Read Biatah Bidayuh ISAIAH 61 Bible Online

ISAIAH 61 - Biatah Bidayuh bible

ISAIAH 61

¹ TUHAN Raja mbŭh nguasa aku ngga Roh-I. Ayŭh mbŭh mien aku ka pait aku bada taban agah kana ka daya sirata, bada pibua daya adi susah atin, bada piagah pinyirupas di daya-takap ka pinyirupas di ngara adi dog jer.

² Ayŭh pait aku bada piagah nang tika-i mbŭh mandŭg kan TUHAN re nyiramat daya-I ka ngarah pinganyu ngara. Ayŭh mbŭh pait aku bada nyaduh sopŭrŭg adi ngurid,

³bada nggen di ngara adi ngurid di Zion pinyigaŭn ngga pawŭn, ka dŭh pinyusah, ragu puji, ka dŭh ragu pinyusah. Ngara re keya ka tŭngŭn tŭngŭn kayuh adi adŭp TUHAN mbŭh purun. Sopŭrŭg ngara re ndai kayuh adi batur, ka Tapa re dog muji amai kayuh adi Ayŭh mbŭh ndai.

⁴Ngara re pari pijog kupo kupo adi mbŭh tui nyibawang.

⁵Daya Ku, daya tami re bituan di angān. Ngara re kingat dāng kudip ngan ka nyiraja di tana ngga teya anggor ngan.

⁶Ka angān re dog puan jadi imam imam TUHAN, bara urun Tapa ta. Angān re kinyam pinyikaya bangsa bangsa ka re mingangŭn dapu pinyikaya anŭ.

⁷Angān re dŭh tia dog pimangŭh bait dog ngamun. Angān re udip di tarun tana adŭp ngan, ka pinyikaya ngan re jadi duwŭh rupet; pinyigaŭn ngan re tan adu adu.

⁸TUHAN nang, “Aku rindu pinyitŭnggŭn ka Aku tiru di pingandai adi kinanyuh daya ngga tadŭ pingandai adi sarah. Ngga tŭtŭd Aku re ngupah daya Ku ka ndai simanya adi tan adu adu ngga ngara.

⁹Ngara re timagah di dupan bangsa bangsa; barang naan adi kiris ngara re puan nang ngara daya adi Aku mbŭh mien.”

¹⁰ Jerusalem gaŭn sabab kayuh adi TUHAN mbŭh ndai. ayŭh mbŭh keya ka pingaten dayung adi muko bisasat yŭn re sawan. Tapa mbŭh kibarui ayŭh ngga pinyiramat ka pimanang.

¹¹Nimun bine adi dog nabur dŭh siŭn dŭh timbu ka masang udip, simŭnŭ gŭh TUHAN Raja re nyiramat daya-I, ka sopŭrŭg bangsa re muji Ayŭh.