Read Biatah Bidayuh LEVITICUS 19 Bible Online

LEVITICUS 19 - Biatah Bidayuh bible

LEVITICUS 19

¹TUHAN kidaan di Moses

² da minyu di sopŭrŭg daya Israel, “Jadi kudus meh angān amai Aku adi TUHAN Tapa ngan taŭn kudus.

³ Barang naan angān dŭh siŭn dŭh stabi di sindŭ sama ngan, ka dŭh siŭn dŭh sita andu Sabbath nanyam adi mbŭh Aku pesan. Aku ati TUHAN adi Tapa ngan.

⁴ “Dŭhnyah nyipunok Aku ka manyah tibudō; dŭhnyah ndai tapa so basi ka nyambah-i. Aku ati TUHAN adi Tapa ngan.

⁵“Kan angān siŭ dāng yŭn sadis bidingan, sita atur-adat adi muko Aku nggen di angān ka Aku re kambat sadis ngan anŭ.

⁶Dagin-i dŭh siŭn dŭh dog man di andu dāng anŭ dog siŭ puan kah di andu sipagi. Kambŭi agi dŭm di andu girundi dagin anŭ dŭh siŭn dŭh dog badang bada rŭpŭg,

⁷amai-i kais nanyam ka adat, ka kambŭi daya man-i, Aku dŭh re trima sadis anŭ.

⁸Tadŭ daya adi man-i mbŭh sarah amai ayŭh mbŭh bada kayuh adi muko dog jugan ka Aku jadi kayuh braŭn, ka ayŭh dŭh re tia dog nyirundeng daya Ku.

⁹ “Kan angān ngatŭm ŭmŭh ngan, dŭhnyah kapŭg anŭ adi di irah ŭmŭh, ka dŭhnyah pari di sun reru.

¹⁰Dŭhnyah pari ka kudak teya anggor ngan di sun reru puan kah anŭ adi mbŭh rabu. Tingge nŭh yŭn daya adi sirata ngga daya pinami. Aku ati TUHAN adi Tapa ngan.

¹¹ “Dŭhnyah naku puan kah ngakar puan kah kadong.

¹² Dŭhnyah bijanji ngga adŭn Ku kambŭi angān dŭh re sita janji ngan anŭ; amai anŭ nggen mangŭh di adŭn Ku. Aku ati TUHAN adi Tapa ngan.

¹³ “Dŭhnyah mirupak puan kah kinanyuh tadŭ daya. Dŭhnyah bitan gaji daya adi nyiraja yŭn ngan, ndi ngarŭm dŭhnyah gŭh.

¹⁴ Dŭhnyah mangu daya adi bangam puan kah na kayuh di aran daya adi karak ngga bada ayŭh sikak. Tunda pinganang Ku; Aku ati TUHAN adi Tapa ngan.

¹⁵ “Ndai anŭ adi batur ka dŭhnyah marad kan angān ngatur har daya; dŭhnyah marad ngga tadŭ daya, bait-i daya sirata puan kah daya kaya.

¹⁶Dŭhnyah pigarau pinganang kadong pasar daya; ka kan daya dog bisara dŭhnyah nggen taksi kadong adi re bada ayŭh dog ukum kabŭs. Aku ati TUHAN adi Tapa ngan.

¹⁷ “Dŭhnyah bidendam ngga tadŭ daya, pak nyirase garog ngan ngga ngara, isa angān dŭh bidosa sabab ngara.[8]

¹⁸ Dŭhnyah maras dendam di tadŭ daya bait adu adu tiru di daya, pak rindu daya nimun angān rindu adŭp ngan. Aku ati TUHAN.

¹⁹ “Tunda pesan Ku. Dŭhnyah pisawan duwŭh masam dāng adi angān kudip. Dŭhnyah purun duwŭh masam bine darŭm ndi ŭmŭh. Dŭhnyah nēn piraka adi dog ndai so duwŭh masam tiburi.

²⁰“Kambŭi dayung urun adi mbŭh traŭn dayung nyikŭn ndi naan dari ka gibayuh dog bayar yŭn dog pirupas, ka kambŭi dari adi bŭkŭn nyibŭŭs ngga ayŭh, ngara duwŭh siŭn dog ukum, pak dŭh[9] dog ukum kabŭs amai dayung anŭ dayung urun.

²¹Dari anŭ siŭn taban dari biri ka tiban Bari Ku ndu sadis bayar gati rugi,

²²ka ngga dari biri anŭ imam siŭn pimanu adat pibisig ngga kadi dosa dari anŭ, ka Tapa re apun ayŭh.

²³“Di tika angān mandŭg mŭrŭt tarun tana Canaan ka purun tadŭ masam tŭngŭn pimuruh, nyirundeng meh buwa kayuh anŭ agi kais nanyam ka adat sitadŭn sibungas tipuh taruh sawa. Darŭm tipuh anŭ angān dŭh siŭn man-i.

²⁴Di sawa adi pat sopŭrŭg buwa-i siŭn dog jugan ndu tandā trima kaseh ngan di Aku, adi TUHAN.

²⁵Pak di sawa adi rimŭh angān siŭn man buwa-i. Kambŭi angān ndai simŭnŭ, tŭngŭn tŭngŭn kayuh ngan re buān rabis bagŭ buwa. Aku ati TUHAN adi Tapa ngan.

²⁶ “Dŭhnyah man tadŭ dagin adi gibabŭ bideya. Dŭhnyah ndai biruri karŭm.

²⁷ Dŭhnyah kapŭg ubok di panding ngan bait mŭpŭd gagap ngan

²⁸puan kah mringai bait nidi pŭrŭng ganan ngan kan muās daya kabŭs. Aku ati TUHAN.

²⁹ “Dŭhnyah pimangŭh anak anak dayung ngan bada ngara jadi dayung sundar bari-sambah;[10] kambŭi angān ndai simŭnŭ, angān re tunda tapa tapa bŭkŭn ka tarun tana anŭ re puno ngga kraja pingandai kais.

³⁰ Sita andu Sabbath, ka stabi di tarun adi yŭn Aku dog nyambah. Aku ati TUHAN.

³¹ “Dŭhnyah mite pinyitayan so daya adi bisiken ngga roh daya adi mbŭh kabŭs. Kambŭi angān ndai simŭnŭ angān re jadi kais nanyam ka adat. Aku ati TUHAN adi Tapa ngan.

³²“Kiren adŭp nŭŭh biradat di daya adi mbŭh minyamba ka stabi di ngara. Ngga stabi tunda pinganang Ku; Aku ati TUHAN.

³³ “Dŭhnyah kinanyuh daya pinami adi rŭŭ di tarun tana ngan.

³⁴Ndai di ngara nimun angān ndai di daya Israel, ka rindu ngara nimun angān rindu adŭp ngan. Ingat adŭp ngan muko jadi daya pinami gŭh di Egypt. Aku ati TUHAN adi Tapa ngan.

³⁵ “Dŭhnyah ngakar tadŭ daya pakai pingŭkŭd, timbang, ka takar adi sarah.

³⁶Pakai dasin adi batur, timbang adi batur, ka pingŭkŭd adi batur. Aku ati TUHAN adi Tapa ngan, ka Aku adi taban angān ngga ruah so Egypt.

³⁷Tunda sopŭrŭg ukum-adat ngga pesan Ku. Aku ati TUHAN.”