Read Biatah Bidayuh LEVITICUS 5 Bible Online

LEVITICUS 5 - Biatah Bidayuh bible

LEVITICUS 5

¹Sadis taran dosa dog biguna yŭn sarah adi mun ati: Kambŭi angān dog bagan bada nggen taksi di yŭn daya bisara ka dŭh nggen puan pasar kayuh adi angān mbŭh kiris ka dingah, angān re dapu tanggong di sarah anŭ.

²Kambŭi angān ngga dŭh singaja tama tadŭ kayuh adi kais nanyam ka adat, mun tadang dāng, angān mbŭh kais ka sarah darŭm angān rada pingandai ngan anŭ.

³Kan angān ngga dŭh singaja tama tadŭ kayuh adi kais nanyam ka adat, adi so pŭrŭng ganan manusia, ani bait ani, angān mbŭh sarah darŭm angān rada pingandai ngan anŭ.

⁴Kambŭi angān nyimau mau adŭ bipayu yŭn tadŭ tadŭ kayuh, angān mbŭh sarah darŭm angān rada pingandai ngan anŭ.

⁵Kambŭi angān mbŭh sarah, angān dŭh siŭn dŭh ngaku sarah anŭ.

⁶Ngga ngukum adŭp ngan sabab sarah ngan, angān dŭh siŭn dŭh taban ka TUHAN ndi dayung biri, puan kah kambing ndu pinganggen. Imam siŭn jugan sadis anŭ yŭn dosa ngan.

⁷Kambŭi angān dŭh tungang jugan biri puan kah kambing, angān siŭn taban ka yŭn TUHAN ngga nubos dosa ngan duwŭh manuk asang puan kah tikukur, ndi yŭn sadis taran dosa, ndi yŭn sadis badang.

⁸Angān siŭn taban-i ka imam, ka ayŭh re diŭ jugan manuk anŭ yŭn sadis taran dosa. Ayŭh re mata tungo-i pak dŭh bada ubak-i patŭd,

⁹ka masik kada deya-i di tigang mija-sambah. Tadŭh deya anŭ siŭn dog paman di sigŭn mija-sambah. Ati inŭh sadis ngga taran dosa.

¹⁰Komŭnŭ, ayŭh siŭn jugan manuk anŭ ndi ndu sadis badang, nanyam atur-adat. Simŭnŭ inŭh imam jugan sadis yŭn dosa ngan; ka angān siŭn dog apun.

¹¹Kambŭi angān dŭh tungang jugan duwŭh manuk asang puan kah duwŭh tikukur, angān siŭn taban ndi kilogram tibaduk yŭn sadis taran dosa. Angān dŭh siŭn na inyo kanā puan kah kimanyan di tunduh-i, sabab-i sadis taran dosa, dŭh sadis ruwang kayuh.

¹²Angān siŭn taban-i ka yŭn imam, ka ayŭh re tambit tibaduk anŭ ndi agŭm ndu tandā-i muko dog jugan ka TUHAN; ayŭh re badang-i di tunduh mija-sambah ndu sadis pinguman. Anŭ inŭh sadis ngga taran dosa.

¹³Simŭnŭ inŭh imam siŭn jugan sadis anŭ yŭn dosa ngan, ka angān siŭn dog apun. Imam anŭ dapu tadŭh tibaduk anŭ, nimun gaya atur sadis ruwang kayuh.

¹⁴TUHAN nggen atur-adat ati di Moses:

¹⁵Kambŭi tadŭ tadŭ so angān ngga dŭh singaja dŭh nggen pinganggen anŭ adi kudus ka TUHAN, angān siŭn taban ndi dari biri puan kah kambing adi pidanah ndu sadis bayar gati rugi ka TUHAN. Rega-i siŭn dog ngŭtŭ nanyam ka anŭ adi mbŭh dog miratak di Bari TUHAN.

¹⁶Angān dŭh siŭn dŭh ndai pinyibayar ngga 20 piratus tambah-i yŭn kayuh adi gibayuh angān bayar. Angān siŭn nggen-i ka imam, ka ayŭh re jugan dāng anŭ ndu sadis taran dosa ngan, ka angān siŭn dog apun.

¹⁷Kambŭi tadŭ tadŭ so angān ngga dŭh singaja miranggar pesan TUHAN, angān mbŭh sarah ka dŭh siŭn dŭh dog ukum.

¹⁸Angān dŭh siŭn dŭh taban ka yŭn imam ndu sadis bayar gati rugi ndi dari biri puan kah kambing adi pidanah. Rega-i siŭn dog ngŭtŭ nanyam ka anŭ adi mbŭh dog miratak di Bari TUHAN. Imam siŭn jugan sadis anŭ yŭn dosa adi angān ndai dŭh ngga singaja, ka angān siŭn dog apun.

¹⁹Anŭ inŭh sadis bayar gati rugi yŭn dosa adi angān ndai rawan TUHAN.