Read Biatah Bidayuh LEVITICUS 15 Bible Online

LEVITICUS 15 - Biatah Bidayuh bible

LEVITICUS 15

¹TUHAN nggen di Moses ngga Aaron atur-adat ati

²yŭn daya Israel: Kan buat dari bijire, jire anŭ inŭh kais,

³bait-i bijire puan kah bitabat bada-i.

⁴Tadŭ tadŭ ambok adi yŭn dari anŭ guru puan kah guring inŭh kais.

⁵Tadŭ tadŭ daya adi tama ambok-i

⁶puan kah guru di tadŭ kayuh di arok dari anŭ guru dŭh siŭn dŭh ngu piraka-i ka mamuh adŭp-i, ka ayŭh gibabŭ kais ndŭg singumi andu.

⁷Daya adi tama daya adi bijire buat-i dŭh siŭn dŭh ngu piraka-i, ka mamuh adŭp-i; ka ayŭh gibabŭ kais ndŭg singumi andu.

⁸Kambŭi daya anŭ adi bijire buat-i nyiruja daya adi bisig nanyam ka adat, daya anŭ dŭh siŭn dŭh ngu piraka-i, ka mamuh adŭp-i, ka ayŭh gibabŭ kais ndŭg singumi andu.

⁹Tadŭ tadŭ tapas-pinyiguru pinunggang kuda bait tadŭ yŭn guru adi muko dari anŭ guru dieh inŭh kais.

¹⁰Tadŭ daya adi tama tadŭ kayuh adi dari anŭ ko yŭn guru inŭh kais ndŭg singumi andu. Tadŭ daya adi kabis puan kah gŭrŭng tadŭ kayuh adi dari anŭ muko yŭn guru, dŭh siŭn dŭh ngu piraka-i, mamuh adŭp-i; ka ayŭh gibabŭ kais ndŭg singumi andu.

¹¹Kambŭi dari adi bijire buat-i anŭ tama ndi naan so angān sibayuh ayŭh ngu tangan-i; angān dŭh siŭn dŭh ngu piraka ngan ka mamuh adŭp ngan; ka angān gibabŭ kais ndŭg singumi andu.

¹²Tadŭ tadŭ priok tana adi dari anŭ tama dŭh siŭn dŭh dog mape, ka tadŭ makuk adi dog ndai so kayuh adi ayŭh muko tama dŭh siŭn dŭh dog ngu.

¹³Ripas dari anŭ mbŭh bua ka dŭh tia bijire buat-i, ayŭh dŭh siŭn dŭh kajŭn sitian ju andu dawŭ-i, komŭnŭ ka ayŭh ngu piraka-i ka mamuh adŭp-i ngga piin bisig adi so rubang piin, komŭnŭ ayŭh jadi bisig nanyam ka adat.

¹⁴Di andu adi mai, ayŭh siŭn tambit duwŭh manuk asang puan kah duwŭh manuk tikukur ka taban ka tiban Bari TUHAN ka nggen di imam.

¹⁵Imam anŭ siŭn jugan ndi so manuk anŭ yŭn sadis taran dosa, ka manuk anŭ adi ndi yŭn sadis badang. Simŭnŭ inŭh ayŭh pimanu adat pibisig yŭn dari anŭ.

¹⁶Kan dari kinyam piin bine-i ruah, ayŭh dŭh siŭn dŭh mamuh ndi pŭrŭng ganan-i, ka ayŭh gibabŭ kais ndŭg singumi andu.

¹⁷Tadŭ kayuh adi dog ndai so banang puan kah birurang adi dog niteg piin bine anŭ dŭh siŭn dŭh dog ngu, ka-i gibabŭ kais ndŭg singumi andu.

¹⁸Ripas ko nyibŭŭs ngga dingan-i, dari ngga dayung dŭh siŭn dŭh mamuh, ka ngara gibabŭ kais ndŭg singumi andu.

¹⁹Kan dayung kais nandā buran-i, ayŭh kais ndŭg ju andu. Tadŭ daya adi tama ayŭh inŭh kais ndŭg singumi andu.

²⁰Tadŭ tadŭ kayuh adi yŭn-i guru puan kah guring di tipuh ayŭh kais nandā buran-i inŭh kais.

²¹Tadŭ daya adi tama ambok-i puan kah tadŭ kayuh adi yŭn-i guru dŭh siŭn dŭh ngu piraka-i ka mamuh, ka ayŭh gibabŭ kais ndŭg singumi andu.

²⁴Kambŭi dari nyibŭŭs ngga ayŭh di tipuh ayŭh dog buran-i, dari anŭ mbŭh sua kais da pinyikais-i ka gibabŭ kais sitŭkŭd ju andu, ka tadŭ ambok adi yŭn dari anŭ guring inŭh kais.

²⁵Kambŭi deya dayung anŭ babŭ ruah kudu kudu andu ripas tipuh ayŭh kais nandā buran-i puan kah deya-i dŭh rŭŭ ruah ripas tipuh nimun biasa ayŭh kais nandā buran-i, ayŭh babŭ kais sitŭkŭd deya anŭ babŭ ruah, nimun di tipuh ayŭh kais nandā buran-i.

²⁶Tadŭ ambok adi yŭn-i guring ka tadŭ kayuh adi yŭn-i guru di tipuh anŭ inŭh kais.

²⁷Tadŭ daya adi tama kayuh kayuh anŭ dŭh siŭn dŭh ngu piraka-i ka mamuh; daya anŭ kais ndŭg singumi andu.

²⁸Ripas deya-i mbŭh rŭŭ, dayung anŭ dŭh siŭn dŭh kajŭn ju andu; ko anŭ ka ayŭh re bisig nanyam ka adat.

²⁹Di andu adi mai ayŭh siŭn taban duwŭh manuk asang puan kah duwŭh manuk tikukur ka yŭn imam di tiban Bari TUHAN.

³⁰Imam anŭ siŭn jugan ndi so manuk anŭ ndu sadis taran dosa, ka anŭ ndi ndu sadis badang; ngga simŭnŭ ayŭh pimanu adat pibisig yŭn-i.

³¹TUHAN kidaan di Moses da bakan daya Israel pasar pinyikais ngara, isa ngara dŭh nyembar Bari TUHAN, adi mbŭh di tura ka yun tarun yŭn ngara bibari. Kambŭi ngara nyembar-i, ngara re dog siŭ.

³²Anŭ inŭh atur-adat pasar dari adi bijire buat-i ka pasar dari adi ruah piin bine-i,

³³ka pasar dayung di tipuh kais nandā buran-i, ka pasar dari adi nyibŭŭs ngga dayung adi kais nanyam ka adat.