Read Biatah Bidayuh LEVITICUS 4 Bible Online

LEVITICUS 4 - Biatah Bidayuh bible

LEVITICUS 4

¹TUHAN pesan Moses

²da kidaan di bara daya Israel nang tadŭ tadŭ daya adi ndai dosa ka miranggar ndi so pesan TUHAN ngga dŭh singaja, an sita atur adat ati.

³Kambŭi Imam Bās ndai dosa, ka bada sopŭrŭg daya sua sarah, ayŭh an taban dari sapi adi gi-mara ka pidanah, ka nyadis-i ka TUHAN yŭn dosa-i.

⁴Ayŭh an taban dari sapi anŭ ka rawa tiban Bari TUHAN, na tangan-i di tunduh ubak-i, ka siŭ-i diginŭ di rawa Bari anŭ.

⁵Komŭnŭ Imam Bās anŭ an taban kada deya dari sapi anŭ ka darŭm Bari anŭ.

⁶Ayŭh siŭn siruman trinju-i di deya anŭ, ka masik-i di jawin tabir kudus anŭ ju kari.

⁷Komŭnŭ, ayŭh an susen kada deya anŭ di junggir adi di sikuh mija-sambah kimanyan di darŭm Bari TUHAN. Ayŭh siŭn ren tadŭh deya anŭ di sigŭn mija-sambah adi yŭn badang sadis, adi di rawa tiban Bari TUHAN.

⁸So dari sapi anŭ ayŭh an kubo tambit ramak ramak-i, ramak ramak adi marut isi isi pŭrŭng-i,

⁹ka atin tipareng samŭn ramak ramak adi agi dieh, ka parad atin adi siabo kana.

¹⁰Imam anŭ an taban ramak ramak anŭ ka badang-i di tunduh mija-sambah adi yŭn badang sadis badang, mun adi ko-i ndai ngga ramak dāng adi dog siŭ yŭn sadis bidingan.

¹¹Pak ayŭh an tambit kurit-i, sopŭrŭg isin-i, ubak-i, kaja kaja-i ngga isi isi pŭrŭng-i, samŭn kuboi kuboi-i,

¹²Kubo taban-i ka sapa tarun yŭn bibari adi taŭn dog nitah yŭn-i, ka diginŭ ayŭh siŭn badang-i di tunduh apui uwang.

¹³Kambŭi-i sopŭrŭg daya Israel adi bidosa ka mbŭh sarah amai miranggar ndi so pesan TUHAN ngga dŭh singaja,

¹⁴ka kan dosa anŭ mbŭh dog puan, daya Israel an taban ndi dari sapi adi gi-mara ndu sadis taran dosa. Ngara siŭn taban-i ka rawa Bari TUHAN.

¹⁵Bara pinguru daya Israel an na tangan ngara di tunduh ubak dāng anŭ, ka siŭ-i diginŭ gŭh.

¹⁶Imam Bās siŭn taban kada deya sapi anŭ ka darŭm Bari TUHAN,

¹⁷siruman trinju-i dieh ka masik-i di jawin tabir ju kari.

¹⁸Ayŭh siŭn susen kada deya anŭ di junggir di sikuh sikuh mija-sambah kimanyan di darŭm Bari TUHAN, ka ren tadŭh deya anŭ di sigŭn mija-sambah adi yŭn badang sadis, adi agi di rawa tiban Bari TUHAN.

¹⁹Komŭnŭ, ayŭh siŭn tambit sopŭrŭg ramak-i ka badang-i di tunduh mija-sambah.

²⁰Ayŭh siŭn ndai simŭnŭ gŭh di dari sapi anŭ, nimun ayŭh mbŭh ndai di dari sapi yŭn sadis taran dosa, ka ngga gaya adi mun anŭ ayŭh ndai sadis yŭn dosa bara daya, ka ngara re dog apun.

²¹Komŭnŭ, ayŭh siŭn taban dari sapi anŭ ka sapa tarun yŭn bibari ka badang-i, nimun ayŭh badang dari sapi adi dog jugan yŭn dosa adŭp-i. Ati sadis ngga taran dosa daya Israel.

²²Kambŭi-i pinguru tibaran-asar adi ndai dosa ka mbŭh sarah amai miranggar ndi so pesan TUHAN ngga dŭh singaja,

²³ka kan ayŭh rasu rada sarah-i, ayŭh siŭn taban ndu pinganggen ndi dari kambing adi pidanah.

²⁴Ayŭh an na tangan-i di tunduh ubak dāng anŭ ka siŭ-i di tigang mija-sambah, tura ka utara di yŭn dāng dāng dog siŭ yŭn sadis badang. Ati inŭh sadis ngga taran dosa.

²⁵Imam siŭn siruman trinju-i di deya dāng anŭ, ka susen-i di junggir adi di sikuh sikuh mija-sambah, ka ren tadŭh deya anŭ di sigŭn mija-sambah.

²⁶Komŭnŭ, ayŭh siŭn badang sopŭrŭg ramak dāng anŭ, nimun ayŭh badang ramak ramak dāng adi dog siŭ yŭn sadis bidingan. Simŭnŭ inŭh imam jugan sadis ngga taran dosa pinguru tibaran-asar, ka ayŭh re dog apun.

²⁷ Kambŭi tadŭ tadŭ so angān adi daya saja ndai dosa ka mbŭh sarah amai miranggar ndi so pesan TUHAN ngga dŭh singaja,

²⁸ka kan ayŭh rasu rada sarah-i, ayŭh siŭn taban ndu pinganggen ndi dayung kambing adi pidanah.

²⁹Ayŭh an na tangan-i di tunduh ubak dāng anŭ, ka siŭ-i di tigang mija-sambah tura ka utara, di yŭn dāng yŭn sadis badang dog siŭ.

³⁰Imam an siruman trinju-i di deya dāng anŭ ka susen-i di junggir adi di sikuh sikuh mija-sambah, ka ren tadŭh deya anŭ di sigŭn mija-sambah.

³¹Komŭnŭ, ayŭh kadi ramak ramak-i, nimun ayŭh kadi ramak ramak dāng adi mbŭh dog siŭ yŭn sadis bidingan, ka-i badang ramak ramak anŭ di tunduh mija-sambah, isa dagŭn-i pimunos asŭng TUHAN. Simŭnŭ inŭh imam jugan sadis yŭn dosa daya anŭ ka ayŭh bisa dog apun.

³²Kambŭi angān taban ndi biri yŭn sadis taran dosa, anŭ dŭh siŭn dŭh an dayung adi pidanah.

³³Angān an na tangan ngan di tunduh ubak dāng anŭ, ka siŭ-i di parad tura ka utara mija-sambah adi yŭn dāng yŭn sadis badang dog siŭ.

³⁴Imam siŭn siruman trinju-i di deya dāng anŭ, susen-i di junggir adi di sikuh sikuh mija-sambah ka ren tadŭh deya anŭ di sigŭn mija-sambah.

³⁵Komŭnŭ, ayŭh siŭn kubo kadi ramak ramak-i nimun ayŭh kadi ramak ramak biri adi mbŭh dog siŭ yŭn sadis bidingan, ka badang ramak ramak anŭ di tunduh mija-sambah, samah ngga sadis pinguman adi dog jugan ka TUHAN. Simŭnŭ inŭh imam jugan sadis yŭn taran dosa ngan, ka angān siŭn dog apun.