Read Biatah Bidayuh LEVITICUS 9 Bible Online

LEVITICUS 9 - Biatah Bidayuh bible

LEVITICUS 9

¹Di andu ripas adat pinyigarar mbŭh kamas, Moses bagan Aaron ngga bara anak dari-i, samŭn bara pinguru daya Israel.

²Ayŭh nang di Aaron, “Tambit ndi dari sapi adi gi-mara, ngga ndi dari biri adi pidanah, ka jugan-i ka TUHAN. Dari sapi anŭ ndu sadis taran dosa, ka biri anŭ ndu sadis badang.

³Komŭnŭ kidaan di bara daya Israel bada tambit ndi dari kambing yŭn sadis taran dosa, ka ndi anak sapi ngga ndi anak biri samah ndi sawa umbur-i ka adi pidanah yŭn sadis badang,

⁴ka ndi sapi ngga ndi biri yŭn sadis bidingan. Ngara an nyadis dāng dāng anŭ ka TUHAN biramah ngga sadis ruwang kayuh adi bigaur ngga inyo. Ngara dŭh siŭn dŭh ndai simŭnŭ sabab TUHAN re nandŭng di ngara andu ati.”

⁵Ngara taban ka rawa Bari TUHAN sopŭrŭg kayuh nanyam adi Moses muko kidaan di ngara, ka sopŭrŭg daya Israel mbŭh tikuruk diginŭ re nyambah TUHAN.

⁶Moses nang, “TUHAN mbŭh pesan angān bada ndai sopŭrŭg anŭ, isa jawa bragah-I nyirinyak nandŭng di angān.”

⁷ Komŭnŭ ayŭh nang di Aaron, “Di ka mija-sambah, ka jugan sadis taran dosa samŭn sadis badang ngga taran dosa mu samŭn dosa bara daya bagŭ. Jugan sadis anŭ ngga taran dosa bara daya, nanyam adi TUHAN ko pesan.”

⁸Aaron di ka mija-sambah ka siŭ dari sapi anŭ adi gi-mara yŭn sadis taran dosa adŭp-i.

⁹Bara anak dari-i taban ka yŭn-i deya dāng anŭ, ka ayŭh siruman trinju-i dieh, ka susen kada deya anŭ di junggir adi di sikuh sikuh mija-sambah, ka ren tadŭh deya anŭ di sigŭn mija-sambah anŭ.

¹⁰Komŭnŭ ka ayŭh badang di tunduh mija-sambah ramak ramak-i, atin tipareng-i ka parad atin-i adi siabo kana, nanyam adi TUHAN ko pesan di Moses.

¹¹Pak ayŭh badang dagin ngga kurit-i di sapa tarun yŭn bibari.

¹²Ayŭh siŭ dāng adi ndu sadis badang yŭn adŭp-i. Bara anak dari-i taban ka yŭn-i deya dāng anŭ ka ayŭh naui-i di so-pat parad mija-sambah.

¹³Ngara taban gŭh ka yŭn-i ubak ngga tatad tatad dāng anŭ ka ayŭh badang-i di tunduh mija-sambah.

¹⁴Komŭnŭ ayŭh ngu isi isi pŭrŭng-i, samŭn sape-i, ka badang-i di tunduh mija-sambah nunduh sadis adi bŭkŭn.

¹⁵Ripas anŭ, ayŭh jugan pinganggen bara daya. Ayŭh tambit kambing adi re dog jugan ngga taran dosa bara daya, siŭ-i, ka jugan-i, nimun adi ko-i ndai di sadis taran dosa adŭp-i.

¹⁶Ayŭh taban gŭh dāng adi ndu sadis badang, ka jugan-i nunda ka atur-adat.

¹⁷Ayŭh jugan sadis ruwang kayuh ka tambit ndi agŭm tibaduk ka badang-i di tunduh mija-sambah. (Ati inŭh ngga nambah sadis badang adi dog ndai barang andu.)

¹⁸ Ayŭh siŭ dari sapi ngga dari biri ndu sadis bidingan yŭn bara daya bagŭ. Bara anak dari-i taban ka yŭn-i deya dāng dāng anŭ, ka ayŭh naui-i di so-pat parad mija-sambah.

¹⁹Aaron na tatad adi piramak so dari sapi ngga dari biri anŭ

²⁰di tunduh sudo so-duwŭh dāng anŭ, ka taban sopŭrŭg-i ka mija-sambah. Ayŭh badang ramak-i di tunduh mija-sambah

²¹ka jugan sudo sudo samŭn sape sape tauh-i ndu pinganggen adi grua ka TUHAN yŭn bara imam, nanyam adi Moses ko kidaan.

²² Kan Aaron muko ndai sopŭrŭg sadis anŭ, ayŭh pakat tangan-i nura daya bagŭ ka nyiberkat ngara. Komŭnŭ, ayŭh mūn ka sagān.

²³Moses ngga Aaron mŭrŭt Bari TUHAN, ka kan ngara ruah, ngara nyiberkat daya bagŭ. Ka jawa bragah TUHAN nyirinyak nandŭng di sopŭrŭg daya.

²⁴Gŭgŭh ka TUHAN pait apui ka-i badang sadis badang anŭ, samŭn parad parad adi piramak, di tunduh mija-sambah. Kan bara daya kiris kayuh anŭ, sopŭrŭg ngara nyirais ka mutu ubak nyambah.