Read Biatah Bidayuh JEREMIAH 23 Bible Online

JEREMIAH 23 - Biatah Bidayuh bible

JEREMIAH 23

¹Munki masam bisā-i re ukum TUHAN di tunduh bara pimritah anŭ adi pirabur ka bada papar sasah daya-I!

²Ati inŭh kayuh adi TUHAN, adi Tapa Israel, nang pasar pimritah adi sipatut-i kingat daya-I: “Angān dŭh kingat daya Ku; angān bada ngara papar sasah ka mbŭh pibu ngara. Madin Aku re ngukum angān amai arap adi angān muko ndai.

³Aku re nguruk daya Ku adi bŭkŭn so rais rais adi yŭn Ku mbŭh bada ngara papar sasah, ka Aku re taban ngara ngga pari ka tarun tana rais adŭp ngara. Ngara re biyŭn bagŭ anak ka re bitambah bagŭ.

⁴Aku re tijuan pimritah bada kingat jaga ngara. Daya Ku re dŭh tia taru bait dog pitaru, ka Aku re dŭh tia ngukum ngara.[25] Aku, adi TUHAN, mbŭh minyu.”

⁵ TUHAN nang, “Tika-i re mandŭg adi ngga Ku re mien bada jadi raja ndi naan sesang David adi tŭnggŭn. Raja anŭ re mritah ngga bijak ka ndai kayuh adi batur ka tŭnggŭn di ndi tarun tana rais.

⁶Kan Ayŭh jadi raja, daya Judah re siramat, ka daya Israel re udip darŭm damai. Ayŭh re dog kadŭn ‘TUHAN adi Pinyikudip Ta’.

⁷“Tika-i re mandŭg,” nang TUHAN, “adi ngga daya re dŭh tia bipayu pakai adŭn Ku, Tapa adi udip, adi taban daya Israel ngga ruah so tarun tana Egypt.

⁸Pak, ngara re bipayu pakai adŭn ku, Tapa adi udip, adi taban daya Israel ngga ruah so tarun tana utara ka so sopŭrŭg tarun tana rais adi bŭkŭn di yŭn Ku bada ngara papar sasah. Komŭnŭ ngara re rŭŭ di tarun tana adŭp ngara.”

⁹Atin ku asur, ka aku mbŭh kimŭtŭr. Sabab TUHAN, sabab pinganang kudus-I, aku ati mun daya adi mabuk, adi nok raru bagŭ wain.

¹⁰Tarun tana rais mbŭh puno bada daya adi dŭh tŭtŭd di TUHAN; ngara udip ginaka ka pakai kuasa ngara ngga aran adi sarah. Sabab pangu TUHAN tana ngurid ka tarun tana kupai badŭh.

¹¹TUHAN nang, “Bara nabi ngga bara imam dŭh tŭtŭd di Aku; Aku mbŭh dapŭd ngara ndai arap darŭm Ramin Ku.

¹²Aran adi ngara kadŭg re jarŭh ka karŭm; Aku re bada ngara sikak sikakong ka rabu. Aku re taban pinyirusag bada nyatŭk ngara; tika ukum ngara mbŭh sindŭk. Aku, adi TUHAN, mbŭh minyu.

¹³Aku mbŭh kiris dosa bara nabi Samaria: ngara mbŭh minyu ngga dŭn Baal ka mbŭh taban daya Ku manyap.

¹⁴ Pak Aku mbŭh kiris bara nabi di Jerusalem ndai anŭ adi rabis arap: ngara tanggah ka kadong daya; ngara turung daya ndai sarah, ndŭg ka mating daya an ko ndai kayuh arap. Di Aku, sopŭrŭg ngara inŭh arap mun daya Sodom ngga Gomorrah.

¹⁵“Ngapŭi meh, ati inŭh kayuh adi Aku, adi TUHAN Bisa-pŭrŭg, nang pasar bara nabi di Jerusalem: Aku re nggen di ngara pimuruh adi pa'it bada ngara man ka rasun ndu piin nok, sabab ngara mbŭh bada sopŭrŭg daya di ndi tarun tana rais dŭh tŭtŭd di Aku.”

¹⁶TUHAN Bisa-pŭrŭg nang di daya di Jerusalem, “Dŭhnyah dingah pinganang bara nabi anŭ; ngara anŭ nggen di angān pingarap adi dŭh sawŭ. Ngara kidaan di angān kayuh adi adŭp ngara nimbur, ka dŭh pinganang so Aku.

¹⁷Di daya adi abah dingah pinganang Ku, ngara ari nang ngara re siramat. Ka ngara kidaan di barang naan daya adi baking nang pinyirusag dŭh re dog ngara.”

¹⁸Aku nang, “Mating so bara nabi anŭ puan rusia pikir-kira TUHAN. Mating so ngara anŭ mbŭh dingah bait mirati pinganang-I, bait dingah ka mbit piduri di kayuh adi-I nang.

¹⁹Baji-I inŭh keya ka sabak ribut adi daras ka maka ubak ubak daya ginaka,

²⁰ka-i re dŭh ko ndŭg ka Ayŭh muko ndai sopŭrŭg adi-I raan ndai. Di tipuh adi re mandŭg daya-I re mirati kayuh anŭ ngga tarang.”

²¹TUHAN nang, “Aku mating pait bara nabi anŭ, pak ngara mbŭh panu sadi adŭp-i. Aku mating nggen ani ani pinganang di ngara, pak ngara babŭ gŭh minyu ngga adŭn Ku.

²²Kambŭi ngara puan rusia pikir-kira Ku, ngara dapŭd piagah pinganang Ku di daya Ku ka dapŭd bada ngara pasan aran pimudip ngara adi arap ka ginaka.

²³“Aku ati Tapa adi agi di barang yŭn, dŭh di ndi yŭn adŭ.

²⁴Mating daya dapŭd bisukan so batŭh Ku. Dŭh kah angān puan Aku agi di barang yŭn di shorga ngga di ong?

²⁵Aku puan kayuh adi bara nabi anŭ mbŭh nang, adi minyu kadong ngga adŭn Ku ka kidaan di daya nang Aku mbŭh nggen pinganang Ku di ngara darŭm pŭmŭh.

²⁶Ndŭg sinde bara nabi anŭ kinanyap daya Ku ngga pinganang kadong adi ngara nimbur?

²⁷Ngara pikir pŭmŭh pŭmŭh adi ngara kidaan di daya re bada daya Ku kambŭt Aku, nimun tayung-babuk ngara kambŭt Aku ka nyambah Baal.

²⁸Nabi adi ko nyipŭmŭh patut nang anŭ kaŭs-i pŭmŭh adŭ, pak nabi adi mbŭh dingah pinganang Ku patut piagah pinganang Ku anŭ ngga atin tŭtŭd. Ani kana siriyang kambŭi danding ngga gandom?

²⁹Pinganang Ku inŭh keya ka apui, ka keya ka pabā adi pirandŭk batuh.

³⁰Aku rawan bara nabi anŭ adi pakai pinganang dingan-i ka piagah-i keya ka pinganang Ku.

³¹Aku gŭh rawan bara nabi anŭ adi minyu pinganang adŭp ngara ka kadŭn-i so Aku.

³²Dingah kayuh adi Aku, adi TUHAN, nang! Aku rawan bara nabi anŭ adi kidaan pŭmŭh adŭp ngara adi puno ngga pinganang kadong. Ngara kidaan pŭmŭh pŭmŭh anŭ ka kinanyap daya Ku ngga pinganang kadong ka pinganang gambung ngara. Aku mating pait ngara bait mritah ngara bada ndai simŭnŭ; ngara dŭh biguna yŭn sopŭrŭg daya. Aku, adi TUHAN, mbŭh minyu.”

³³TUHAN nang di aku, “Jeremiah, kan ndi naan so daya Ku bait nabi bait imam siken kuu, ‘Ani pinganang TUHAN?’ kuu an kidaan di ayŭh, ‘Kuu inŭh pinyirabis bat[26] di TUHAN, ka Ayŭh re taran kuu.’

³⁴Kambŭi agi so daya Ku bait nabi bait imam nang pinganang sakati ‘TUHAN inŭh pinyirabis bat’, Aku re ngukum ayŭh samŭn rawang-i.

³⁵Sipatut-i, barang naan ngara siken dingan ngara bait madis ngara, ‘Ani pinyinam mbŭh TUHAN nggen? Ani mbŭh TUHAN nang?’

³⁶Jadi ngara dŭh siŭn tia nang ‘TUHAN inŭh pinyirabis bat’, sabab kambŭi agi so ngara nang sakanŭ, Aku re bada pinganang Ku sawŭ pinyirabis adi bat yŭn-i.

³⁷Jeremiah, siken di bara nabi anŭ, ‘Ani pinyinam mbŭh TUHAN nggen di angān? Ani nang TUHAN?’

³⁸Ka kambŭi ngara dŭh tunda pesan Ku ka nang ‘TUHAN inŭh pinyirabis bat’, ka nŭŭh kidaan di ngara nang

³⁹Aku re sun[27] ngara ka taran ngara bada jo so Aku, ngara samŭn kupo adi Aku mbŭh nggen di ngara ngga di tayung-babuk ngara.

⁴⁰Aku re pimangŭh ngara ka ngamun ngara ndŭg situi tui, ka nasip adi mun anŭ re dŭh dog kambŭt.”