Read Biatah Bidayuh JEREMIAH 14 Bible Online

JEREMIAH 14 - Biatah Bidayuh bible

JEREMIAH 14

¹TUHAN nang di aku pasar tipuh raga,

²“Judah inŭh ngurid; kupo kupo-i sindŭk re kabŭs, bara daya-i guring di tana buang susah, ka Jerusalem bagan mite turung.

³Daya kaya bada urun ngara di jiroh piin; ngara di ka prigi prigi, pak piin mating tia; ngara pari taban gabuk ngara engan. Asa buang riruk, ngara nutu jawin amai mangŭh.

⁴Sabab andu dŭh ujen ka tana mbŭh badŭh, bara tukang teya susah; ngara nutu jawin amai mangŭh.

⁵Di tarun sindŭ peyu tagan anak adi bauh-i ruwan sabab kupai mating tia.

⁶Kaldi tarun mijog di tibung sandah singak singik ngasŭng mun kasong tarun; batŭh-i mbŭh kabur sabab-i dŭh biyŭn pinguman.

⁷Daya Ku bagan buang nang di Aku, ‘Sunggu dosa ami nyarah kieh, turung kieh, TUHAN, nimun adi mbŭh Kaam janji. Kieh ari tagan Kaam; kieh mbŭh bidosa rawan Kaam.

⁸Kaam sadi adŭ pingarap Israel; Kaam inŭh adi nyiramat kieh so pinyirusag. Mani Kaam mun daya saruh di tarun tana ami, mun daya adi bidandong adi nyirŭmŭn ndi ngarŭm adŭ?

⁹Mani Kaam mun daya adi gŭgŭh, mun soldadu adi dŭh biyŭn kuasa ngga turung? Sawŭ, TUHAN, Kaam agi ngga kieh! Kieh inŭh daya Mai; dŭhnyah tagan kieh.’ ”

¹⁰TUHAN minyu pasar bara daya anŭ, “Ngara suka bu so Aku, ka ngara dŭh re an nakit jaga urah-i. Ngapŭi Aku dŭh munos asŭng di ngara. Aku re ingat pingandai sarah ngara ka ngukum ngara sabab dosa ngara.”

¹¹TUHAN nang di aku, “Dŭhnyah mite Aku turung bara daya anŭ.

¹²Sunggu kambŭi ngara bipusa, Aku dŭh re dingah sirŭŭn ngara mite turung; ka kambŭi ngara jugan sadis badang ngga sadis ruwang kayuh ka Aku, Aku dŭh re munos asŭng di ngara.”

¹³Komŭnŭ aku nang, “TUHAN Raja, Kaam puan nang bara nabi muko kidaan di bara daya nang re mating perang bait udip sikirau, sabab Kaam mbŭh bijanji nang, ngara nang, di tarun tana ati re ari agi damai.”

¹⁴Pak TUHAN nam, “Bara nabi pakai adŭn Ku ngga kadong daya; Aku mating pait ngara, mating gŭh Aku pesan bait minyu ngga ngara. Ngara minyu pasar kayuh adi ngara kiris keya ka darŭm pŭmŭh, pak anŭ dŭh so Aku. Kayuh adi ngara ninjau inŭh kayuh adi dŭh biguna, kayuh adi adŭp ngara nimbur.

¹⁵Aku, adi TUHAN, kidaan di kuu kayuh adi re Ku ndai di tunduh bara nabi anŭ adi Aku bŭn pait pak adi mbŭh minyu ngga adŭn Ku nang perang ngga udip sikirau dŭh re nyatŭk tarun tana ati. Aku re siŭ ngara pakai perang ngga udip sikirau.

¹⁶Daya adi dingah pinganang ngara re dog siŭ mun anŭ gŭh. Tadang ngara re dog taran di aran aran di Jerusalem, ka mating daya adi re tukang kubur ngara. Kayuh anŭ re jadi di sopŭrŭg ngara, sawŭn ngara, anak anak dari ngara, ngga anak anak dayung ngara. Aku re bada ngara dapu tanggong udip ginaka ngara.”

¹⁷TUHAN pesan aku bada kidaan di daya pasar pinyusah ku. Aku patut nang: “Isa-i randang batŭh ku pripasog ruah sandu ngga singarŭm, isa-i aku dŭh ko muās, amai daya ku mbŭh biragan ka mbŭh bana sangsara.

¹⁸Kan aku ruah ka sapa tarun, aku kiris tadang tadang daya adi kabŭs biperang; kan aku mŭrŭt kupo kupo, aku kiris daya sindŭk re kabŭs amai sikirau. Bara nabi ngga bara imam babŭ ndai kraja ngara, pak ngara dŭh mirati kayuh adi ngara ndai.”[17]

¹⁹TUHAN, Kaam mbŭh batur batur tirawan Judah kah? Kaam tiru di daya Zion kah? Mani Kaam bandar bandar kijera kieh ndŭg ka kieh dŭh dapŭd dog pibua? Kieh jiroh damai, pak mating dapŭd ami; kieh harap adŭp ami dog pibua, pak adi agi kaŭs-i pinyitaru.

²⁰Kieh mbŭh bidosa rawan Kaam, TUHAN; kieh ngaku dosa ami samŭn dosa tayung-babuk ami.

²¹Ingat janji Mai ka dŭhnyah ngamun kieh; dŭhnyah ngamun Jerusalem, tarun yŭn takta bragah Mai. Dŭhnyah miranggar simanya adi Kaam mbŭh ndai ngga kieh.

²²Tibudo bangsa bangsa dŭh dapŭd bada andu ujen; rangit sadi adŭp-i dŭh dapŭd bada andu ujen. Kieh na pingarap ami darŭm tangan Mai, O TUHAN adi Tapa ami, sabab Kaam inŭh adi ndai sopŭrŭg kayuh anŭ.