Read Biatah Bidayuh LEVITICUS 22 Bible Online

LEVITICUS 22 - Biatah Bidayuh bible

LEVITICUS 22

¹TUHAN pesan di Moses,

²da kidaan di Aaron ngga di anak anak dari-i, “Angān sikari kari dŭhnyah pimangŭh adŭn Ku adi kudus, ngapŭi angān an stabi di sopŭrŭg sadis kudus adi daya Israel nitah ka Aku. Aku ati TUHAN.

³Kambŭi tadŭ tadŭ so sesang ngan sitadŭn-i gibabŭ kais nanyam ka adat, mandŭg nyindŭk sadis kudus adi daya Israel mbŭh nitah ka Aku, ayŭh dŭhnyah tia ndai kraja di mija-sambah. Atur ati an adu adu dog tunda. Aku ati TUHAN.

⁴“Daya adi so sesang Aaron adi dog andam kurit adi bisā puan kah adi bijire buat-i dŭh siŭn man sadis kudus ndŭg ka ayŭh mbŭh bisig nanyam ka adat. Tadŭ tadŭ imam mbŭh jadi kais kambŭi-i tama kayuh adi kais adi ko dog tadang, puan kah kambŭi piin bine-i ruah,

⁵puan kah kambŭi ayŭh agi tama dāng bait manusia adi kais.

⁶Tadŭ tadŭ imam adi mbŭh kais taŭn babŭ kais ndŭg singumi andu, ka sunggu-i simŭnŭ ayŭh gibabŭ dŭh siŭn man sadis kudus ndŭg ka ayŭh muko mamuh.

⁷Ripas batŭh andu mbŭh simŭdŭp ka ayŭh mbŭh jadi bisig, ka ayŭh bisa man sadis kudus anŭ, adi taŭn mbŭh pinguman-i.

⁸Ayŭh dŭh siŭn man dagin dāng adi kabŭs sadi-i, puan kah adi dog siŭ dāng tarun; anŭ re bada ayŭh kais. Aku ati TUHAN.

⁹“Sopŭrŭg imam siŭn sita atur atur-adat adi Aku muko nggen; amai kambŭi dŭh, ngara sarah ka re kabŭs, sabab ngara nyibireu atur-adat kudus. Aku ati TUHAN, ka Aku adi bada ngara kudus.

¹⁰“Adŭ-i daya so rawang imam adi siŭn man tadŭ tadŭ sadis kudus; mating daya bŭkŭn siŭn, bait-i daya adi rŭŭ ngga imam, puan kah daya gaji-i.

¹¹Pak urun urun imam adi adŭp imam miris pakai duit adŭp-i, puan kah urun adi dog biranak di ramin-i, bisa sua man pinguman adi imam kambat.

¹²Anak dayung imam, kambŭi-i banŭh daya adi dŭh imam, dŭh siŭn man tadŭ tadŭ sadis kudus.

¹³Pak dayung adi mbŭh kabŭs banŭh-i, puan kah adi dog taran banŭh-i buang dŭh biyŭn anak ka pari rŭŭ di ramin sama-i adi imam ka bisangan di ayŭh, bisa man pinguman adi sama-i kambat. Adŭ-i daya so rawang imam bisa man pinguman anŭ.

¹⁴“Kambŭi tadŭ daya adi dŭh so rawang imam, tipasu man tadŭ tadŭ sadis kudus, ayŭh dŭh siŭn dŭh bayar ngga puno ka imam anŭ, ka nambah duwŭh puru piratus dinge.

¹⁵Imam dŭh siŭn nyembar sadis kudus,

¹⁶anŭ inŭh bada daya adi dŭh dog nyibandar sua man-i; anŭ bisa jadi sarah ka taban ukum di ngara. Aku ati TUHAN, ka Aku adi bada sadis anŭ kudus.”

¹⁷TUHAN pesan Moses,

¹⁸da nggen di Aaron ngga di anak anak dari-i samŭn sopŭrŭg daya Israel, atur-adat ati: Kan tadŭ daya Israel, puan kah tadŭ daya pinami adi rŭŭ di Israel, jugan sadis badang, bait-i ngga pijadi payu, puan kah ndu sadis adi dog jugan so pinyiraan atin adŭp, dāng anŭ dŭh siŭn dŭh an adi pidanah.

¹⁹Ngga bada sadis anŭ dog trima, dāng anŭ dŭh siŭn dŭh dari adi pidanah.

²⁰ Kambŭi angān jugan dāng adi dŭh pidanah, TUHAN dŭh re trima-i.

²¹Kan tadŭ daya jugan sadis bidingan ka TUHAN, bait-i ngga pijadi payu, puan kah ndu sadis adi dog jugan so pinyiraan atin adŭp, dāng anŭ dŭh siŭn dŭh an adi pidanah kambŭi ayŭh raan-i dog trima.

²²Dŭhnyah jugan ka TUHAN tadŭ tadŭ dāng adi karak, puan kah adi bajang puan kah adi muko daya kapŭg kaja tangan-i bait pŭrŭng-i, puan kah bijire bakang-i, puan kah adi mirakis puan kah bibagi. Dŭhnyah jugan dāng dāng adi mun anŭ di tunduh mija-sambah ndu sadis pinguman.

²³Yŭn sadis adi dog jugan so pinyiraan atin adŭp, angān siŭn jugan dāng adi baruh puan kah adi dŭh paŭh ramus pidanah, pak dŭh-i dog trima kan ndu sadis adi ngga pijadi payu.

²⁴Dŭhnyah jugan ka TUHAN tadŭ tadŭ dāng adi mbŭh rusak girander-i, dŭh puan nang tawan puan kah pŭmŭs puan kah patŭd. Kayuh adi mun anŭ dŭh dog nyibandar di tarun tana ngan.

²⁵Dŭhnyah jugan dāng adi dog dapŭd so tami ndu sadis pinguman. Dāng adi mun anŭ inŭh dog nyirundeng dŭh pidanah ka dŭh dog trima.

²⁶Anak sapi, puan kah anak biri, puan kah anak kambing adi bauh dog biranak, dŭh siŭn dog tambit so sindŭ-i sitŭkŭd ju andu. Pak ripas tipuh anŭ ayŭh siŭn dog trima ndu sadis pinguman.

²⁸Dŭhnyah bijabag nyadis sapi ngga anak-i, biri ngga anak-i, puan kah kambing ngga anak-i darŭm ndi andu.

²⁹Kan angān jugan sadis trima kaseh ka TUHAN, tunda atur isa angān dog trima.

³⁰Kubo man sadis ngan di andu anŭ gŭh. Dŭhnyah bada dŭm ndŭg isan isan andu jawa ndi.

³¹TUHAN nang, “Tunda pesan Ku; Aku ati TUHAN.

³²Dŭhnyah pimangŭh adŭn Ku adi kudus; sopŭrŭg daya Israel dŭh siŭn dŭh ngaku Aku kudus. Aku ati TUHAN, ka Aku adi bada angān kudus;

³³ka Aku taban angān ruah so Egypt, jadi Tapa ngan. Aku ati TUHAN.”