Read Biatah Bidayuh JEREMIAH 20 Bible Online

JEREMIAH 20 - Biatah Bidayuh bible

JEREMIAH 20

¹Kan imam Pashhur anak Immer, adi pingubak daya adi tukang jaga Ramin TUHAN, dingah aku piagah kayuh kayuh anŭ,

²ayŭh nggen ukum bada aku dog pukong ka dog muak ngga parik basi sindŭk Tiban Benjamin adi tura ka sambu di Ramin TUHAN.

³Isan isan andu jawa ndi, ripas Pashhur kuka parik basi ku anŭ, aku nang di ayŭh, “TUHAN dŭh kadŭn kuu Pashhur. Dŭn adi-I nggen di kuu inŭh ‘Pinyitaru di Barang Yŭn’.

⁴Adŭp TUHAN mbŭh nang, ‘Aku re bada kuu jadi pinyitaru di adŭp mu ka di bara dingan mu, ka kuu re kiris sopŭrŭg ngara dog siŭ pinganyu pakai pedang. Aku re na sopŭrŭg daya Judah di ribo kuasa raja Babylonia; ayŭh re taban ngga bu kudu kudu naan jadi daya-takap ka rais adŭp-i ka adi bŭkŭn ayŭh bada dog siŭ.

⁵Aku gŭh re tandah pinganyu ngara pirinda sopŭrŭg pinyikaya kupo ati ka sirapas sopŭrŭg kayuh ngga buat-rata adi darŭm-i, samŭn rata raja raja Judah, ka taban ngga bu sopŭrŭg kayuh ka Babylonia.

⁶Ka kuu, Pashhur, kuu ngga sopŭrŭg di rawang mu re dog nakap ka dog taban ngga bu ka Babylonia. Diginŭ kuu re kabŭs ka dog kubur, samah ngga sopŭrŭg dingan mu adi ko dingah pinganang kadong mu.’ ”

⁷TUHAN, Kaam mbŭh nipu aku, ka aku mbŭh dog nipu. Kaam bake so aku, ka Kaam mbŭh ngarah aku. Barang naan daya nyirimbe aku; ngara tawŭh aku sandu singarŭm.

⁸Kan aku minyu, aku an minyu bana ka nyirais, “Pinyiganas! Pinyirabur!” TUHAN, aku ari dog tawŭh ka dog ngamun sabab aku piagah pinganang Mai.

⁹Pak kan aku nang, “Aku re kambŭt TUHAN ka dŭh re tia minyu ngga adŭn-I,” pinganang Mai jadi keya ka apui bijagu darŭm aku. Aku suba ngga situngang ku nyijŭn-i, pak dŭh tungang.

¹⁰Aku dingah barang naan daya sigayas, “Pinyitaru mbŭh di barang yŭn! Ja di ripot ayŭh di ngara adi bikuasa!” Ndŭg ka bara jerā ku kajŭn pinyirabu ku. “Kadŭ ayŭh dapŭd dog ngarah pakai aran tipu,” ngara nang; “ka ata dapŭd nakap ayŭh ka maras dendam.”

¹¹Pak Kaam, TUHAN, agi parad ka aku, bake buang bikuasa, ka ngara adi kisiis aku re rabu ka dŭh bigaya. Ngara re dog pimangŭh ndŭg situi tui, sabab ngara dŭh mujur di pingandai ngara anŭ. Mangŭh ngara re dŭh dog kambŭt.

¹²Pak, TUHAN adi Bisa-pŭrŭg, Kaam suba daya ngga pinyitŭnggŭn; Kaam puan ani di atin ngga pikir ngara. Jadi bada aku kiris Kaam maras dendam di pinganyu ku, amai aku mbŭh na har ku darŭm tangan Mai.

¹³Biragu meh yŭn TUHAN! Muji TUHAN! Ayŭh nyiramat daya adi dog kinanyuh so kuasa daya adi arap.

¹⁴ Mangu andu adi ngga aku dog biranak! Kambŭt andu adi ngga sindŭ ku biranak aku!

¹⁵Mangu daya adi bada sama ku gaŭn darŭm-i taban agah ka ayŭh, “Dari ayŭh! Kuu biyŭn anak dari!”

¹⁶Isa-i ayŭh adi taban agah anŭ jadi keya ka kupo kupo adi TUHAN pirabur ngga dŭh kira masi. Isa-i Ayŭh dingah sien mandam ngga isan isan ka trompet perang ngga arong kumbeng,

¹⁷sabab Ayŭh dŭh siŭ aku sibayuh aku dog biranak. Ka ite sindŭ ku meh bisa jadi kubur ku.

¹⁸Mani aku dog biranak? Isa aku kinyam sangsara ka pinyusah ngga pirŭŭ udip ku darŭm mangŭh kah?