Read Biatah Bidayuh JEREMIAH 27 Bible Online

JEREMIAH 27 - Biatah Bidayuh bible

JEREMIAH 27

¹ Dŭh tui ripas anak Josiah, Zedekiah jadi raja Judah, TUHAN bada aku

²ndai ndi parang-punggo bajak pakai taris birurang ngga apŭg kayuh ka na-i di punggo adŭp ku.

³Komŭnŭ TUHAN bada aku pait pinganang[32] ka raja raja di Edom, Moab, Ammon, Tyre, ka di Sidon so ka pingarun ngara adi mandŭg ka Jerusalem di bidapŭd ngga Raja Zedekiah.

⁴TUHAN Bisa-pŭrŭg, adi Tapa Israel, bada aku pesan ngara bada kidaan di raja ngara nang TUHAN mbŭh nang:

⁵“Ngga kuasa bās ka ngga pinyibake Ku, Aku napa ong, manusia, ka sopŭrŭg dāng adi udip di tunduh tana; ka Aku nggen-i di tadŭ tadŭ daya adi Aku mbŭh mien.

⁶Aku inŭh adi bada sopŭrŭg bangsa ati di ribo kuasa urun Ku, Raja Nebuchadnezzar so Babylonia, ka Aku gŭh mbŭh bada dāng dāng tarun bituan di ayŭh.

⁷Sopŭrŭg bangsa re bituan di ayŭh, ka ngara re bituan di anak-i ka di sukuh-i ndŭg ka tika adi ngga bangsa-i rabu. Komŭnŭ bangsa-i re bituan di bangsa adi bikuasa ngga di raja raja adi bās.

⁸“Pak kambŭi tadŭ tadŭ bangsa bait pritah abah nundok di pimritah-i, Aku re ngukum bangsa anŭ ngga perang, ngga udip sikirau, ka ngga andam, ka ko anŭ Aku tandah Nebuchadnezzar batur batur pirabur-i.

⁹Dŭhnyah dingah nabi nabi ngan bait di tadŭ tadŭ ngara adi nang adŭp-i dapŭd ninjau tipuh adi re, so pŭmŭh bait kah so bisiken ngga roh roh daya adi mbŭh kabŭs puan kah so pingandai biruri karŭm. Sopŭrŭg ngara bada angān dŭh nundok di raja Babylonia.

¹⁰Ngara nipu angān ndŭg ka angān dog taban jo so rais adŭp ngan. Aku re pibu angān, ka angān re dog pirabur.

¹¹Pak kambŭi tadŭ tadŭ bangsa nundok di raja Babylonia ka bituan di ayŭh, Aku re bada-i babŭ di tarun tana adŭp-i, biteya ka rŭŭ diginŭ. Aku, adi TUHAN, mbŭh minyu.”

¹²Aku nang sakanŭ gŭh di Zedekiah adi raja Judah, “Nundok di raja Babylonia. Bituan di ayŭh ngga di daya-i, ka angān re udip.

¹³Mani kuu ngga bara rayat mu raan dŭ kabŭs darŭm perang bait kabŭs sikirau puan kah kabŭs sabab andam? Anŭ kayuh adi TUHAN mbŭh nang re jadi di tadŭ bangsa adi dŭh an nundok di raja Babylonia.

¹⁴Dŭhnyah dingah nabi nabi adi bada angān dŭh nundok di ayŭh. Ngara nipu angān.

¹⁵TUHAN mbŭh nang adŭp-I mating pait ngara; ka ngara mbŭh kadong angān ngga adŭn-I. Ngapŭi Ayŭh re pibu angān, ka angān re dog siŭ, angān ngga nabi nabi anŭ adi kadong angān.”

¹⁶Komŭnŭ aku kidaan di bara imam ngga bara nabi anŭ nang TUHAN mbŭh nang: “Dŭhnyah sabah bara nabi adi nang rata Ramin Ku re rikas dog taban pari so Babylonia. Ngara kadong angān.

¹⁷Dŭhnyah sabah ngara! Nundok di raja Babylonia ka angān re udip! Re ngga mani kupo ati jadi tugung rakang tibawang?

¹⁸Kambŭi ngara sawŭ nabi ka kambŭi ngara biyŭn pinganang so Aku, bada ngara kidaan di Aku, adi TUHAN Bisa-pŭrŭg, bada dŭh tandah rata adi babŭ darŭm Ramin Ku ka adi di istana raja di Jerusalem dog taban ngga bu ka Babylonia.”

¹⁹(Kan Raja Nebuchadnezzar taban ngga bu ka Babylonia raja Judah, Jehoiachin anak Jehoiakim, ka bara pinguru Judah ngga pinguru Jerusalem, ayŭh tandah tiang tiang bās, tong timaga, krita krita timaga, ka kada rata Ramin TUHAN adi bŭkŭn.)

²¹“Dingah kayuh adi Aku, adi TUHAN Bisa-pŭrŭg, adi Tapa Israel, nang pasar rata adi dog tingge di Ramin Ku ka adi di istana raja di Jerusalem:

²²Sopŭrŭg-i re dog taban ngga bu ka Babylonia ka re babŭ diginŭ ndŭg ka Aku mbŭh marik pikir Ku ka rata anŭ. Komŭnŭ Aku re taban-i ngga pari ka tarun yŭn ati. Aku, adi TUHAN, mbŭh minyu.”