Read Biatah Bidayuh ISAIAH 62 Bible Online

ISAIAH 62 - Biatah Bidayuh bible

ISAIAH 62

¹Aku re minyu ngga ngatat Jerusalem; aku dŭh re pajam ndŭg ka ayŭh mbŭh siramat, ka pimanang-i nyekar mun jawa nyekar darŭm karŭm.

²Jerusalem, bangsa bangsa re kiris pimanang mu! Sopŭrŭg raja re kiris bragah mu. Kuu re dog kadŭn ngga dŭn adi bauh, dŭn adi dog nggen adŭp Tapa.

³Kuu re keya ka makota adi sangŭn yŭn TUHAN.

⁴Kuu re dŭh tia dog kadŭn “Adi Dog Tagan”. Tarun tana mu re dŭh tia dog kadŭn “Sawŭn Adi Dog Tingge”. Dŭn bauh mu inŭh re “Tapa Re Munos Asŭng di Ayŭh”. Tarun tana mu re dog kadŭn “Mbŭh Banan” sabab TUHAN inŭh munos asŭng-I di kuu ka re keya ka banŭh yŭn tarun tana mu.

⁵Keya ka dari adi mara tambit dayung tibŭn ndu sawŭn, Ayŭh adi napa kuu re sawŭn kuu. Keya ka pingaten dari angan pingaten dayung-i, simŭnŭ gŭh Tapa re angan kuu.

⁶Di tunduh sindung mu, Jerusalem, aku mbŭh na daya adi tukang jaga; ngara dŭh siŭn pajam sandu ngga singarŭm. Ngara dŭh siŭn dŭh bada TUHAN ingat janji-I ka dŭh tandah Ayŭh kambŭt-i.

⁷Ngara dŭh siŭn bada Ayŭh rŭŭ-paya ndŭg ka Ayŭh mbŭh ngamas pari pijog Jerusalem ka bada-i jadi kupo adi ndi ong ong muji.

⁸TUHAN mbŭh ndai ndi janji buang bipayu, ka ngga kuasa-I Ayŭh re pijadi-i: “Gandom ngan re dŭh tia pinguman yŭn pinganyu ngan, ka daya tami re dŭh tia nok wain ngan.

⁹Pak angān adi purun ka ngatŭm gandom re man ruti ka muji TUHAN. Angān adi sita ka ndu buwa anggor re nok wain di awah Ramin Ku.”

¹⁰Daya Jerusalem, ruah so kupo ka ndai aran yŭn daya ngan adi mari! Sidia aran raya; sayan ka taran batuh batuh! Pijog tandā isa bangsa bangsa puan

¹¹ Nang TUHAN inŭh piagah kayuh ati di ndi ong ong: “Kidaan di daya Jerusalem nang TUHAN mandŭg di nyiramat angān, taban ngga adŭp-I daya adi-I mbŭh nyiramat.”

¹²Angān re dog kadŭn “Daya adi Kudus”, “Daya adi Tapa mbŭh nyiramat”. Jerusalem re dog kadŭn “Kupo adi Tapa Rindu”, “Kupo adi Tapa dŭh tagan”.