Read Biatah Bidayuh ISAIAH 54 Bible Online

ISAIAH 54 - Biatah Bidayuh bible

ISAIAH 54

¹ Jerusalem, kuu mbŭh keya ka dayung adi aboh, pak madin kuu dapŭd biragu ka nyirais ngga gaŭn. Madin kuu re biyŭn rabis bagŭ anak so dayung adi bŭn dog tingge banŭh-i!

²Bada bayah bari adi yŭn mu rŭŭ; bada ambu taris-i ka bada tagap pagu-i!

³Kuu re pibayah tana mu di barang parad; daya mu re tambit pari tarun tana adi madin dog ngisi bangsa bŭkŭn. Kupo kupo adi dog tagan madin re brisi ngga daya.

⁴Dŭhnyah taru, kuu re dŭh dog pimangŭh dinge; kuu re dŭh dog ngamun. Kuu re kambŭt pimudip mu adi dŭh tŭtŭd di tika kuu babŭ mara, ka udip maput mu jadi dayung uban.

⁵Pinapa mu re keya ka banŭh di kuu; TUHAN Bisa-pŭrŭg inŭh adŭn-I. Tapa kudus Israel re nyiramat kuu; Ayŭh inŭh pimritah di ndi ong ong.

⁶Israel, kuu inŭh keya ka sawŭn adi mara, dog tagan banŭh ka mbŭh ruai susah. Pak TUHAN bagan kuu bada pari ka adŭp-I ka nang:

⁷“Nyitiro adŭ Aku tangan kuu; pak ngga pinyirindu adi tŭrŭp Aku re tambit kuu pari.

⁸Aku nyipunok kuu darŭm baji nyitiro adŭ, pak Aku re rindu kuu ndŭg situi tui.” Sakanŭ TUHAN adi nyiramat kuu.

⁹ “Di jaman Noah Aku bijanji dŭh tia bada uba ngapuh ong. Madin Aku bijanji dŭh tia baji di kuu; Aku dŭh re tia tuas bait ngukum kuu.

¹⁰Darŭd ngga sandah bisa rubuh, pak pinyirindu Ku di kuu dŭh re mungan; Aku re adu adu sita janji damai Ku.” Sakanŭ TUHAN adi rindu kuu.

¹¹ TUHAN nang, “O Jerusalem, kuu kupo adi sangsara ka adi dŭh dapŭd ndai ani ani, ka mating daya nyaduh kuu, Aku re pari pijog pimŭnŭs mu ngga batuh adi brega.

¹²Aku re pijog tawā mu ngga batuh mutiara, tiban mu ngga batuh adi bringam mun apui, ka sindung maning kuu ngga batuh brega.

¹³ “Adŭp Ku re ngajar daya mu, ka nggen di ngara udip mujur ngga damai.

¹⁴Pinyitŭnggŭn ngga udip tŭnggŭn re nyibake kuu. Kuu re siramat so dog kinanyuh ka so pinyiganas.

¹⁵Asi asi adi nyerang kuu dŭh-i so pinyibada Ku; asi asi adi rawan kuu re rabu.

¹⁶“Aku napa tukang basi, adi pisakŭt apui ngga ndai sinyata. Aku gŭh adi napa soldadu, adi pakai sinyata ngga siŭ.

¹⁷Pak mating sinyata re dapŭd bada kuu kinaman; kuu re biyŭn pinyinam ngga nam daya adi nyarah kuu. Aku re ngibān urun urun Ku ka nggen pimanang di ngara.” TUHAN mbŭh minyu.