parad rangit ka kidaan di kuu barang buran kayuh[65] adi re jadi di kuu.

¹⁴“Ngara re keya ka sirah sirayang, ka apui re badang-i! Ngara re dŭh dapŭd nyiramat adŭp-i; jireb apui re raru paras yŭn ngara, dŭh nyam apui adi ngga nŭŭh nyinduh.

¹⁵Anŭ adŭ adi bisa ngara ndai yŭn mu, ngara adi puan pasar bitang adi kuu ngga bisiken sitŭkŭd udip mu. Sopŭrŭg ngara re bu tingge kuu, ka mating dŭm adi re nyiramat kuu.”