Read Biatah Bidayuh ISAIAH 55 Bible Online

ISAIAH 55 - Biatah Bidayuh bible

ISAIAH 55

¹ TUHAN nang, “Mandŭg, barang naan adi badŭh asŭng; digiti agi piin! Mandŭg, angān adi dŭh biyŭn duit; miris gandom ka man! Mandŭg! Miris wain ngga sisuh; dŭhsah bayar ani ani!

²Mani miris kayuh adi dŭh pimunos asŭng? Mani nyiraja yŭn kayuh adi dŭh bada nŭŭh bisoh? Dingah Aku ka ndai kayuh adi Aku bada, ka angān re munos man pinguman adi siabo sidi.

³ “Dingah madin, daya Ku, ka mandŭg ka Aku; mandŭg ka Aku, ka angān re udip! Aku re ndai simanya adi tan adu adu ngga angān ka nggen di angān berkat adi Aku mbŭh bijanji nggen di David.

⁴Aku bada ayŭh jadi pinguru ka pingubak bangsa, ka so ayŭh Aku kiren kuasa Ku di ngara.

⁵Madin angān bagan bangsa bangsa tami; dawŭ-i ngara dŭh puan angān, pak madin ngara re bikaduh tudu angān ka mŭrŭt bara ngan! Aku, adi TUHAN adi Tapa ngan, Tapa kudus Israel, re bada sopŭrŭg anŭ jadi, Aku re nggen di angān stabi ngga bragah.”

⁶Marik pimudip ngan pari ka TUHAN ka bidua ka Ayŭh, san Ayŭh agi sindŭk.

⁷Tandah daya ginaka tingge aran pimudip ngara ka nukar pikir-kira ngara. Tandah ngara marik pimudip ngara pari ka TUHAN, adi Tapa ta; Ayŭh inŭh masi ka rikas apun.

⁸“Pikir Ku,” TUHAN nang, “dŭh mun pikir ngan, ka aran Ku bŭkŭn so aran ngan.

⁹Bigatung mun rangit di tunduh ong, simŭnŭ gŭh aran Ku ngga pikir-kira Ku bigatung so jangān.

¹⁰ “Pinganang Ku inŭh keya ka salju ngga ujen adi mūn so rangit ngga misa tana, Ngara bada pimuruh timbu ngga piruah bine yŭn purun ka pinguman yŭn man.

¹¹Simŭnŭ gŭh pinganang adi Aku piruah; ayŭh dŭh re dŭh ndai kayuh adi Aku mbŭh ngatur yŭn-i; ayŭh re ndai sopŭrŭg kayuh adi Aku pait ayŭh bada ndai.

¹²“Angān re bu tingge Babylon ngga gaŭn; angān re dog nguru ruah so kupo ngga damai. Darŭd ngga sandah re biragu ngga gaŭn, ka tŭngŭn tŭngŭn kayuh re nyirais ngga gaŭn.

¹³Tŭngŭn sipres re timbu di yŭn bakah pireja; tŭngŭn kemunting re gati tŭngŭn reja. Ati re jadi tandā adi re tan ndŭg situi tui, ngga ingat kayuh adi Aku, adi TUHAN, mbŭh ndai.”