Read Biatah Bidayuh LEVITICUS 6 Bible Online

LEVITICUS 6 - Biatah Bidayuh bible

LEVITICUS 6

¹ TUHAN nggen atur-adat ati di Moses:

²Sadis dŭh siŭn dŭh an dog jugan kambŭi tadŭ so angān bidosa rawan TUHAN darŭm angān abah pari kayuh adi ngga dingan ngan adi samah daya Israel muko tingge di angān ndu-i jamen kayuh, puan kah darŭm angān naku tadŭ kayuh so ayŭh, puan kah nipu ayŭh

³puan kah kadong pasar kayuh adi mbŭh manyap ka bipayu nang adŭp ngan dŭh tungang dapŭd-i.

⁴Angān adi bidosa amai dapŭd kayuh ngga aran adi sarah anŭ patut bayar tadŭ tadŭ kayuh anŭ. Di andu angān dog dapŭd sarah, angān dŭh siŭn dŭh bayar ngga puno di daya adi dapu, ngga 20 piratus tambah-i.

⁶Angān siŭn taban ka yŭn imam ndu sadis bayar gati rugi ka TUHAN ndi dari biri puan kah kambing adi pidanah. Rega-i siŭn dog ngŭtŭ nanyam ka anŭ adi mbŭh dog miratak di Bari TUHAN.

⁷Imam siŭn jugan sadis yŭn dosa ngan, ka angān siŭn dog apun.

⁸TUHAN pesan di Moses

⁹bada nggen di Aaron ngga di bara anak dari-i atur-adat ati yŭn sadis badang: Sadis badang siŭn dog tandah di tunduh mija-sambah ndi ngarŭm, ka apui-i dog tandah sakŭt.

¹⁰Komŭnŭ, imam adi nēn jipo-ambu linen-i ngga sinjang rajut banang linen, siŭn kadi apŭk adi prinyo adi dog tingge di tunduh mija-sambah ka na-i di bŭngŭn mija-sambah.

¹¹Komŭnŭ ayŭh siŭn kibarui piraka-i, ka taban apŭk anŭ ngga ka sapa tarun yŭn bibari adi taŭn dog nitah yŭn-i.

¹²Apui adi di tunduh mija-sambah an adu adu sakŭt, dŭh siŭn tandah-i pura. Barang isan imam an na uwang dieh, ngatur sadis badang di tunduh-i, ka badang ramak adi so sadis bidingan.

¹⁴Ati atur-adat pasar sadis ruwang kayuh. Imam so asar Aaron siŭn jugan sadis ruwang kayuh ka TUHAN di jawin mija-sambah.

¹⁵Komŭnŭ ayŭh siŭn tambit tibaduk anŭ ndi agŭm, ngga inyo, ka ngga kimanyan adi di tunduh-i, ka badang-i di tunduh mija-sambah jadi tandā sopŭrŭg-i muko dog jugan ka TUHAN. Dagŭn sadis anŭ pimunos asŭng TUHAN.

¹⁶Bara imam siŭn man tadŭh-i. Tibaduk anŭ siŭn dog ndai bada jadi ruti dŭh biragi ka dog man di tarun yŭn adi kudus, di badag Bari TUHAN. TUHAN mbŭh nggen-i di bara imam jadi utung ngara ndu sadis pinguman. Sadis anŭ raru kudus, brimun ngga sadis taran dosa, ka sadis bayar gati rugi.

¹⁸Sinadan sesang Aaron adi dari siŭn ndŭg jŭ man pinguman anŭ jadi utung sadis pinguman adi mbŭh dog jugan ka TUHAN. Tadŭ tadŭ daya bŭkŭn adi tama sadis pinguman re binasa da kuasa pinyikudus-i.

¹⁹TUHAN nggen di Moses atur-adat ati

²⁰yŭn pinyigarar imam so asar Aaron: Di andu ayŭh dog garar, ayŭh siŭn jugan ndu sadis ka TUHAN ndi kilogram tibaduk (nyikiang ngga sadis ruwang kayuh adi dog jugan barang andu), sitangah ngga isan isan, sitangah ngga singumi andu.

²¹Tibaduk anŭ siŭn dog gaur ngga inyo ka tanŭk di kuari adi dadas, komŭnŭ dog nyiratak, ka dog jugan ndu sadis ruwang kayuh, ka dagŭn-i pimunos asŭng TUHAN.

²²Sadis anŭ siŭn dog jugan barang naan so sesang Aaron adi jadi Imam Bās. Sadis anŭ siŭn mŭrŭng dog badang ndu sadis ka TUHAN.

²³Nisit dŭh gŭh sadis ruwang kayuh adi imam jugan siŭn dog man; sopŭrŭg-i dŭh siŭn dŭh dog badang bada rŭpŭg.

²⁴TUHAN pesan Moses

²⁵da nggen di Aaron ngga di bara anak dari-i atur-adat ati yŭn sadis taran dosa: Dāng adi ndu sadis taran dosa siŭn dog siŭ di tura ka utara mija-sambah, di yŭn dāng dāng yŭn sadis badang dog siŭ. Anŭ inŭh sadis adi raru kudus.

²⁶Imam adi nyadis dāng anŭ siŭn man-i di tarun yŭn adi kudus, di badag Bari TUHAN.

²⁷Tadŭ tadŭ daya puan kah kayuh bŭkŭn adi tama dagin dāng anŭ re binasa da kuasa pinyikudus-i. Kambŭi agi pimakai adi dog ndai so banang bitameg da deya dāng anŭ, pimakai anŭ dŭh siŭn dŭh dog ngu di tarun yŭn adi kudus.

²⁸Tadŭ priok tana adi yŭn dagin anŭ dog tanŭk ngga piin dŭh siŭn dŭh dog mape; ka kan priok basi dog pakai, priok anŭ dŭh siŭn dŭh dog marus ka musor ngga piin.

²⁹Tadŭ tadŭ dari adi so rawang imam siŭn man sadis anŭ; sadis anŭ inŭh raru kudus.

³⁰Pak kambŭi deya dāng anŭ agi dog taban ka darŭm Bari TUHAN, ka dog pakai di adat taran dosa, dāng anŭ dŭh siŭn dog man, ka-i dŭh siŭn dŭh dog badang bada rŭpŭg.