Read Biatah Bidayuh JEREMIAH 19 Bible Online

JEREMIAH 19 - Biatah Bidayuh bible

JEREMIAH 19

¹TUHAN bada aku di miris ndi tipayan adi dog ndai so tana-riyat. Ayŭh bada gŭh aku taban kudu kudu naan nyamba ngga kudu kudu naan imam adi mua tuuh,

² ngga ruah so Tiban Potsherd di ka Rubān Hinnom. Diginŭ aku dŭh siŭn dŭh piagah pinganang adi-I bada aku taban.

³TUHAN bada aku nang, “Raja raja Judah ngga daya Jerusalem, dingah kayuh adi Aku, TUHAN Bisa-pŭrŭg, adi Tapa Israel, nang. Aku re taban pinyirusag ka tarun ati isa barang naan adi dingah re gŭgŭh.

⁴Aku re ndai simŭnŭ sabab daya mbŭh tagan Aku ka mbŭh nyembar tarun ati ngga kraja ngara adi jugan sadis ka tapa tapa bŭkŭn; tapa tapa adi dŭh ngara bait tayung-babuk ngara, bait raja raja Judah puan. Ngara mbŭh ngisi tarun ati ngga deya daya adi dŭh sarah,

⁵ ka ngara mbŭh pijog mija-sambah yŭn Baal isa ngara dapŭd badang anak anak ngara ndu sadis. Aku bŭn pesan ngara bada ndai simŭnŭ. Bŭn kayuh mun anŭ darŭm pikir Ku.

⁶Ngapŭi meh, tika-i re mandŭg adi ngga tarun ati re dŭh tia dog kadŭn Topheth bait Rubān Hinnom. Tarun ati re dog kadŭn Rubān Siŭ.

⁷Di tarun ati Aku re pijimŭ sopŭrŭg pusar daya Judah ngga daya Jerusalem. Aku re bada bara pinganyu manang ngarah ngara ka siŭ ngara darŭm perang. Aku re tandah tadang tadang ngara dog man manuk ngga dāng dāng tarun.

⁸Aku re bada pinyirusag adi bisā nyatŭk kupo ati ndŭg ka daya adi murah re gŭgŭh ka nginga.

⁹Pinganyu re kirurung kupo ati ka suba siŭ daya-i. Pinyikapung anŭ re bisā ndŭg ka daya adi darŭm-i man dingan-i samŭn anak anak adŭp ngara.”

¹⁰Komŭnŭ TUHAN bada aku mape tipayan anŭ di sirung jawin ngara adi agi sua ngga aku

¹¹ka bada aku kidaan di ngara nang TUHAN Bisa-pŭrŭg mbŭh nang, “Aku re pirandŭk bara daya ati ngga kupo ati, ka-i re jadi mun pape tipayan anŭ ka dŭh dapŭd dog ndai bada pari kana. Daya re kubur dingan ngara adi kabŭs di Topheth ani, sabab mating tarun bŭkŭn re yŭn kubur ngara.

¹²Aku bijanji Aku re bada kupo ati samŭn bara daya adi rŭŭ darŭm-i mun Topheth.

¹³Ramin ramin di Jerusalem, ramin ramin raja di Judah, ka sawŭ sopŭrŭg ramin adi tibung-i ko yŭn kimanyan dog badang yŭn bitang bitang ka adi yŭn wain ko dog ren ndu sadis ka tapa tapa bŭkŭn. Sopŭrŭg anŭ re kais mun Topheth.”

¹⁴Ko anŭ aku bu so Topheth, di yŭn TUHAN muko pait aku bada piagah pinganang-I. Aku di ka badag Ramin TUHAN ka mijog diginŭ kidaan di sopŭrŭg daya

¹⁵nang TUHAN Bisa-pŭrŭg, adi Tapa Israel, mbŭh nang, “Aku re taban ka kupo ati ka di barang kupo adi sindŭk-i sopŭrŭg ukum adi Aku muko nang, sabab angān baking ka abah dingah pinganang Ku.”