Read Biatah Bidayuh ISAIAH 66 Bible Online

ISAIAH 66 - Biatah Bidayuh bible

ISAIAH 66

¹ TUHAN nang, “Rangit inŭh takta Ku, ka ong inŭh bangan kaja Ku. Ramin adi munki an ngan pijog yŭn Ku, tarun yŭn adi munki re Aku yŭn rŭŭ?

²Adŭp Ku napa rangit ngga ong! Aku munos asŭng di ngara adi pirapat adŭp-i ka adi marik pimudip-i pari ka Aku, adi taru ka nundok di Aku.

³“Daya ndai urah ngga suka asŭng ngara. Sopŭrŭg-i brimun di ngara, bait-i ngara siŭ dari sapi ndu sadis puan kah nyadis manusia; bait-i ngara nyadis anak biri puan kah mata tungo kasong; bait-i ngara jugan sadis ruwang kayuh puan kah deya ayo; bait-i ngara jugan kimanyan puan kah nyambah tibudo. Ngara suka bisambah ngga gaya adi sipŭ mun anŭ.

⁴Jadi Aku re bada pinyirusag nyatŭk ngara, kayuh adi ngara taru, sabab mating daya nam kan Aku bagan bait dingah kan Aku minyu. Ngara raan dŭ nyibireu Aku ka ndai arap.”

⁵Dingah kayuh adi TUHAN nang, angān adi taru Ayŭh ka adi dingah pinganang-I: “Sabab angān tŭtŭd di Aku, agi so daya adŭp ngan re tiru di angān ka re tirawan angān. Ngara nyirimbe angān ka nang, ‘Bada TUHAN kiren di angān bās-I ka nyiramat angān, isa kieh bisa kiris angān pawŭn.’ Pak adŭp ngara inŭh adi re dog pimangŭh!

⁶Dingah! Jawŭn anŭ adi bana darŭm kupo, jawŭn darŭm Ramin TUHAN, inŭh jawŭn TUHAN ngukum pinganyu-I!

⁷ “Kupo Ku inŭh keya ka dayung adi gŭgŭh biranak, dŭh naman sarang andam biranak.

⁸Mbŭh kah daya kiris bait dingah kayuh adi mun anŭ? Mbŭh kah bangsa dog biranak ndi andu? Zion re dŭhsah tui sangsara, diŭ so bangsa anŭ dog biranak.

⁹Dŭhnyah pikir Aku re nyibandar daya Ku dog bite ndŭg ka sukup buran-i, ka dŭh bada-i dog biranak.” TUHAN mbŭh minyu.

¹⁰Gaŭn ngga Jerusalem, angān adi rindu kupo anŭ! Gaŭn ngga ayŭh madin, sopŭrŭg ngan adi ko muās ayŭh!

¹¹Angān re kinyam pimujur-i, keya ka anak-sŭ kinyam sisuh sindŭ-i.

¹²TUHAN nang, “Aku re bada angān adu adu mujur; pinyikaya sopŭrŭg bangsa re aman ka angān mun sungi adi dŭh bisa badŭh. Angān re keya ka anak-sŭ adi dog nyisuh sindŭ-i, dog puko, ka dog sita ngga pinyirindu.

¹³Aku re nyaduh angān di Jerusalem, nimun sindŭ nyaduh anak-i.

¹⁴Kan angān kiris kayuh anŭ, angān re gaŭn; kayuh anŭ re bada angān bake ka bua sanang. Komŭnŭ angān re puan nang Aku, adi TUHAN, turung ngara adi nundok di Aku, ka Aku re kiren baji Ku di pinganyu Ku.”

¹⁵TUHAN re mandŭg ngga apui. Ayŭh re mandŭg ngga sabak ribut di ngukum ngara adi yŭn-I baji.

¹⁶Ngga apui ngga pedang Ayŭh ngukum sopŭrŭg daya di ong adi Ayŭh dapŭd sarah; ka bagŭ re dog siŭ.

¹⁷TUHAN nang, “Pinŭbŭn-i mbŭh sindŭk yŭn ngara adi pibisig adŭp ngara yŭn bisambah adat karŭm, adi baris panu ka teya pirapu',[81] ka adi man dagin ayo ngga dagin babu, ngga pinguman adi bŭkŭn adi sembar.

¹⁸Aku puan[82] pikir-kira ngga pingandai ngara. Aku mandŭg[83] di nguruk daya so sopŭrŭg bangsa. Kan ngara samah mandŭg, ngara re kiris kayuh adi kuasa Ku dapŭd ndai

¹⁹ka re puan nang Aku ati inŭh adi ngukum ngara. “Pak Aku re nyiramat kada so ngara, ka pait ngara ka bangsa bangsa di rais rais adi jo adi bŭn dingah pasar Aku adi timagah, bait kiris bās Ku ngga kuasa Ku: ka Spain, Libya,[84] ngga Lydia, ngga bara adi pandai nimbak reja-panah, ka Tubal ngga Greece. Di dupan bangsa bangsa anŭ ngara re piagah bās Ku.

²⁰Ngara re taban pari sopŭrŭg dingan ngan adi samah daya Israel so rais rais anŭ ndu pinganggen di Aku. Ngara re taban ngara ka sandah kudus[85] Ku di Jerusalem nunggang kuda, kuda pinakan kaldi, ka onta, ka nambang krita kuda ngga tibande krita-sapi, nimun daya Israel taban sadis ruwang kayuh ka Ramin TUHAN darŭm bŭrŭh bŭrŭh adi bisig nanyam ka adat.

²¹Aku re bada kada so ngara jadi imam ngga daya Levi.

²² “Nimun ong bauh ngga rangit bauh re tan tui amai kuasa Ku, simŭnŭ gŭh sesang ngan ngga dŭn ngan re tan tui.

²³Ngga barang Gawai Anak Buran ka barang andu Sabbath, daya so barang bangsa re mandŭg di nyambah Aku di Jerusalem,” nang TUHAN.

²⁴ “Darŭm ngara mari, ngara re kiris tadang tadang ngara adi ko rawan matah Aku. Ŭrŭd adi man ngara re dŭh bisa kabŭs, ka apui adi badang ngara re dŭh bisa pura. Di batŭh sopŭrŭg bangsa manusia, kayuh adi mun anŭ inŭh kayuh adi tikŭnŭd daya kiris.”