Read Biatah Bidayuh ISAIAH 65 Bible Online

ISAIAH 65 - Biatah Bidayuh bible

ISAIAH 65

¹ TUHAN nang, “Aku mbŭh sidia an nam dua daya Ku, pak ngara dŭh bidua. Aku mbŭh sidia bada ngara dapŭd Aku, pak ngara taŭn dŭh adŭ jiroh Aku. Bangsa dŭh bidua ka Aku, sunggu Aku ari sidia an nam, ‘Digiti Aku; Aku raan turung angān.’

² Aku mbŭh ari sidia an kambat daya Ku, adi baking buang ngandŭ ndai kayuh adi sarah ka tunda pinyiraan adŭp-i.

³Ngga dŭh mangŭh ngara adu adu bada Aku baji. Ngara jugan sadis adat karŭm di teya pirapu' ka badang kimanyan di tunduh mija-sambah adat karŭm.

⁴Singarŭm ngara di ka tāng bait kubur an bisiken ngga roh daya adi mbŭh kabŭs. Ngara man dagin ayo ka nok ju dagin adi ko dog jugan ndu sadis adat karŭm.

⁵Ka komŭnŭ ngara nang di dingan-i, ‘Dŭhnyah nyindŭk kieh; kieh ati raru kudus re angān tama!’ Aku dŭh tan kiris daya adi mun anŭ; baji Ku di ngara mbŭh keya ka apui adi dŭh bisa pura.

⁶“Aku mbŭh natu re ngukum ngara, ka ukum yŭn ngara mbŭh dog nuris. Aku dŭh re tandah kayuh adi mbŭh ngara ndai, pak re maras di ngara

⁷dosa ngara ngga dosa tayung-babuk ngara. Ngara mbŭh badang kimanyan di bari-sambah adat karŭm di sandah ka ngamun Aku. Ngapŭi Aku re ngukum ngara nanyam patut yŭn pingandai adŭp ngara.”

⁸TUHAN nang, “Mating daya pirusak buwa anggor adi kana; ngga ngara ndai wain kidŭ-i. Dŭh gŭh Aku re pirabur sopŭrŭg daya Ku, pak re nyiramat ngara adi bituan di Aku.

⁹Aku re nyiberkat bara daya Israel adi so tibaran-asar Judah, ka sesang ngara re dapŭd tarun tana darŭd Ku. Daya adi Aku mbŭh mien, adi bituan di Aku, re rŭŭ diginŭ.

¹⁰ Ngara re nyambah Aku ka re nguru biri biri ngga sapi sapi ngara ka tarun tana kupai di Rabak Sharon di parad ka barat ka di Rubān Pinyusah di parad ka timor.

¹¹“Pak-i dŭh re simŭnŭ di angān adi tagan Aku, adi dŭh piduri Zion, sandah kudus Ku, ka adi nyambah Gad ngga Meni, adi tapa nasip ngga tapa pinyusah.

¹²Angān re kabŭs dog siŭ ngga pedang, sabab angān dŭh nam kan Aku bagan bait dingah kan Aku minyu. Angān mbŭh raan dŭ nyibireu Aku ka ndai arap.

¹³Ngapŭi meh Aku kidaan di angān, ngara adi nyambah ka tunda pinganang Ku re biyŭn bagŭ kayuh man ngga kayuh nok, pak angān re sibŭrŭk ka badŭh asŭng. Ngara re gaŭn, pak angān re dog pimangŭh.

¹⁴Ngara re biragu amai gaŭn, pak angān re sien amai susah.

¹⁵Daya Ku adi Aku mbŭh mien re pakai dŭn ngan ndu pangu. Aku, adi TUHAN Raja, re siŭ angān. Pak Aku re nggen dŭn adi bauh di ngara adi nundok di Aku.

¹⁶Daya adi rŭŭ di tarun tana anŭ adi mite berkat re mite dog nyiberkat Tapa adi tŭtŭd. Asi asi adi bipayu re bipayu pakai adŭn Tapa adi tŭtŭd. Pinyusah adi mbŭh ripas re miyap ka dog kambŭt.”

¹⁷ TUHAN nang, “Aku napa ong bauh ngga rangit bauh. Kayuh adi mbŭh ripas re abo dog kambŭt.

¹⁸Gaŭn ka pawŭn adu adu yŭn kayuh adi Aku napa. Jerusalem bauh adi Aku ndai re puno ngga pinyigaŭn, ka daya-i re sanang.

¹⁹ Adŭp Ku re gaŭn sabab Jerusalem ngga daya-i. Diginŭ re mating puās bait mite turung.

²⁰Anak anak pira re dŭh tia kabŭs kan-i gibabŭ duwŭh taruh andu umbur-i, ka sopŭrŭg daya re tui udip. Ngara adi udip ndŭg ka siratus sawa umbur-i re dog nyirundeng babŭ mara. Kabŭs awar mbŭh tandā Aku mbŭh ngukum ngara.

²¹Daya re pijog ramin ka rŭŭ dieh; ramin ramin anŭ re dŭh yŭn daya bŭkŭn rŭŭ. Ngara re ndai teya anggor ka dapŭd wain so dieh; wain anŭ re dŭh dog nok daya bŭkŭn. Ngara re puas kinyam kayuh adi mandŭg so turang udas adŭp ngara.

²³Ngara re mujur di kraja pingandai adŭp ngara, ka anak anak ngara re dŭh dog pinyirusag. Aku re nyiberkat ngara samŭn sesang ngara ndŭg situi tui.

²⁴Diŭ so ngara ko bidua ka Aku, Aku re nam dua ngara.

²⁵ Kasong tarun ngga anak anak biri re samah man; singah re man siriyang mun sapi, ka jippŭh re man dabu tana. Di Zion, sandah kudus[80] Ku, re mating kayuh adi bisā bait kayuh adi arap.”