Read Biatah Bidayuh JEREMIAH 29 Bible Online

JEREMIAH 29 - Biatah Bidayuh bible

JEREMIAH 29

¹ Aku nuris surat ka bara imam, bara nabi, bara pinguru bangsa, ngga di sopŭrŭg adi bŭkŭn adi Nebuchadnezzar mbŭh taban ngga bu jadi daya-takap so Jerusalem di ka Babylonia.

²Aku nuris-i ripas Raja Jehoiachin, sindŭ-i, bara pinurung istana, bara pinguru Judah ngga Jerusalem, bara tukang, ka ngara adi sukup pandai bitukang dog taran so rais adŭp-i.

³Aku nggen surat anŭ ka Elasah anak Shaphan ngga Gemariah anak Hilkiah, adi Zedekiah raja Judah pait ka Nebuchadnezzar adi raja Babylonia. Surat anŭ nang:

⁴“TUHAN Bisa-pŭrŭg, adi Tapa Israel, nang di sopŭrŭg daya adi Ayŭh tandah Nebuchadnezzar taban ngga bu jadi daya-takap so Jerusalem di ka Babylonia:

⁵‘Piramin diginŭ. Biteya ka man ani ani adi angān purun diginŭ.

⁶Banan sawan ka mira biranak. Komŭnŭ bada anak ngan banan sawan, isa ngara mira biranak gŭh. Angān dŭh siŭn dŭh bitambah bagŭ ka dŭhnyah jadi nisŭ.

⁷Nyiraja yŭn kana kupo kupo adi yŭn Ku mbŭh pait angān jadi daya-takap. Bidua ka Aku ngarun kupo anŭ, sabab kambŭi ngara mujur, angān re mujur gŭh.

⁸Aku, adi TUHAN, adi Tapa Israel, bakan angān bada dŭh tandah adŭp ngan dog nipu bara nabi adi rŭŭ di ruang ngan bait dog nipu tadŭ tadŭ adi bŭkŭn adi nang adŭp-i pandai ninjau tipuh adi re. Dŭhnyah mbit piduri di pŭmŭh pŭmŭh ngara.[35]

⁹Ngara kadong angān pakai adŭn Ku. Aku mating pait ngara. Aku, adi TUHAN Bisa-pŭrŭg, mbŭh minyu.’

¹⁰ “TUHAN nang, ‘Kan ju puru sawa tipuh Babylonia mbŭh ripuan, Aku re kimat angān ka ingat janji Ku an taban angān ngga pari.

¹¹Aku sadi adŭ puan atur adi Aku biyŭn yŭn ngan, atur an taban ka angān pimudip mujur, dŭh pinyirusag, atur adi taban tipuh adi re, adi angān harap.[36]

¹²Komŭnŭ angān re bagan Aku. Angān re mandŭg ka bidua ka Aku, ka Aku re nam angān.

¹³ Angān re jiroh Aku, ka angān re dapŭd Aku sabab angān re jiroh Aku ngga siabo atin ngan.

¹⁴Sawŭ, Aku nang, angān re dapŭd Aku, ka Aku re pari angān ka tarun tana adŭp ngan. Aku re nguruk angān so barang rais ka so barang tarun yŭn adi yŭn Ku ko bada angān papar sasah, ka Aku re taban angān pari ka rais asar ngan. Aku, adi TUHAN, mbŭh minyu.’

¹⁵“Angān nang TUHAN mbŭh nggen di angān nabi di Babylonia.

¹⁶Dingah kayuh adi TUHAN nang pasar raja adi mritah pritah adi David ko mritah ka pasar daya di kupo ati, anŭ inŭh, madis ngan adi dŭh dog taban ngga bu jadi daya-takap samah angān.

¹⁷TUHAN Bisa-pŭrŭg nang, ‘Aku taban perang, udip sikirau, ka andam ka ngara, ka bada ngara mun buwa ara adi mbŭh raru madam ka dŭh dapŭd dog man.

¹⁸Aku re tadak ngara ngga perang, udip sikirau, ka andam, ka sopŭrŭg bangsa di ong re taru kan ngara kiris pimudip ngara. Di barang yŭn Aku bada ngara papar sasah, daya re gŭgŭh ka taru kiris kayuh adi jadi di ngara. Daya re napat ngara ka pakai dŭn ngara ndu pangu.

¹⁹Kayuh anŭ re jadi di ngara sabab ngara dŭh tunda pinganang adi Aku ari pait ka ngara so baba bara urun Ku adi bara nabi. Ngara abah dingah pinganang.

²⁰Sopŭrŭg ngan adi Aku taran ka rais Babylonia, dingah kayuh adi Aku, adi TUHAN nang.’

²¹“TUHAN Bisa-pŭrŭg, adi Tapa Israel, mbŭh minyu pasar Ahab anak Kolaiah ngga Zedekiah anak Maaseiah, adi kadong angān pakai adŭn-I. Ayŭh mbŭh nang Ayŭh re nyerah ngara ka darŭm kuasa Nebuchadnezzar adi raja Babylonia, adi re nggen ukum kabŭs di ngara di sirung jawin ngan.

²²Kan daya adi dog taban ngga bu jadi daya-takap so Jerusalem di ka Babylonia raan mangu daya, ngara re nang, ‘Isa-i TUHAN ndai di kuu mun Zedekiah ngga Ahab, adi raja Babylonia badang udip udip ngara!’

²³Simŭnŭ inŭh re nasip ngara sabab ngara ndai dosa adi sipŭ; anŭ inŭh, ngara tanggah ka mbŭh minyu kadong ngga adŭn TUHAN. Kayuh anŭ inŭh miranggar pinyiraan TUHAN; Ayŭh puan kayuh adi ngara mbŭh ndai, ka Ayŭh inŭh saksi adi rawan ngara.[37] TUHAN mbŭh minyu.”

²⁴TUHAN Bisa-pŭrŭg, adi Tapa Israel, nggen di aku pinganang yŭn Shemaiah, adi daya Nehelam, adi muko pait surat ngga dŭn adŭp-i di sopŭrŭg daya Jerusalem ka di imam Zephaniah anak Maaseiah ka di sopŭrŭg imam adi bŭkŭn. Darŭm surat-i, Shemaiah nuris ka Zephaniah:

²⁶“TUHAN bada kuu jadi imam gati Jehoiada, ka kuu madin mbŭh pingubak[38] daya adi tukang jaga Ramin TUHAN. Kuu dapu tanggong muak ngga parik basi ka na abŭt basi di tungo barang naan daya budo adi ngakar jadi nabi.

²⁷Mani kuu dŭh ndai simŭnŭ di Jeremiah daya Anathoth anŭ, adi minyu mun nabi di bara daya?

²⁸Ayŭh mbŭh kidaan di daya ta di Babylonia nang ngara re tui jadi daya-takap diginŭ ka patut piramin, biteya, ka man kayuh adi ngara purun.”

²⁹Zephaniah basa surat anŭ yŭn ku,

³⁰ka komŭnŭ TUHAN bada aku

³¹pait pinganang ati pasar Shemaiah ka sopŭrŭg daya-takap di Babylonia: “Aku, adi TUHAN, re ngukum Shemaiah ngga sopŭrŭg sesang-i. Aku mating pait ayŭh, pak ayŭh minyu ngga angān mun nabi, ka ayŭh bada angān sabah pinganang kadong. Ayŭh re dŭh biyŭn sesang di dupan angān. Ayŭh re kabŭs ka dŭh sipŭt kiris kayuh kana adi Aku re ndai yŭn bara daya Ku, sabab ayŭh bada ngara rawan Aku. Aku, adi TUHAN, mbŭh minyu.”