Read Biatah Bidayuh ISAIAH 53 Bible Online

ISAIAH 53 - Biatah Bidayuh bible

ISAIAH 53

¹ Daya nam, “Asi re sabah kayuh adi ata kidaan madin? Asi mbŭh kiris tangan TUHAN di kayuh ati?

²Anŭ mbŭh pinyiraan TUHAN inŭh urun-I timbu mun anak kayuh-udip piruat di tana badŭh. Gayŭn-i dŭh kana bait ramus adi re bada ata an kimat ayŭh. Mating pinyiramus-i, mating ani ani di ayŭh adi re tarik atin ta.

³Ata ngamun ayŭh ka tirawan ayŭh; ayŭh kinyam sangsara ngga sarang andam. Mating daya an kimat ayŭh; ata nyipunok ayŭh mun ata ngga kayuh au-tarun.

⁴ “Pak ayŭh sibatur-i sangsara yŭn ata, andam adi ata patut kinyam. Tian-ti ata pikir sangsara-i ukum so Tapa.

⁵ Pak sabab dosa ta ayŭh mbŭh tawan, dog pukong sabab arap adi ata mbŭh ndai. Ukum adi ayŭh kinyam pibua ata, ka ata mbŭh bua amai pukong adi ayŭh trima.

⁶ Sopŭrŭg ata muko keya ka biri adi mbŭh manyap, barang naan ata panu kadŭg aran adŭp ta. Pak TUHAN bada ukum anŭ nyatŭk ayŭh, ukum adi sopŭrŭg ata patut trima.

⁷ “Ayŭh dog pijera, pak ayŭh nyijŭn-i ngga atin rapat; ayŭh dŭh piruah ndi bang pinganang. Mun anak biri re dog simareh, mun biri re dog gumbak buruh-i, ayŭh dŭh nang ani ani.

⁸Ayŭh dog nakap ka dog bisara ka dog taban yŭn dog siŭ, ka mating daya piduri nasip-i. Ayŭh dog nggen ukum kabŭs amai dosa bangsa ta.

⁹ Ayŭh dog na di kubur ngga daya ginaka, ayŭh dog kubur ngga daya kaya, sunggu ayŭh mating ndai sarah bait kadong daya.”

¹⁰TUHAN nang, “Anŭ mbŭh so pinyiraan Ku inŭh ayŭh sangsara; pinyikabŭs-i inŭh sadis ngga apun dosa. Ngapŭi ayŭh re kiris bara sesang-i; ayŭh re tui udip, ka so ayŭh Aku re dapŭd pinŭtŭn Ku.

¹¹Ripas pimudip sangsara, ayŭh re pari gaŭn; ayŭh re puan nang sangsara-i dŭh kayuh adi dŭh biyŭn rati. Urun Ku adi tŭtŭd, adi yŭn asŭng Ku munos, re gŭrŭng ukum daya bagŭ sabab ayŭh Aku re apun ngara.

¹² Ngapŭi Aku re nggen di ayŭh yŭn guru adi bibragah, pinyiguru di dupan daya bās ngga adi bikuasa. Ayŭh re jugan asŭng adŭp-i ka sua kinyam nasip daya adi arap. Ayŭh gŭrŭng dosa daya bagŭ ka bidua mite ngara dog apun.”[72]