Read Biatah Bidayuh JEREMIAH 21 Bible Online

JEREMIAH 21 - Biatah Bidayuh bible

JEREMIAH 21

¹Zedekiah adi raja Judah pait Pashhur anak Malchiah ngga imam Zephaniah anak Maaseiah ka yŭn ku ngga pimite:

² “Turung minyu ngga TUHAN yŭn ami, sabab Raja Nebuchadnezzar so Babylonia ngga tibaran bara soldadu-i mbŭh nyikapung kupo ta. Kadŭ TUHAN an ndai ndi pingandai-nginga yŭn ta ka takan Nebuchadnezzar bada ngundur.”

³Komŭnŭ TUHAN minyu ngga aku, ka aku kidaan di ngara anŭ adi dog pait ka yŭn ku

⁴bada kidaan di Zedekiah nang TUHAN, adi Tapa Israel, mbŭh nang, “Zedekiah, Aku re ngarah tibaran bara soldadu mu adi birawan ngga raja so Babylonia ngga tibaran bara soldadu-i. Aku re nugung sinyata bara soldadu mu di yun kupo.

⁵Aku re rawan kuu ngga sopŭrŭg pinyibake Ku, baji Ku, magā Ku, ka bangok Ku.

⁶Aku re siŭ sopŭrŭg daya adi rŭŭ darŭm kupo ati; manusia ngga dāng sopŭrŭg re kabŭs dog andam adi bisā.

⁷Pak kuu, bara pinurung mu, ka ngara adi gibabŭ udip ripas perang, apag, ka andam -- sopŭrŭg re Ku bada dog nakap Raja Nebuchadnezzar ngga bara pinganyu mu, adi raan siŭ kuu. Nebuchadnezzar re siŭ kuu. Ayŭh dŭh re tandah tadŭ tadŭ so angān udip bait masi di tadŭ tadŭ ngan. Aku, adi TUHAN, mbŭh minyu.”

⁸Komŭnŭ TUHAN bada aku nang di bara daya, “Dingah! Aku, adi TUHAN, bada angān mien ndi so ati duwŭh: aran adi nuju udip ngga aran adi nuju pinyikabŭs.

⁹Tadŭ tadŭ daya adi rŭŭ di kupo re dog siŭ, bait-i darŭm perang, bait-i kabŭs sikirau, bait-i dog andam. Pak ngara adi ruah so kupo ka nyerah adŭp ngara ka daya Babylonia adi aŭn nyerang kupo, re dŭh dog siŭ; ngara re siramat.

¹⁰Aku mbŭh ndai pikir Ku an bada kupo ati dog pirabur. Kupo ati re dog nggen di raja Babylonia ka ayŭh re badang-i ndŭg ka rŭpŭg. Aku, adi TUHAN, mbŭh minyu.”

¹¹TUHAN bada aku nggen pinganang ati ka rawang raja Judah, adi sesang David: “Dingah kayuh adi Aku, adi TUHAN, nang. Ari ingat pimanu pinyitŭnggŭn barang andu. Grindung daya adi dog nipu so sianŭ adi nipu ayŭh. Kambŭi dŭh, arap adi kuu ndai re bada baji Ku bijagu mun apui adi dŭh dapŭd dog mura.

¹³Kuu, Jerusalem, guru[24] bigatung so rubān rubān, mun ndi batuh adi mijog bigatung di rabak. Pak Aku re rawan kuu. Kuu nang mating daya tungang nyerang kuu bait mŭrŭt tambus kuta kuta mu.

¹⁴Pak Aku re ngukum kuu amai kayuh adi kuu mbŭh ndai. Aku re badang istana mu, ka apui anŭ re bada rŭpŭg sopŭrŭg kayuh adi maning-i. Aku, adi TUHAN, mbŭh minyu.”