Read Biatah Bidayuh JEREMIAH 11 Bible Online

JEREMIAH 11 - Biatah Bidayuh bible

JEREMIAH 11

¹TUHAN nang di aku,

²“Dingah pinganang pinganang simanya. Kidaan di daya Judah ngga daya Jerusalem

³nang Aku, adi TUHAN Tapa Israel, mbŭh mangu barang naan daya adi dŭh tunda pinganang pinganang simanya anŭ.

⁴Anŭ inŭh simanya adi Aku mbŭh ndai ngga tayung-babuk ngara di andu Aku taban ngara ngga ruah so Egypt, tarun tana adi keya ka buwang apui di ngara. Aku bada ngara tunda pinganang Ku ka ndai sopŭrŭg kayuh adi Aku mbŭh pesan. Aku kidaan di ngara nang kambŭi ngara tunda pinganang Ku, ngara bisa jadi daya Ku ka Aku jadi Tapa ngara.

⁵Simŭnŭ meh Aku re sita janji adi Aku mbŭh ndai ngga tayung-babuk ngara, anŭ inŭh Aku an nggen di ngara tana adi kaya ka damŭn anŭ adi ngara mbŭh dapu madin.” Aku nang, “Sawŭ, TUHAN.”

⁶Komŭnŭ TUHAN nang di aku, “Panu ka kupo kupo Judah ngga aran aran di Jerusalem. Piagah pinganang Ku diginŭ ka bada daya diginŭ dingah pinganang pinganang simanya ka tunda-i.

⁷Di andu Aku taban tayung-babuk ngara ngga ruah so Egypt, Aku mbŭh pari pari bakan ngara bada nundok di Aku. Ndŭg andu ati Aku babŭ bakan daya Ku di kayuh anŭ.

⁸Pak ngara abah dingah bait tunda pinganang Ku. Ngara tanŭ ka baking buang arap mun adi mbŭh. Aku mbŭh pesan ngara bada sita simanya anŭ, pak ngara abah. Jadi Aku pait ka ngara sopŭrŭg ukum adi dog nyabŭt darŭm simanya anŭ.”

⁹Komŭnŭ TUHAN nang di aku, “Daya Judah ngga daya Jerusalem mbŭh bipekat rawan Aku.

¹⁰Ngara ndai dosa adi tayung-babuk ngara mbŭh ndai jah; ngara abah ndai kayuh adi Aku bada; ngara mbŭh nyambah tapa tapa bŭkŭn. Israel ngga Judah mbŭh miranggar simanya adi Aku mbŭh ndai ngga tayung-babuk ngara.

¹¹Jadi madin, Aku, adi TUHAN, bakan ngara nang Aku re bada pinyirusag nyatŭk ngara, ka ngara dŭh re dapŭd pirupas adŭp ngara. Ka kan ngara bagan mite turung so Aku, Aku dŭh re dingah ngara.

¹²Komŭnŭ daya Judah ngga daya Jerusalem re di ka tapa tapa adi yŭn ngara jugan sadis ka mite turung so tapa tapa anŭ. Pak tapa tapa anŭ re dŭh dapŭd nyiramat ngara kan pinyirusag anŭ mandŭg.

¹³Daya Judah biyŭn bagŭ tapa, kiang dudu kupo adi ngara biyŭn, ka bara adi darŭm Jerusalem mbŭh pijog bagŭ mija-sambah yŭn jugan sadis ka tapa Baal adi sipŭ anŭ: mija-sambah anŭ kiang dudu aran di darŭm kupo.

¹⁴Jeremiah, dŭhnyah bidua ka Aku bait mite turung so Aku ngga ngarun ngara. Kan ngara darŭm pinyusah ka bagan mite turung so Aku, Aku dŭh re dingah ngara.”

¹⁵TUHAN nang, “Daya Ku rindu ndai kayuh adi arap. Mating hak ngara re agi darŭm Ramin Ku? Ngara pikir ngara dapŭd bitan pinyirusag kambŭi ngara ndai janji[12] bait kambŭi ngara jugan sadis dāng? Bisa kah anŭ bada ngara gaŭn?

¹⁶Aku ko ndi sidah kadŭn ngara dawŭn tŭngŭn kayuh kanā, puno ngga buwa adi kana; pak madin, buang Aku ngŭr sak kijat Aku re badang dawŭn-i ka mata daan daan-i.

¹⁷“Aku, adi TUHAN Bisa-pŭrŭg, adi purun Israel ngga Judah; pak madin Aku bada pinyirusag nyatŭk ngara. Adŭp ngara adi bada kayuh anŭ nyatŭk ngara, so pingandai ngara adi sarah. Ngara bada Aku baji ngga pingandai ngara adi jugan sadis ka Baal.”

¹⁸TUHAN nggen puan di aku pasar pekat adi bara pinganyu ku ndai rawan aku.

¹⁹Aku mbŭh keya ka anak biri adi re dog siŭ, ka aku dŭh puan ngara mbŭh bisatur kayuh adi arap ngga rawan aku. Ngara nang, “Ja ata tabŭng tŭngŭn kayuh anŭ darŭm-i gibabŭ biyŭn pŭtŭk-i;[13] ja ata siŭ ayŭh isa daya mating ingat ayŭh tia.”

²⁰Komŭnŭ aku bidua, “TUHAN Bisa-pŭrŭg, Kaam inŭh akim adi tŭnggŭn; Kaam suba pikir daya ngga asŭng daya. Aku mbŭh na har ku ka darŭm tangan Mai; ka bada meh aku tingga Kaam maras dendam di ngara anŭ.”

²¹Daya Anathoth raan aku dog siŭ, ka mbŭh nang adŭp-i re siŭ aku kambŭi aku ngandŭ piagah pinganang TUHAN.

²²Ka TUHAN Bisa-pŭrŭg nang, “Aku re ngukum ngara! Dari ngara adi mara re dog siŭ darŭm perang; anak anak ngara re kabŭs sikirau.

²³Aku mbŭh miratak tika adi ngga Aku pait pinyirusag bada nyatŭk daya Anathoth, ka kan tika anŭ mbŭh mandŭg, mating so ngara re dŭm.”