Read Biatah Bidayuh ISAIAH 57 Bible Online

ISAIAH 57 - Biatah Bidayuh bible

ISAIAH 57

¹Daya adi kana kabŭs, ka mating daya mirati bait mbit piduri. Pak kan ngara kabŭs, mating pinyusah re tia nyatŭk ngara.

²Ngara adi udip tŭnggŭn dapŭd damai ngga rŭŭ-paya darŭm ngara kabŭs.

³Mandŭg kamati yŭn dog bisara, angān daya bidosa! Angān dŭh kurang so bara nyamba-biruri, bara adi tanggah, ka bara sundar.

⁴Asi anŭ adi angān napat? Asi anŭ adi angān daya pingadong nyirimbe?

⁵Angān nyambah tapa tapa pimuah buang angān muas pinyiraan pŭrŭng ngan di ribo tŭngŭn tŭngŭn pirapu' ngan. Angān jugan anak anak ngan ndu sadis di tāng pibatuh sindŭk dau sungi.

⁶Angān tambit batuh adi jarŭh so nŭ ka nyambah-i mun nyambah tibudo. Angān ren wain ndu sadis ka ngara ka taban ka ngara sadis ruwang kayuh.

⁷Angān di ka darŭd bigatung di jugan sadis ka muas pinyiraan pŭrŭng ngan.

⁸Angān pijog tibudo ngan adi sembar anŭ di punok tiban-bās ka ngapid uros-i darŭm ramin ngan. Angān tagan Aku; angān kadi piraka ngan ka maad pangō ngan adi bayah ngga ambai ngan, adi angān bayar bada bŭŭs ngga angān. Ka diginŭ angān muas pinyiraan pŭrŭng ngan.

⁹Angān pakai inyo ngga wangi ka di nyambah tapa Molech. Angān pait pinyisung ka rais rais adi jo bada jiroh tapa tapa an ngan nyambah, ndŭg ka jiroh di ong daya adi mbŭh kabŭs ani.

¹⁰Angān pirarah adŭp ngan jiroh tapa tapa bŭkŭn, pak angān dŭh jŭk. Angān pikir tibudo tibudo ngan adi sembar anŭ nggen di angān pinyibake adi bada angān dŭh bisa jadi ramah.

¹¹TUHAN nang, “Asi tapa tapa anŭ adi bada angān taru, ndŭg ka angān kadong ka kambŭt Aku? Sabab Aku mbŭh raru tui pajam kah angān mbŭh dŭh tia stabi di Aku?

¹²Angān pikir kayuh adi angān ndai inŭh kayuh adi batur, pak Aku re kiren urah arap ngan, ka tibudo tibudo ngan re dŭh dapŭd turung angān.

¹³Kan angān bagan mite turung, bada tibudo tibudo ngan anŭ turung angān! Sopŭrŭg tibudo ngan anŭ re dog poh sabak! Pak ngara adi sabah di Aku re rŭŭ di rais ati ka nyambah Aku di Ramin Ku.”

¹⁴TUHAN nang, “Tandah daya Ku pari ka Aku. Ndai aran ka sidia-i yŭn ngara panu! Kadi so aran anŭ kayuh adi kinarang ngara!

¹⁵“Aku ati Tapa adi di sambu ka adi kudus. Aku rŭŭ di yŭn adi bigatung ka adi kudus, pak Aku gŭh adi rŭŭ ngga daya adi pirapat adŭp-i ka adi mbŭh marik pimudip-i pari ka Aku, isa Aku dapŭd bada pari tagap pinyabah ngga pingarap ngara.

¹⁶Aku nggen di daya Ku udip, ka Aku re dŭh adu adu nyarah ngara bait adu adu baji di ngara.[74]

¹⁷Aku baji di ngara sabab dosa ngga udip tama ngara, ngapŭi Aku ngukum ngara ka tagan ngara. Pak ngara baking ka ngandŭ tunda aran adŭp ngara.

¹⁸“Aku mbŭh kiris urah ngara, pak Aku re pibua ngara. Aku re nguru ngara ka turung ngara, ka Aku re nyaduh ngara adi muās.

¹⁹ Aku nggen damai di sopŭrŭg daya, adi sindŭk ngga adi jo! Aku re pibua daya Ku.

²⁰Pak daya arap mbŭh keya ka rawŭt adi bŭn adŭ tanang amai girumbang, taban sapok ngga bude adi kais.

²¹ Daya bidosa dŭh re siramat,” TUHAN nang.