Read Biatah Bidayuh JEREMIAH 30 Bible Online

JEREMIAH 30 - Biatah Bidayuh bible

JEREMIAH 30

¹TUHAN, adi Tapa Israel,

²nang di aku: “Nuris darŭm ndi surat sopŭrŭg kayuh adi Aku kidaan di kuu,

³sabab tika-i re mandŭg adi ngga Aku pari daya Ku, Israel ngga Judah. Aku re taban ngara ngga pari ka tarun tana adi Aku mbŭh nggen di tayung-babuk ngara; ngara re pari dapu-i. Aku, adi TUHAN, mbŭh minyu.”

⁴TUHAN nang di daya Israel ngga di daya Judah:

⁵“Aku dingah sirais daya taru, sirŭŭn taru ka dŭh sirŭŭn udip darŭm damai.

⁶Suba pikir? Bisa kah dari biranak? Mani meh garang Aku kiris barang naan dari pusat buang tama tain-i mun dayung adi re biranak?

⁷Andu adi sipŭ mbŭh re mandŭg; gi-bŭn daya kiris andu adi mun anŭ -- tika pinyusah yŭn bara daya Ku, pak ngara re babŭ udip.”

⁸TUHAN Bisa-pŭrŭg nang: “Kan andu anŭ mbŭh mandŭg, Aku re mata parang-punggo adi di punggo ngara ka kadi parik basi ngara, ka ngara re dŭh tia jadi urun daya tami.

⁹Ngara re bituan di Aku, adi TUHAN Tapa ngara, ka di sesang David, sianŭ adi Aku re piguru di takta jadi raja.

¹⁰ “Daya Ku, dŭhnyah taru; daya Israel, dŭhnyah tikaran. Aku re nyiramat angān so tarun tana adi jo anŭ, tarun tana adi yŭn ngan jadi daya-takap. Angān re pari ka rais adŭp ngan ka rŭŭ darŭm damai; angān re siramat, ka mating daya re tia bada angān taru.

¹¹Aku re mandŭg ka angān ka nyiramat angān. Aku re pirabur sopŭrŭg bangsa tarun yŭn Aku mbŭh bada angān papar sasah, pak Aku dŭh re pirabur angān. Aku dŭh re tandah angān dŭh dog ukum; pak kan Aku ngukum angān, Aku ngukum ngga pinyitŭnggŭn. Aku, adi TUHAN, mbŭh minyu.”

¹²TUHAN nang di daya-I “Tawan ngan dŭh tikuri; angān biragan ka dŭh dapŭd bua.

¹³Mating daya kingat angān, mating uri yŭn pirakis ngan, mating pingarap yŭn ngan re bua.

¹⁴Sopŭrŭg ambai ngan mbŭh kambŭt angān; ngara dŭh tia piduri angān. Aku mbŭh nyerang angān mun pinganyu; ukum ngan inŭh bat sabab dosa ngan raru bagŭ ka udip ginaka ngan mbŭh raru sipŭ.

¹⁵Dŭh tia ngadu pasar tawan ngan; angān dŭh dapŭd dog pibua. Aku ngukum angān simŭnŭ sabab dosa ngan raru bagŭ ka udip ginaka ngan mbŭh raru sipŭ.

¹⁶Pak madin, sopŭrŭg adi man angān re dog man, ka sopŭrŭg pinganyu ngan re dog taban ngga bu jadi daya-takap. Sopŭrŭg adi kinanyuh angān re dog kinanyuh, ka sopŭrŭg adi pirinda angān re dog pirinda.

¹⁷Aku re bada angān pari bua; Aku re pibua tawan ngan, sunggu angān nang, ‘Zion mbŭh dog taran; mating daya piduri ayŭh.’ Aku, adi TUHAN, mbŭh minyu.”

¹⁸TUHAN nang, “Aku re pari daya Ku ka tarun tana ngara ka re masi di barang rawang; Jerusalem re pari dog pijog, ka istana-i dog nyurat.

¹⁹Daya adi rŭŭ diginŭ re nang ragu puji; ngara re nyirais ngga gaŭn. Ngga berkat Ku ngara re bitambah bagŭ; berkat Ku re bada ngara dog stabi.

²⁰Aku re pari kuasa jah bangsa ngara ka pijog-i bada tagap dinge; Aku re ngukum sopŭrŭg adi kinanyuh ngara.

²¹Pimritah ngara re mandŭg so bangsa adŭp ngara, raja ngara so daya adŭp ngara. Ayŭh re tudu Aku kan Aku bagan ayŭh, amai asi re birani mandŭg dŭh dog bagan? Ngara re jadi daya Ku, ka Aku re jadi Tapa ngara. Aku, adi TUHAN, mbŭh minyu.”

²³Baji TUHAN inŭh sabak ribut, sabak adi daras adi maka ubak daya adi ginaka. Sabak dŭh re ko ndŭg ka Ayŭh mbŭh kubo ndai kayuh adi Ayŭh raan ndai. Di tipuh adi re mandŭg daya-I re mirati kayuh anŭ ngga tarang.