Read Biatah Bidayuh ISAIAH 58 Bible Online

ISAIAH 58 - Biatah Bidayuh bible

ISAIAH 58

¹TUHAN nang, “Nyirais bana situngang tungang ngan! Kidaan di daya Ku Israel pasar dosa ngara!

²Ngara nyambah Aku barang andu, nang adŭp ngara graŭh an puan aran Ku ka tunda ukum ukum-adat Ku. Ngara nang adŭp-i raan Aku nggen di ngara ukum-adat adi patut ka nang adŭp-i suka nyambah Aku.”

³Daya nang, “Re ngga mani ata bipusa kambŭi TUHAN dŭh kiris? Re ngga mani ata dŭh man kambŭi Ayŭh dŭh mbit piduri?” TUHAN nang di ngara, “Di tika angān bipusa, angān mbit bat di har adŭp ngan ka kinanyuh daya adi nyiraja yŭn ngan.

⁴Pusa ngan bada angān ganas, ka angān bikaii ka birawan. Angān pikir bipusa adi mun anŭ re bada Aku dingah dua ngan kah?

⁵Kan angān bipusa, angān bada adŭp ngan jera; angān mutu ubak ngan bada rapat mun dawŭn kupai ka mamad banang guni ngga apŭk yŭn guring. Anŭ kah adi nang ngan bipusa? Angān pikir Aku re munos asŭng di pingandai adi mun anŭ kah?

⁶“Bipusa adi Aku raan inŭh ati: kadi parik basi so daya-takap adi dog muak dŭh ngga sipatut-i. Pirupas ngara adi dog kinanyuh!

⁷ Samah pinguman ngan ngga daya adi sibŭrŭk ka kambat daya sirata adi dŭh biyŭn ramin arŭn ka darŭm ramin ngan. Nggen piraka di ngara adi dŭh biyŭn piraka, ka dŭhnyah abah turung madis adŭp ngan.

⁸“Komŭnŭ jawa ngan re nyekar mun jawa isan isan, ka tawan ngan re rikas bua. Aku re ari agi ngga angān an nyiramat angān; bragah Ku re grindung angān di barang parad.

⁹Kan angān bidua, Aku re nggen pimite ngan. Kan angān bagan Aku, Aku re nam. “Kambŭi angān pirŭŭ kraja pingandai ngan adi kinanyuh daya, adi ngamun daya, adi kinarap daya;

¹⁰Kambŭi angān nggen pinguman di daya adi sibŭrŭk ka pimunos asŭng ngara adi dog kinanyuh, karŭm adi maning angān re marui jadi jawa yun kumbeng.

¹¹Ka Aku re ari nyiruton angān ka pimunos asŭng ngan ngga kayuh kana. Aku re bada angān bake ka bua. Angān re keya ka teya adi biyŭn bagŭ piin, mun rubang piin adi dŭh pandai badŭh.

¹²Daya ngan re pari pijog kayuh adi mbŭh tui rubuh, pari pijog di tunduh pimŭnŭs adi amba. Angān re dog puan nang daya adi pari pijog sindung sindung kupo, adi pari pijog ramin ramin adi mbŭh rubuh.”

¹³TUHAN nang, “Kambŭi angān sita andu Sabbath mun sita andu adi kudus ka dŭh mbit bat di har adŭp ngan sadi adŭ di andu anŭ; kambŭi angān bada andu kudus Ku andu adi biguna ka dŭh panu bijaruh, nyiraja, bait minyu pinganang adi dŭh biguna di andu anŭ,

¹⁴angān re dapŭd atin gaŭn amai bituan di Aku. Aku re bada angān dog stabi di ndi ong ong, ka angān re trima buwa tana adi Aku nggen di babuk ngan Jacob. Aku, adi TUHAN, mbŭh minyu.”