Read Biatah Bidayuh ISAIAH 51 Bible Online

ISAIAH 51 - Biatah Bidayuh bible

ISAIAH 51

¹TUHAN nang, “Dingah Aku, angān adi raan dog nyiramat, angān adi mandŭg ka Aku mite turung. Pikir pasar batuh adi so angān mandŭg, pasar kwari adi so angān dog kareh.

²Pikir pasar babuk ngan, Abraham, ka Sarah, adi biranak angān. Kan Aku bagan Abraham, ayŭh dŭh biyŭn anak, pak Aku nyiberkat ayŭh ka nggen di ayŭh anak; Aku bada sesang-i bagŭ.

³“Aku re kiren masi di Jerusalem, di sopŭrŭg adi rŭŭ di tibawang-i. Sunggu tarun tana-i tarun tana-sumat, Aku re bada-i jadi teya, mun teya adi Aku ndai di Eden. Gaŭn ngga pawŭn re agi diginŭ, ngga ragu puji ngga ragu trima kaseh yŭn Ku.

⁴“Dingah Aku, daya Ku, dingah kayuh adi Aku nang: Aku nggen ajar Ku di bangsa bangsa; ukum-adat Ku re taban jawa ka ngara.

⁵Aku re rikas mandŭg di nyiramat ngara; tika pimanang Ku mbŭh sindŭk. Aku re mritah bangsa bangsa. Tarun tana adi jo kajŭn Aku mandŭg; ngga pingarap, ngara kajŭn Aku nyiramat ngara.

⁶Tingga ka rangit; tingga ong! Rangit re miyap mun asuh; ong re bikurat mun piraka adi amba, ka sopŭrŭg daya-i re kabŭs mun tura. Pak pinyirupas adi Aku taban re tan adu adu; pimanang Ku dŭh re mungan.

⁷“Dingah Aku, angān adi puan kayuh adi batur, adi mbŭh nyikŭn ajar ku darŭm atin ngan. Dŭhnyah taru kan daya kinuas ka ngamun angān;

⁸ngara re miyap mun banang adi dog man gŭgŭt! Pak pinyirupas adi Aku taban re tan ndŭg situi tui; pimanang Ku re tan adu adu.”

⁹Makat, TUHAN, ka turung kieh! Nyiramat kieh pakai kuasa Mai; pakai-i mun Kaam pakai-i ndun jah. Kaam inŭh adi pirŭsŭb Rahab.[68]

¹⁰Kaam inŭh adi nyibadŭh rawŭt ka ndai aran di yun piin, isa ngara adi Kaam nyiramat dapŭd mutas.

¹¹Ngara adi Kaam nyiramat re mandŭg ka Jerusalem ngga gaŭn, biragu ka nyirais amai gaŭn. Ngara re adu adu pawŭn, adu adu rupas so susah ngga jera.

¹²TUHAN nang, “Aku inŭh adi nyibake angān. Ngga mani angān taru daya adi bisa kabŭs, adi mun uduh adi rikas rayu?

¹³Mbŭh kambŭt ngan kah TUHAN adi napa angān, adi mamad rangit ka adi na pimŭnŭs ong? Ngga mani angān ari taru baji ngara adi kinanyuh angān, ngara adi an pirusag angān? Baji ngara re dŭh tia dog angān.

¹⁴Ngara adi daya-takap re rikas dog pirupas; ngara re udip tui ka re biyŭn sukup pinguman.

¹⁵“Aku ati TUHAN adi Tapa ngan; Aku adi kiruyok rawŭt ka bada girumbang-i magā. Adŭn Ku inŭh TUHAN Bisa-pŭrŭg!

¹⁶Aku mamad[69] rangit ka na pimŭnŭs ong; Aku nang di Jerusalem, ‘Kuu inŭh daya Ku! Aku mbŭh nggen di kuu ajar Ku, Aku grindung kuu ngga tangan Ku.’ ”

¹⁷ Jerusalem, makat! Kies adŭp mu ka makat! Kuu mbŭh nok saker ukum adi TUHAN darŭm baji-I mbŭh nggen di kuu bada nok; kuu nok-i, ka-i bada kuu tibabeu.

¹⁸Mating daya nguru kuu, mating daya di dupan daya mu re nggen tangan-i turung kuu.

¹⁹Pinyirusag adi duwŭh rupet mbŭh nyatŭk kuu: tarun tana mu mbŭh rusag bada perang, ka daya mu mbŭh sikirau. Mating daya masi di kuu.

²⁰Di sikuh barang aran daya mu tumbang amai ramah; ngara mbŭh keya ka peyu rakat di jarat pingasū. Ngara mbŭh kinyam baji Tapa.

²¹Angān daya Jerusalem adi sangsara, angān adi tibabeu mun adi mabuk,

²²TUHAN adi Tapa ngan ngibān angān ka nang, “Aku taban saker anŭ ngga bu adi Aku nggen di angān darŭm baji Ku. Angān re dŭhsah tia nok wain adi bada angān tibabeu.

²³Aku re nggen-i di ngara adi kinanyuh angān, di ngara adi bada angān guring di aran ka bidigang di tunduh ngan mun digang sapok.”