Read Biatah Bidayuh ISAIAH 56 Bible Online

ISAIAH 56 - Biatah Bidayuh bible

ISAIAH 56

¹TUHAN nang di daya-I, “Ndai kayuh adi patut ka adi batur, amai dŭm nyitiro Aku re nyiramat angān.

²Aku re nyiberkat ngara adi ari sita andu Sabbath ka adi dŭh pakai-i ngga ndai pingandai sarah.”

³Daya tami adi mbŭh mŭrŭt daya TUHAN patut dŭh nang, “TUHAN re dŭh bada aku sua bisambah ngga daya-I.” Daya adi mbŭh dog nuroi dŭh patut nang sabab adŭp-i dŭh dapŭd biyŭn anak, ayŭh dŭh bisa jadi ndi so bara daya Tapa.

⁴TUHAN nang di daya adi mun anŭ, “Kambŭi kuu sita andu Sabbath ngga stabi di Aku ka kambŭi kuu ndai kayuh adi bada asŭng Ku munos ka tŭtŭd sita simanya Ku,

⁵dŭn mu re dog ingat di Ramin Ku ka di ruang daya Ku tui dŭ so kambŭi kuu biyŭn anak anak dari ngga anak anak dayung. Kuu dŭh re dog kambŭt.”

⁶Ka TUHAN nang di bara daya tami anŭ adi mbŭh mŭrŭt daya-I, adi rindu Ayŭh ka adi bituan di Ayŭh, adi sita andu Sabbath ka tŭtŭd sita simanya-I:

⁷ “Aku re taban angān ka Zion, sandah kudus Ku,[73] nggen di angān pinyigaŭn darŭm ramin simayang Ku, ka trima sadis adi angān jugan di tunduh mija-sambah Ku. Ramin Ku re dog kadŭn ramin simayang yŭn sopŭrŭg bangsa.”

⁸TUHAN Raja, adi taban daya-I Israel mari ripas ko dog taran, mbŭh bijanji nang Ayŭh re babŭ taban daya bŭkŭn bada mŭrŭt ngara.

⁹TUHAN mbŭh bada bangsa bangsa tami mandŭg mun dāng tarun di man daya-I.

¹⁰Ayŭh nang, “Sopŭrŭg pinguru, adi patut bakan daya Ku, mbŭh karak! Ngara dŭh puan ani ani. Ngara keya ka kasong adi dog bada jaga pak dŭh an ngakang; adŭ-i bŭŭs ka nyipŭmŭh.

¹¹Ngara pirusong mun kasong adi bŭn bisa bisoh. Bara pinguru anŭ dŭh biyŭn pinyimirati. Barang naan ngara ndai kayuh nanyam pinyiraan adŭp-i ka jiroh utung yŭn adŭp-i adŭ.

¹²‘Ja nok wain,’ bara pimabuk anŭ nang, ‘ka nok sipuas puas ta! Sipagi re rabis kana so andu ati!’ ”