Read Biatah Bidayuh LEVITICUS 7 Bible Online

LEVITICUS 7 - Biatah Bidayuh bible

LEVITICUS 7

¹Ati inŭh atur-adat yŭn sadis bayar gati rugi, sadis adi raru kudus.

²Dāng adi dog pakai yŭn sadis anŭ siŭn dog siŭ di tura ka utara mija-sambah, di yŭn dāng dāng yŭn sadis badang dog siŭ, ngga deya-i siŭn dog nimba di so-pat parad mija-sambah anŭ.

³Sopŭrŭg ramak-i siŭn dog kadi ka dog jugan di tunduh mija-sambah: mun koi-i adi piramak, ramak adi marut sopŭrŭg isi pŭrŭng,

⁴atin tipareng samŭn ramak-i, ngga parad atin adi siabo kana.

⁵Imam siŭn badang sopŭrŭg ramak anŭ di tunduh mija-sambah ndu sadis pinguman ka TUHAN. Anŭ inŭh sadis bayar gati rugi.

⁶Tadŭ tadŭ dari adi so rawang imam bisa man sadis anŭ, pak-i dŭh siŭn dŭh dog man di tarun yŭn adi kudus, amai-i raru kudus.

⁷Jadi atur-adat pasar sadis taran dosa ngga sadis bayar gati rugi agi brimun: isin dāng anŭ dog dapu imam adi jugan sadis anŭ.

⁸Kurit dāng adi dog jugan ndu sadis badang dog dapu imam anŭ adi jugan-i.

⁹Sopŭrŭg sadis ruwang kayuh adi ko dog ndai ngga oven-tana, puan kah adi ko dog nyirandang, puan kah adi dog mipi mbŭh tung imam adi jugan-i ka Tapa.

¹⁰Pak sopŭrŭg sadis ruwang kayuh adi dŭh dog tanŭk, bait-i gaur inyo bait-i badŭh, dog dapu bara imam so asar Aaron ka dŭh siŭn dŭh dog kutung di dupan ngara bada nyikiang.

¹¹Ati atur-adat yŭn sadis bidingan adi dog jugan ka TUHAN.

¹²Kambŭi angān jugan sadis anŭ ndu sadis trima kaseh ka Tapa, angān siŭn jugan, samah ngga dāng anŭ adi re dog nyadis, ndi pinganggen ruti adi dŭh biragi, bait-i ruti adi bibaru adi bigaur ngga inyo kanā, puan kah biskit adi dog susen inyo kanā dieh, puan kah kue adi dog ndai so tibaduk adi bigaur ngga inyo kanā.

¹³Nambah ka anŭ, angān siŭn jugan baru baru ruti adi dog ndai ngga ragi.

¹⁴Angān siŭn jugan ndi utung so barang masam ruti ruti anŭ jadi pinganggen adi grua ka TUHAN; anŭ dog dapu imam anŭ adi tambit deya dāng anŭ ka naui-i di mija-sambah.

¹⁵Dagin dāng anŭ dŭh siŭn dŭh dog man di andu dāng anŭ dog nyadis; ka dŭh siŭn kidŭm ndŭg isan isan andu jawa ndi.

¹⁶Kambŭi daya taban sadis bidingan ngga pijadi payu, puan kah ndu sadis adi dog jugan so pinyiraan atin adŭp, dŭh sopŭrŭg-i siŭn dog man di andu-i dog jugan, pak kambŭi agi tadŭh-i ayŭh siŭn dog man di andu sipagi.

¹⁷Pak tadŭh dagin adi dŭm ndŭg andu adi taruh dŭh siŭn dŭh dog badang bada rŭpŭg.

¹⁸Kambŭi agi so dagin anŭ dog man di andu adi taruh, Tapa dŭh re trima sadis anŭ. Sadis anŭ dŭh re jadi berkat di angān pak mbŭh dog nyirundeng kais, ka asi asi adi man-i re dapu tanggong di sarah anŭ.

¹⁹Kambŭi dagin anŭ adi dog nyingŭg tadŭ tadŭ kayuh adi kais nanyam ka adat, dagin anŭ dŭh siŭn dog man, ka dŭh siŭn dŭh dog badang. Tadŭ tadŭ so angān adi bisig nanyam ka adat siŭn man dagin anŭ,

²⁰pak kambŭi tadŭ so angān adi kais man dagin anŭ, angān dŭh re tia dog kadŭn daya Tapa.

²¹Ka dinge kambŭi angān man dagin adi ko dog jugan anŭ ripas ko tama tadŭ kayuh adi kais nanyam ka adat, bait so manusia puan kah so dāng, angān dŭh re tia dog kadŭn daya Tapa.

²²TUHAN nggen di Moses atur-adat ati

²³yŭn daya Israel: Ramak sapi, biri, puan kah kambing, dŭh siŭn dog man.

²⁴Ramak dāng adi kabŭs sadi-i, puan kah adi kabŭs dog siŭ dāng tarun, dŭh siŭn dog man, pak-i siŭn dog pakai yŭn tadŭ tadŭ kayuh bŭkŭn.

²⁵Tadŭ tadŭ so angān adi man ramak dāng adi muko dog jugan ndu sadis pinguman ka TUHAN, re dŭh tia dog kadŭn daya Tapa.

²⁶ Diki diki daya Israel rŭŭ, ngara dŭh siŭn man deya manuk puan kah deya dāng.

²⁷Asi asi adi rawan atur-adat ati re dŭh tia dog kadŭn daya Tapa.

²⁸TUHAN nggen atur-adat ati di Moses

²⁹yŭn daya Israel: Kan tadŭ so angān jugan sadis bidingan, angān dŭh siŭn dŭh jugan pire-i ndu pinganggen adi grua ka TUHAN;

³⁰taban-i ngga tangan adŭp ngan ndu sadis pinguman. Angān siŭn taban ramak dāng anŭ samŭn sudo-i ka jugan-i ndu pinganggen adi grua ka TUHAN.

³¹Imam siŭn badang ramak anŭ di tunduh mija-sambah, pak sudo-i dog dapu bara imam.

³²Sape tauh kaja dāng anŭ siŭn dog nggen ndu pinganggen adi grua

³³ka imam anŭ adi jugan deya ngga ramak dāng yŭn sadis bidingan.

³⁴Isin sudo dāng anŭ inŭh pinganggen adi grua, ka sape tauh kaja-i mbŭh pinganggen adi dog nitah adi TUHAN mbŭh tambit so daya Israel ka nggen di bara imam. Anŭ kayuh adi dŭh siŭn dŭh daya Israel adu adu nggen di bara imam.

³⁵Anŭ inŭh utung sadis pinguman dog jugan ka TUHAN adi dog nggen di Aaron ngga bara anak dari-i di andu ngara dog garar jadi imam.

³⁶Di andu anŭ, TUHAN pesan daya Israel bada nggen di ngara utung pinganggen anŭ. Atur-adat ati dŭh siŭn dŭh daya Israel adu adu tunda.

³⁷Jadi anŭ inŭh atur-adat yŭn sadis badang, sadis ruwang kayuh, sadis taran dosa, sadis bayar gati rugi, sadis pinyigarar ngga sadis bidingan.

³⁸Pinyipesan ati dog nggen TUHAN di Moses di Darŭd Sinai, di tarun tana-pajam, di andu ayŭh bada daya Israel jugan sadis ka TUHAN.