Read Biatah Bidayuh ISAIAH 60 Bible Online

ISAIAH 60 - Biatah Bidayuh bible

ISAIAH 60

¹Makat, Jerusalem, ka nyekar mun batŭh andu meh; Bragah TUHAN mbŭh nyekar di tunduh mu!

²Bangsa bangsa bŭkŭn re dog nutu karŭm, Pak di tunduh mu jawa TUHAN re nyekar; Jawa bragah-I re agi ngga kuu.

³Bangsa bangsa mandŭg tudu jawa mu, Ka raja raja mandŭg tudu jawa isan isan mu.

⁴Tingga kayuh adi jadi maning kuu: Daya mu mbŭh tikuruk re mari! Anak anak dari mu re mandŭg so rais adi jo; Anak anak dayung mu re dog kabis mun anak-sŭ.

⁵Kuu re kiris kayuh anŭ ka re gaŭn; kuu re kimŭtŭr amai gaŭn. Buat-rata bangsa bangsa re dog taban ka kuu; pinyikaya ngara re mutas rawŭt mandŭg ka kuu.

⁶Bara pinunggang onta re mandŭg, so Midian ngga Ephah. Ngara re mandŭg so Sheba, taban mas ngga kimanyan. Daya re kidaan agah kana pasar kayuh adi TUHAN mbŭh ndai!

⁷Sopŭrŭg biri Kedar ngga Nebaioth re dog taban ka kuu ndu sadis ka dog jugan di tunduh mija-sambah ngga pimunos asŭng TUHAN. TUHAN re bada Ramin-I rabis bragah so adi mbŭh.

⁸Kapar ani anŭ adi mikabur mun abun, mun manuk asang mikabur mari?

⁹Anŭ inŭh kapar mandŭg so rais adi jo, taban daya Tapa ngga mari. Ngara taban pirak ngga mas ngga kibās adŭn TUHAN, adi Tapa Israel, Tapa adi kudus, adi bada sopŭrŭg bangsa stabi di daya-I.

¹⁰TUHAN nang di Jerusalem, “Daya tami re pari pijog sindung mu, ka raja raja ngara re bituan di kuu. Darŭm baji Ku Aku ngukum kuu, pak madin Aku re kana ka masi di kuu.

¹¹ Sandu singarŭm tiban tiban mu re tikuka, isa raja raja bangsa bisa taban ka kuu pinyikaya ngara.

¹²Pak bangsa bangsa adi dŭh bituan di kuu re abo dog pirabur.

¹³“Kayuh tŭngŭn pain, tŭngŭn junipa, tŭngŭn sipres, kayuh adi siabo kana so tuān Lebanon, re dog taban ngga pari pijog kuu, Jerusalem, ngga ndai Ramin Ku bada ramus, ngga ndai kupo Ku bada bibragah.

¹⁴ Sesang sesang ngara adi kinanyuh kuu re mandŭg ka sidikang kiren stabi di kuu. Sopŭrŭg adi ko ngamun kuu re nyambah di kaja mu. Ngara re kadŭn kuu ‘Kupo TUHAN’, ‘Zion, Kupo Tapa Israel, Tapa adi Kudus’.

¹⁵“Kuu re dŭh dog tagan ka dog tiru, ka re dŭh dog tandah jadi tibawang. Aku re bada kuu bās ka sangŭn, tarun adi yŭn pinyigaŭn adu adu.

¹⁶Bangsa bangsa ngga raja raja re sita kuu keya ka sindŭ daya sita anak-i. Kuu re puan nang Aku, adi TUHAN, mbŭh nyiramat kuu, nang Tapa Israel, Tapa adi Bikuasa, mbŭh pirupas kuu.

¹⁷“Aku re taban mas ka kuu, dŭh-i timaga. Pirak ngga timaga, dŭh-i basi puan kah kayuh, ka basi, dŭh-i batuh. Pimritah mu re dŭh tia kinanyuh kuu; Aku re bada ngara mritah ngga pinyitŭnggŭn ka damai.

¹⁸Jawŭn pinyiganas re dŭh tia dog dingah; pinyirusag re dŭh tia nyirubuh rais mu. Aku re grindung ka ngibān kuu mun sindung; kuu re muji Aku sabab Aku mbŭh nyiramat kuu.

¹⁹ “Batŭh andu re dŭh tia jadi jawa mu sandu, dŭh gŭh buran jadi jawa mu singarŭm; Aku, adi TUHAN, re jadi jawa mu adi tan adu adu; jawa bragah Ku re nyekar di tunduh mu.

²⁰Tipuh pinyusah mu re mungan. Aku, adi TUHAN, re jadi jawa mu adi tan adu adu, Rabis tan so batŭh andu ngga buran.

²¹Sopŭrŭg daya mu re ndai kayuh adi batur, ka re dapu tarun tana ati ndŭg situi tui. Aku purun ngara, Aku ndai ngara, ngga pinandŭng bās Ku di sopŭrŭg.

²²Ndŭg ka rawang mu adi siabo sŭ ngga adi dog ngamun re jadi bangsa adi bās ngga adi bikuasa. Kan tika-i adi batur mbŭh mandŭg, Aku re bada kayuh anŭ rikas jadi. Aku ati TUHAN!