Read Biatah Bidayuh LEVITICUS 8 Bible Online

LEVITICUS 8 - Biatah Bidayuh bible

LEVITICUS 8

¹TUHAN nang di Moses,

²“Taban Aaron ngga bara anak dari-i ngga di ka tiban Bari Ku, ka taban gŭh piraka imam, inyo kudus, anak dari sapi adi re ndu sadis taran dosa, duwŭh dari biri, ka bakur adi brisi ngga ruti adi dŭh biragi.

³Komŭnŭ bagan sopŭrŭg daya Israel bada mandŭg tikuruk diginŭ.”

⁴Moses ndai nanyam adi TUHAN ko pesan, ka kan sopŭrŭg daya Israel mbŭh tikuruk,

⁵ayŭh nang di ngara, “Kayuh adi aku re ndai madin inŭh kayuh adi TUHAN ko pesan.”

⁶Moses taban Aaron ngga bara anak dari-i ka sirung jawin daya bagŭ, ka rasu bada ngara ndai adat mamuh di adŭp ngara.

⁷Ayŭh kasŭk jipo ngga jipo-ambu di Aaron, ka na bŭŭng kupong di kupong-i. Ayŭh kasŭk gŭh efod[1] di Aaron ka ngabŭt kupong-i ngga song-i.

⁸Ayŭh kasŭk gŭh tutu-sudo di Aaron, ka na Urim ngga Thummim[2] darŭm tutu-sudo anŭ.

⁹Ayŭh na bubok di ubak Aaron, ka di tura ka jawin bubok anŭ ayŭh na abuh mas, tandā pinyikudus, nimun adi TUHAN ko pesan di Moses.

¹⁰Komŭnŭ Moses tambit inyo kudus ka nginyo Bari TUHAN samŭn sopŭrŭg kayuh adi darŭm-i; simŭnŭ inŭh ayŭh mbŭh nyikudus sopŭrŭg kayuh anŭ ka TUHAN.

¹¹Ayŭh tambit kada inyo anŭ ka masik-i pikuju kari di mija-sambah ngga di sopŭrŭg pingakas-i, ka di sambong ngga bangan-i, siŭn kayuh anŭ gŭh dog nyikudus yŭn TUHAN.

¹²Ayŭh ren inyo kudus di tunduh ubak Aaron ngga garar ayŭh.

¹³Ko anŭ, Moses taban bara anak dari Aaron ka kasŭk jipo di ngara ka bŭŭng kupong di kupong ngara, ka na tupi di ubak ngara nanyam anŭ adi TUHAN ko pesan.

¹⁴Komŭnŭ Moses taban anak dari sapi ndu sadis taran dosa, ka Aaron ngga bara anak dari-i na tangan ngara di tunduh ubak-i.

¹⁵Moses siŭ sapi anŭ ka tambit kada deya-i, ka ngga trinju-i susen-i di sopŭrŭg junggir adi di sikuh mija-sambah ngga nyikudus-i. Komŭnŭ ayŭh ren tadŭh deya di sigŭn mija-sambah. Simŭnŭ ayŭh mbŭh nyikudus ka pibisig-i.

¹⁶Moses tambit sopŭrŭg ramak so isi pŭrŭng dāng anŭ, parad atin adi siabo kana, atin tipareng samŭn ramak adi marut-i, ka badang sopŭrŭg anŭ di tunduh mija-sambah.

¹⁷Ayŭh tambit tadŭh pŭrŭng anak sapi anŭ, samŭn kurit, isin ngga kuboi-i, ka badang-i di sapa tarun yŭn bibari nanyam adi TUHAN ko pesan.

¹⁸Muko anŭ, Moses taban dari biri ndu sadis badang; ka Aaron ngga bara anak dari-i na tangan ngara di tunduh ubak-i.

¹⁹Moses siŭ biri anŭ, ka naui deya-i di so-pat parad mija-sambah anŭ.

²⁰Ayŭh natad biri anŭ, ngu isi pŭrŭng-i ka kaja-i ngga piin, ka badang ubak-i, ramak-i, ngga sopŭrŭg tatad-i adi bŭkŭn di tunduh mija-sambah, nanyam adi TUHAN ko pesan. Sadis badang anŭ inŭh sadis pinguman, ngga dagŭn-i pimunos asŭng TUHAN.

²²Komŭnŭ Moses tambit dari biri dinge, yŭn pinyigarar imam, ka Aaron ngga bara anak dari-i na tangan ngara di tunduh ubak-i.

²³Moses siŭ biri anŭ, ka tambit kada deya-i ka susen-i di dawŭn kajit tauh Aaron, di sindŭ tangan tauh-i, ka di sindŭ kaja tauh-i.

²⁴Komŭnŭ Moses taban bara anak dari Aaron ka jawin ka susen kada deya anŭ di dawŭn kajit tauh ngara, sindŭ tangan tauh ngara, ka sindŭ kaja tauh ngara. Komŭnŭ Moses naui tadŭh deya anŭ di so-pat parad mija-sambah anŭ.

²⁵Ayŭh tambit ramak-i, koi-i adi piramak, ka sopŭrŭg ramak adi marut isi pŭrŭng-i ka parad atin-i adi siabo kana, atin tipareng-i samŭn ramak adi marut-i, ka sape tauh-i.

²⁶Komŭnŭ ayŭh tambit ndi baru ruti so bakur adi brisi ngga ruti adi dŭh biragi adi muko dog nitah ka TUHAN, ndi baru ruti adi dog ndai ngga inyo, ka ndi biskit, ka na-i di tunduh ramak ngga sape tauh biri anŭ.

²⁷Moses na sopŭrŭg pinguman anŭ di tangan Aaron ngga bara anak dari-i, ka ngara jugan-i ndu pinganggen adi grua ka TUHAN.

²⁸Komŭnŭ Moses tambit pinguman anŭ so ngara, rasu badang-i di tunduh mija-sambah, di tunduh sadis badang, ndu sadis pinyigarar. Anŭ inŭh sadis pinguman, ka dagŭn-i pimunos asŭng TUHAN.

²⁹Komŭnŭ Moses tambit isin sudo dāng anŭ rasu jugan-i ndu pinganggen adi grua ka TUHAN. Anŭ inŭh mbŭh utung Moses so dari biri adi dog jugan yŭn pinyigarar imam. Moses ndai sopŭrŭg anŭ nanyam adi TUHAN ko pesan.

³⁰Moses tambit kada inyo kudus ka kada deya so tunduh mija-sambah ka masik-i di Aaron ngga bara anak dari-i ka di piraka ngara. Simŭnŭ inŭh ayŭh mbŭh garar ngara ka nyikudus piraka ngara yŭn TUHAN.

³¹Moses nang di Aaron ngga di bara anak dari-i. “Taban dagin ati ka rawa tiban Bari TUHAN, tanŭk ngga piin ka man-i diginŭ ngga ruti adi darŭm bakur sadis pinyigarar nanyam adi TUHAN ko pesan.

³²Badang sopŭrŭg dagin bait ruti adi dŭm.

³³Angān dŭh siŭn makat bu so rawa tiban Bari TUHAN darŭm tipuh ju andu ndŭg ka sopŭrŭg adat pinyigarar ngan mbŭh abo dog sita.

³⁴TUHAN mbŭh pesan ata da ndai sopŭrŭg anŭ adi ata mbŭh ndai andu ati, ngga taran dosa ngan.

³⁵Angān dŭh siŭn dŭh rŭŭ di rawa tiban Bari TUHAN sandu singarŭm ndŭg ju andu ndai kraja adi TUHAN ko pesan. Kambŭi angān dŭh tunda atur anŭ, angān re kabŭs. Ati inŭh kayuh adi TUHAN ko pesan di aku.”

³⁶Ngapŭi Aaron ngga bara anak dari-i ndai sopŭrŭg kayuh adi TUHAN ko pesan so Moses.