Read Biatah Bidayuh LEVITICUS 18 Bible Online

LEVITICUS 18 - Biatah Bidayuh bible

LEVITICUS 18

¹TUHAN kidaan di Moses

²da minyu di daya Israel nang, “Aku ati TUHAN adi Tapa ngan.

³Dŭhnyah tunda urah-rakah daya Egypt, rais adi yŭn angān ko rŭŭ, puan kah urah-rakah daya di tarun tana Canaan, tarun adi ka Aku aŭn taban angān madin.

⁴Tunda Ukum-adat Ku ka ndai nimun pesan Ku. Aku ati adi TUHAN Tapa ngan.

⁵ Tunda urah ngga ukum-adat adi Aku nggen di angān; angān re nyiramat asŭng ngan kambŭi angān ndai simŭnŭ. Aku ati TUHAN.”

⁶TUHAN nggen atur-adat ati: Dŭhnyah nyibŭŭs ngga tadŭ tadŭ jurud madis ngan.

⁷Dŭhnyah nyibŭŭs ngga sindŭ ngan ngga pimangŭh sama ngan. Dŭhnyah pimangŭh sindŭ adŭp ngan.

⁸ Dŭhnyah nyibŭŭs ngga tadŭ tadŭ sawŭn sama ngan adi bŭkŭn ngga pimangŭh ayŭh.

⁹ Dŭhnyah nyibŭŭs ngga jurud ngan adi dayung, puan kah jurud tiri ngan adi dayung, bait-i dog kudip samah puan kah dŭh di rawang ngan.

¹⁰Dŭhnyah nyibŭŭs ngga sukuh ngan adi dayung; anŭ re nggen mangŭh di adŭp ngan.

¹¹Dŭhnyah nyibŭŭs ngga jurud dayung ngan adi dog biranak so sindŭ puan kah sama adi dŭh samah ngga adŭp ngan; ayŭh anŭ mbŭh jurud adŭp ngan gŭh.

¹² Dŭhnyah nyibŭŭs ngga tua dayung ngan, bait-i sude dayung sama ngan puan kah sude dayung sindŭ ngan.

¹⁴Dŭhnyah nyibŭŭs ngga sawŭn tua dari ngan; ayŭh anŭ mbŭh tua ngan gŭh.

¹⁵ Dŭhnyah nyibŭŭs ngga iban dayung ngan,

¹⁶ puan kah ngga sawŭn jurud dari ngan.

¹⁷ Dŭhnyah nyibŭŭs ngga anak dayung puan kah sukuh dayung nyamba dayung adi muko kuu ngga nyibŭŭs amai bikada kani kuu ngga ngara; gŭt kuu mbŭh raban meh rai-i.

¹⁸Dŭhnyah tambit ndu sawŭn sude bait kaka sawŭn mu sitŭkŭd sawŭn mu gibabŭ udip.

¹⁹ Dŭhnyah nyibŭŭs ngga dayung adi aŭn kais nandā buran-i, amai ayŭh mbŭh kais nanyam ka adat.

²⁰ Dŭhnyah nyibŭŭs ngga sawŭn daya; anŭ re bada kuu kais nanyam ka adat.

²¹ Dŭhnyah nggen tadŭ tadŭ anak ngan ndu sadis ka tapa Molech, sabab anŭ re nggen mangŭh di adŭn Tapa adi TUHAN.

²² Mating dari siŭn bisiket ngga dari. Tapa tiru di kayuh anŭ.

²³ Mating dari bait dayung siŭn birambang ngga dāng. Urah arap adi mun anŭ bada angān jadi kais nanyam ka adat.

²⁴Dŭhnyah kinais adŭp ngan ngga tadŭ pingandai adi mun anŭ, amai simŭnŭ inŭh bangsa adi muko rŭŭ di Canaan kinais adŭp-i. Anŭ inŭh sabab TUHAN pibu ngara so nŭ, isa angān bisa mŭrŭt ka rŭŭ diginŭ.

²⁵Kraja pingandai ngara kinais tarun tana anŭ; sabab anŭ TUHAN ngukum tarun tana anŭ ka bada-i tirawan daya adi rŭŭ diginŭ.

²⁶Ngara ndai sopŭrŭg pingandai kais anŭ ngga bada tarun tana anŭ kais, pak angān dŭh siŭn ndai simŭnŭ. Sopŭrŭg ngan, daya Israel bait daya pinami adi rŭŭ di ruang ngan, dŭh siŭn dŭh sita ukum adat ngga pesan TUHAN,

²⁸isa tarun tana anŭ dŭh tirawan angān nimun-i mbŭh tirawan bangsa adi muko rŭŭ diginŭ dawŭ-i.

²⁹Angān puan nang asi asi adi ndai tadŭ mun pingandai kais anŭ re dŭh tia dog nyirundeng ndi so daya Tapa.

³⁰Ka TUHAN nang, “Tunda pesan adi Aku nggen ka dŭhnyah tunda kraja pingandai daya adi muko rŭŭ di tarun tana anŭ diŭ so angān, ka dŭhnyah kinais adŭp ngan ngga tadŭ pingandai adi mun anŭ. Aku ati TUHAN adi Tapa ngan.”