Read Biatah Bidayuh JEREMIAH 15 Bible Online

JEREMIAH 15 - Biatah Bidayuh bible

JEREMIAH 15

¹ Komŭnŭ TUHAN nang di aku, “Sunggu kambŭi Moses ngga Samuel agi mijog digiti mite masi so Aku, Aku dŭh re masi di bara daya ati. Bada ngara bu; bada ngara bu so sirung jawin Ku.

² Kan ngara siken di kuu kamaki ngara re bu, kidaan di ngara nang Aku mbŭh nang: Agi dog natu re kabŭs mandam, simŭnŭ inŭh ngara re! Adi bŭkŭn dog natu re kabŭs biperang, simŭnŭ inŭh ngara re! Agi dog natu re kabŭs sikirau, simŭnŭ inŭh ngara re! Adi bŭkŭn dog natu re dog taban ngga bu jadi daya-takap, simŭnŭ inŭh ngara re!

³Aku, adi TUHAN, mbŭh natu nang pat masam kayuh adi sipŭ re jadi di ngara: ngara re dog siŭ darŭm perang; tadang ngara re dog tarik kasong; manuk re man-i, ka dāng tarun re man tadŭh-i.

⁴ Aku re bada sopŭrŭg daya di ong tikaran kiris ngara sabab kayuh adi Manasseh anak Hezekiah ko ndai di Jerusalem kan ayŭh jadi raja Judah.”

⁵TUHAN nang, “Asi re masi di angān, daya Jerusalem, ka asi re susah pikir angān? Asi re nyasa ka siken siken ani agah ngan?

⁶Angān mbŭh tirawan Aku; angān mbŭh nyipunok Aku. Ngapŭi Aku pakat tangan Ku ka pirandŭk angān sabab Aku mbŭh reju nyijŭn baji Ku.[18]

⁷Di barang kupo di tarun tana ati Aku taran angān di sabak mun siriyang. Aku pirabur angān, daya Ku Aku siŭ anak anak ngan sabab angān dŭh pirŭŭ pimudip arap ngan.

⁸Dayung uban rabis bagŭ di rais ngan so sirah sumat di pang rawŭt. Aku siŭ dari dari ngan adi mara adi piaŭn ka bada sindŭ sindŭ ngara sangsara. Aku nyirŭgŭh nyerang ngara ngga pinyusah ndŭg ka ngara mbŭh taru buang sera susah.

⁹Sindŭ adi kiris ju madis anak-i miyap mbŭh singak singik ngasŭng. Pimudip-i mbŭh karŭm; ayŭh dog ngamun ka dog pimangŭh. Aku re bada pinganyu ngan siŭ sinadan angān adi gibabŭ udip. Aku, adi TUHAN mbŭh minyu.”

¹⁰Mbŭh sera inŭh pimudip ku ati! Mani sindŭ ku biranak aku ka darŭm ong? Aku dŭh siŭn dŭh bikaii ka bikarit ngga barang naan daya di tarun tana ati. Pŭn ka aku bŭn nginjam duit so daya bait nginjam duit ka daya, ka daya mangu aku.

¹¹TUHAN, isa-i sopŭrŭg pangu ngara nyatŭk aku kambŭi aku dŭh batur nakit bituan[19] di Kaam, kambŭi aku dŭh mite masi so Kaam yŭn bara pinganyu ku kan ngara bipito ka susah.

¹²(Mating daya tungang mata basi, rabis-i basi so utara adi bigaur ngga timaga.)

¹³TUHAN nang di aku, “Aku re pait bara pinganyu bada taban ngga bu pinyikaya ngga buat-rata daya Ku, ngga ngukum ngara yŭn dosa adi ngara mbŭh ndai di ndi tarun tana rais.

¹⁴Aku re bada ngara bituan di bara pinganyu ngara di tarun tana adi dŭh ngara puan, sabab baji Ku mbŭh keya ka apui adi bijagu adu adu.”

¹⁵Komŭnŭ aku nang, “TUHAN, Kaam mirati sopŭrŭg-i. Ingat aku ka turung aku. Bada aku maras dendam di ngara adi kisiis aku. Dŭhnyah paŭh dŭdŭt ngga ngara, te ngara dapŭd siŭ aku rai-i. Ingat, yŭn kana adŭn Mai inŭh aku dog pimangŭh.

¹⁶Kaam minyu ngga aku, ka aku dingah barang bang piminyu Mai. Aku ati jamai, TUHAN Tapa Bisa-pŭrŭg, ngapŭi meh pinganang Mai bada atin ku gaŭn ka sanang.

¹⁷Aku dŭh bigaur ngga daya adi nguruk adŭp-i, yŭn pawŭn ka rami. Sabab aku nundok di Kaam aku nyadi adŭp ku buang aku raru baji.

¹⁸Mani aku babŭ sangsara? Mani tawan ku abah bua? Kaam re piasa aku kah mun anak sungi adi badŭh di tipuh paras?”

¹⁹TUHAN nam, “Kambŭi kuu pari, Aku trima kuu, ka kuu re jadi urun Ku dinge. So kuu minyu nang kayuh adi sipadin, kana dŭ kuu piagah pinganang adi biguna, ka kuu re pari jadi nabi Ku. Adŭp daya re tudu kuu, dŭhsah kuu tudu ngara.

²⁰Aku re bada kuu keya ka sindung agŭh timaga di ngara. Ngara re rawan kuu, pak ngara dŭh re tungang ngarah kuu. Aku re agi ngga kuu an grindung ka nyiramat kuu.

²¹Aku re nyiramat kuu so kuasa daya adi ginaka ngga adi ganas. Aku, adi TUHAN, mbŭh minyu.”