Read Biatah Bidayuh JEREMIAH 24 Bible Online

JEREMIAH 24 - Biatah Bidayuh bible

JEREMIAH 24

¹ TUHAN kiren di aku duwŭh bakur buwa ara dog na di jawin Ramin TUHAN. (Anŭ inŭh ripas Raja Nebuchadnezzar so Babylonia mbŭh taban ngga bu Raja Jehoiachin, adi anak Jehoiakim, so Judah, jadi daya-takap so Jerusalem di ka Babylonia, samah ngga bara pinguru Judah, bara tukang ka ngara adi sukup pandai bitukang.)

²Ndi bakur brisi ngga buwa ara adi kana, adi awar masak; bakur anŭ ndi brisi ngga buwa ara adi arap, raru arap re dog man.

³Komŭnŭ TUHAN nang di aku, “Jeremiah, ani kiris mu?” Aku nam, “Buwa ara. Adi kana mbŭh raru kana, adi arap mbŭh raru arap, dŭh bisa dog man.”

⁴Jadi TUHAN nang di aku,

⁵“Aku, adi TUHAN, adi Tapa Israel, nyirundeng daya adi dog taban ngga bu ka Babylonia inŭh keya ka buwa ara adi kana, ka Aku re mandis ngga ngara.

⁶Aku re jaga ngara ka taban ngara ngga pari ka tarun tana ati. Aku re pijog ngara ka dŭh nyirubuh ngara; Aku re purun ngara ka dŭh re dimbut ngara.

⁷Aku re nggen di ngara pinyiraan an puan nang Aku ati TUHAN. Komŭnŭ ngara re jadi daya Ku, ka Aku re jadi Tapa ngara, sabab ngara re pari ka Aku ngga siabo atin ngara.

⁸“Pak Raja Zedekiah so Judah, bara pinurung pritah ayō ayŭh, ka bara daya Jerusalem adi bŭkŭn adi mbŭh rŭŭ di tarun tana ati bait adi mbŭh bipindah ka Egypt, Aku, adi TUHAN, re nyirundeng keya ka buwa ara ati adi raru arap adi dŭh dapŭd dog man.

⁹Aku re bada pinyirusag nyatŭk ngara ndŭg ka sopŭrŭg bangsa di ong taru. Daya re nyirimbe ngara, ka bitapat pasar ngara, ka ngamun ngara, ka pakai dŭn ngara ndu pangu di barang yŭn Aku bada ngara papar sasah.

¹⁰Aku re bada agi perang, udip sikirau, ka andam di yŭn ngara ndŭg ka ngara mating tia dŭm di tarun tana adi Aku mbŭh nggen di ngara ka di tayung-babuk ngara.”