Read Biatah Bidayuh JEREMIAH 10 Bible Online

JEREMIAH 10 - Biatah Bidayuh bible

JEREMIAH 10

¹Daya Israel, dingah pinganang ati adi TUHAN nggen di angān.

²Ayŭh nang, “Dŭhnyah tunda adat bangsa bangsa bŭkŭn; dŭhnyah susah kan kiris kayuh saruh di rangit, sunggu bangsa bangsa bŭkŭn mbŭh taru.

³Adat bangsa bangsa anŭ dŭh biguna. Tŭngŭn kayuh dog tabŭng di tuān; tŭngŭn anŭ dog mŭŭt ngga pingakas tukang kayuh,

⁴ka dog ngabuh ngga pirak ka mas. Kayuh anŭ dog pirakat ngga pasak ngga bitan-i bada dŭh rabu.

⁵Tibudo adi mun anŭ mbŭh keya ka tigundo adi ngga kasig manuk so teya timun; tibudo anŭ dŭh bisa minyu; tibudo anŭ dog gŭrŭng sabab-i dŭh bisa panu. Dŭhnyah taru tibudo: tibudo dŭh bisa bada kuu kinaman, ka dŭh-i bisa taban pinyikana ka kuu.”

⁶TUHAN, mating adi bŭkŭn re mun Kaam; Kaam inŭh bake, ka adŭn Mai inŭh bās buang bikuasa.

⁷ Asi abah stabi di Kaam, Raja yŭn sopŭrŭg bangsa? Kaam patut dog stabi. Mating adi bŭkŭn re mun Kaam di dupan sopŭrŭg daya bangsa bangsa adi bijak bait di dupan tadŭ tadŭ raja ngara.

⁸Sopŭrŭg ngara budo ka bawa. Ani bisa ngara birajar so tibudo apŭg kayuh?[10]

⁹Tibudo ngara dog marut ngga pirak so Spain ka ngga mas so Uphaz; sopŭrŭg-i mbŭh pingandai tukang adi sukup pandai. Piraka tibudo anŭ dog ndai so banang adi bēng ngga bēng adi tuuh dog nanun tukang tanun adi sukup pandai.

¹⁰Pak Kaam, TUHAN, inŭh Tapa adi sawŭ, Kaam inŭh Tapa adi udip ka raja adi tan adu adu. Kan Kaam baji, ong bigagar; bangsa bangsa dŭh tan nura baji Mai.

¹¹(Kuu dŭh siŭn dŭh kidaan di ngara nang tapa tapa adi dŭh napa ong ngga rangit re dog pirabur. Ngara re miyap so ong.)

¹²TUHAN ndai ong so kuasa adŭp-I; so pinyibijak-I Ayŭh napa ong ka mamad rangit.

¹³So pesan-I piin di sambu rangit[11] magā; Ayŭh taban abun so bŭngŭn ong. Ayŭh bada kijat mikirab di ujen ka pait sabak so birit pinyirikŭn-I.

¹⁴Kiris kayuh anŭ, manusia rada adŭp-i budo buang bawa; ngara adi ndai tibudo re kinyam adŭp-i asa, sabab tapa tapa adi ngara ndai inŭh tapa kadong ka adi dŭh udip.

¹⁵Tibudo tibudo anŭ dŭh biguna ka patut dog ngamun; sopŭrŭg-i re dog pirabur kan TUHAN mandŭg di pitumbang-i.

¹⁶Tapa Jacob dŭh mun tibudo tibudo anŭ; Ayŭh inŭh adi ndai sopŭrŭg kayuh, ka Ayŭh mbŭh mien Israel bada jadi daya adi adŭp-I dapu. TUHAN Bisa-pŭrŭg inŭh adŭn-I.

¹⁷Daya Jerusalem, angān mbŭh dog nyikapung! Nguruk barang barang ngan.

¹⁸TUHAN re taran angān so tarun tana ati; Ayŭh re pirandŭk angān ndŭg ka angān mating tia dŭm. TUHAN mbŭh minyu.

¹⁹Daya Jerusalem bagan, “Mbŭh sera inŭh kieh! Tawan ami dŭh re bua. Kieh pikir ati inŭh kayuh adi kieh dapŭd nyijŭn!

²⁰Bari bari ami mbŭh rusak; sopŭrŭg taris-i mbŭh patŭd. Anak anak ami mbŭh tagan kieh ka mbŭh mating; mating dŭm re pari pijog bari bari ami; mating dŭm re tangid tabir tabir-i.”

²¹Aku nam, “Bara pinguru ta budo; ngara dŭh mite pinyitayan so TUHAN. Anŭ inŭh sabab ngara dŭh mujur darŭm kraja ngara, ka bara daya ta mbŭh papar sasah.

²²Dingah! Agah mbŭh mandŭg! Agi ndi bangsa di utara adi taban pito bās; tibaran bara soldadu-i re pirabur kupo kupo Judah bada jadi tarun tana-pajam, tarun adi yŭn kasong kasong tarun udip.”

²³TUHAN, aku puan mating daya bikuasa di tunduh pimudip adŭp-i; mating daya dapŭd nguasa aran pimudip adŭp-i.

²⁴Nyibatur daya Mai, TUHAN; pak dŭhnyah paŭh riang ngga kieh bait ngukum kieh kan Kaam baji; te kieh mungan rai-i.

²⁵Taran baji Mai di bangsa bangsa adi dŭh nyambah Kaam ka di tunduh daya adi tirawan Kaam. Ngara mbŭh siŭ daya Mai; ngara mbŭh bandar bandar pirabur kieh ka bada rais ami jadi tibawang.