Read Biatah Bidayuh LEVITICUS 21 Bible Online

LEVITICUS 21 - Biatah Bidayuh bible

LEVITICUS 21

¹TUHAN pesan Moses da kidaan di bara imam adi so asar Aaron, “Imam dŭh siŭn kinais adŭp-i sua di ka adat nyikubur kan madis-i kabŭs,

²adŭ-i kambŭi sianŭ adi kabŭs sindŭ-i puan kah sama-i, anak dari-i, anak dayung-i, jurud dari-i,

³puan kah jurud dayung-i adi dŭh banan adi rŭŭ di arŭn-i.

⁴Ayŭh dŭh siŭn kinais adŭp-i, di pinyikabŭs ngara adi ngga-i bimadis so ka banan sawan.

⁵ “Imam dŭh siŭn gumbak tadŭ tadŭ parad ubak-i puan kah mŭpŭd gagap-i, puan kah nidi pŭrŭng ganan-i, ngga kiren adŭp-i ngurid.

⁶Ayŭh dŭh siŭn dŭh an bada adŭp-i kudus, ka dŭhnyah pimangŭh adŭn Ku. Ayŭh an jugan sadis pinguman ka Aku, ka sabab anŭ ayŭh dŭh siŭn dŭh an kudus.

⁷Imam dŭh siŭn sawŭn dayung adi muko jadi dayung sundar, puan kah dayung adi dŭh tibŭn, puan kah dayung adi mbŭh dog taran banŭh-i; ayŭh inŭh kudus.

⁸Daya dŭh siŭn dŭh an nyirundeng nang imam kudus, amai ayŭh adi jugan sadis pinguman ka Aku. Aku ati TUHAN, ka Aku inŭh kudus, ka Aku bada bara daya Ku kudus.

⁹Kambŭi anak dayung imam jadi dayung sundar, ayŭh pimangŭh sama-i; dayung anŭ an dog badang ndŭg ka kabŭs.

¹⁰“Inyo kudus muko dog ren di tunduh ubak imam bās, ka ayŭh muko dog nyikudus, ka bisa nēn piraka imam, sabab anŭ ayŭh dŭh siŭn tandah ubok-i binyas binyas, puan kah nyiratak piraka-i ngga kiren adŭp-i ngurid.

¹¹Ayŭh muko dog garar yŭn Ku, ka dŭh siŭn kinais adŭp-i, ka dŭh gŭh patut nyembar Bari kudus Ku darŭm-i bu so nŭ ka radus mŭrŭt ramin adi agi tadang daya dieh, bait-i tadang sama-i puan kah sindŭ-i.

¹³Ayŭh patut sawŭn dayung adi tibŭn,

¹⁴ka dŭh dayung uban, puan kah dayung adi mbŭh dog taran banŭh-i, puan kah dayung adi muko jadi sundar. Ayŭh patut sawŭn dayung adi tibŭn adi so tibaran adŭp-i;

¹⁵amai bara anak-i adi patut jadi kudus, re jadi kais nanyam ka adat rai-i. Aku ati TUHAN, ka Aku inŭh adi nyidŭrŭ ayŭh da jadi Imam Bās.”

¹⁶TUHAN pesan Moses,

¹⁷da kidaan di Aaron, “Mating katŭn so bara sesang mu adi kika pŭrŭng ganan-i siŭn jugan sadis pinguman ka Aku. Atur ati re simŭnŭ adu adu.

¹⁸Daya adi kika pŭrŭng ganan-i dŭh siŭn jugan sadis: daya adi karak, adi bajang, puan kah adi bawa;

¹⁹dŭh-i siŭn daya adi mabŭs tangan-i puan kah daya adi kipang;

²⁰dŭh-i siŭn daya adi mudug puan kah adi sŭ mun baji; dŭh-i siŭn daya adi dog andam batŭh puan kah andam kurit; ka dŭh-i siŭn daya adi muko dog nuroi.

²¹Sesang Aaron adi agi kika di pŭrŭng ganan-i dŭh siŭn jugan sadis pinguman ka Aku.

²²Daya adi mun anŭ siŭn man pinguman adi dog jugan ka Aku, sadis pinguman adi kudus ngga anŭ adi raru kudus,

²³pak sabab ayŭh agi kika di pŭrŭng ganan-i, ayŭh dŭh siŭn mandŭg nyindŭk tabir kudus, puan kah tudu mija-sambah. Ayŭh dŭh siŭn kinais kayuh kayuh anŭ adi kudus, sabab Aku ati TUHAN ka Aku bada sopŭrŭg kayuh anŭ kudus.”

²⁴Anŭ inŭh kayuh adi Moses nang di Aaron, ngga di anak anak dari-i, ngga di sopŭrŭg daya Israel.