Read Biatah Bidayuh JEREMIAH 1 Bible Online

JEREMIAH 1 - Biatah Bidayuh bible

JEREMIAH 1

¹Surat ati inŭh pasar kayuh adi dog nang Jeremiah anak Hilkiah, ndi naan so imam imam di kupo Anathoth darŭm utung tarun tana Benjamin.

² TUHAN minyu di Jeremiah darŭm sawa adi simŭng taruh Josiah anak Amon jadi raja di Judah,

³ ka Ayŭh minyu ngga ayŭh dinge kan Jehoiakim jadi raja. Ripas anŭ, TUHAN ari minyu ngga ayŭh, ndŭg sawa adi simŭng ndi darŭm pinyipritah Zedekiah anak Josiah. Darŭm buran adi rimŭh sawa anŭ daya Jerusalem dog taran ka rais tami.

⁴TUHAN nang di aku,

⁵“Sibayuh Aku napa kuu darŭm tain sindŭ mu, ka sibayuh kuu dog biranak, Aku mbŭh mien kuu ka tijuan kuu bada jadi nabi yŭn bangsa bangsa.”

⁶Aku nam, “TUHAN Raja, aku dŭh pandai minyu; Aku gibabŭ mara.”

⁷Pak TUHAN nang di aku, “Dŭhnyah nang adŭp mu gibabŭ mara, pak di adŭ ka yŭn daya adi Aku bada kuu tudu, ka kidaan di ngara sopŭrŭg kayuh adi Aku bada kuu kidaan.

⁸Dŭhnyah taru ngara, amai Aku re agi ngga kuu ka grindung kuu. Aku, adi TUHAN, mbŭh minyu!”

⁹Komŭnŭ TUHAN ton tangan-I, tama bibis ku, ka nang di aku, “Dingah, Aku nggen di kuu buwa pinganang adi kuu re nang.

¹⁰Andu ati Aku nggen di kuu kuasa di tunduh bangsa bangsa ka pritah ngga dimbut ka pirabu-i, ngga pirabur ka pitumbang-i, ngga pijog ka purun-i.”

¹¹TUHAN siken aku, “Jeremiah, ani kiris mu?” Aku nam, “Ndi daan tŭngŭn kayuh almond.”

¹²“Batur,” TUHAN nang, “ka Aku bijaga[1] an kiris pinganang Ku jadi bitŭtŭk.”

¹³Komŭnŭ TUHAN minyu di aku dinge. “Ani dinge kiris mu?” Ayŭh siken. Aku nam, “Aku kiris ndi priok nyigurak di utara, ka-i mbŭh re tumbang ka parad ati.”

¹⁴Ayŭh nang di aku, “Pinyirusag re babas so utara nyatŭk sopŭrŭg adi rŭŭ di tarun tana ati,

¹⁵sabab Aku bagan sopŭrŭg bangsa di utara bada mandŭg. Raja raja ngara re pijog takta takta ngara di tiban-bās Jerusalem ka maning sindung-i, ka maning kupo kupo Judah adi bŭkŭn.

¹⁶Aku re ngukum daya Ku sabab ngara mbŭh bidosa; ngara mbŭh tagan Aku, mbŭh jugan sadis sadis ka tapa bŭkŭn, ka mbŭh ndai tibudo ka nyambah-i.

¹⁷Sidia adŭp mu, Jeremiah; panu di kidaan di ngara sopŭrŭg kayuh adi Aku pesan di kuu bada nang. Dŭhnyah taru ngara madin, te Aku bada kuu rabis taru kan kuu mbŭh situra jawin ngga ngara rai-i.

¹⁸Dingah, Jeremiah! Barang naan di tarun tana ati -- raja raja Judah, bara pinurung pritah, bara imam, ka bara daya -- re rawan kuu. Andu ati, Aku nggen di kuu pinyibake ngga rawan ngara; kuu re keya ka kupo adi bikuta, keya ka tiang basi, keya ka sindung timaga. Ngara dŭh re ngarah kuu, amai Aku agi ngga kuu ka grindung kuu. Aku, adi TUHAN, mbŭh minyu.”